[رشيد]

.


لا ضاق صدري من همومي نحرته
.....................
#شعر
#نافل_علي_الحربي



الله على رفقة صديقٍ اثق فيه

لا ضاق صدري من همومي نحرته

مخلص وامين ولا يظن الردا فيه

ودايم ورأيه واقعي لا استشرته

صديق صادق بالوفاء ما ابتحل فيه

يمون علي ولا بغيته قدرته

ابدي عليه اسرار قلبي واناجيه

اللي اشرحه باسهاب واللي اختصرته

واصارحه عما بصدري اخفيه

الي طرأ عن كل شخصٍ سترته

من خوفي انه يسمعه جاهلٍ فيه

يستعبره في موضع ما اعتبرته

متفاهمين بكل شئ نسويه

نظره بعيد ويفتهم ما حزرته

ما هو من اللي دوم رأيه يبديه

لو كان يخطي ما يطيع ان عسرته

ولا يستفيد من التجارب بماضيه

دايم يكرر لجته لو نهرته

ورأي خطأ كيف أتبعه واقتنع فيه

ووش لون ابي آمن صاحبه ماحذرته

ولا هوب من يمشي بدربٍ اعاديه

ما فيه وعيٍ يفتكر ما افتكرته

ولا واحدٍ لو هو صديقٍ اماشيه

الي بدت لي حاجه ما انتظرته

إلى اعتذر عن حاجتي كل ما اجيه

قنعت منه بكل حال وعذرته

ولا هو من اللي طيب ربعه يقزيه

يغتاظ من مدح الرفيق ان ذكرته

غره غرور لا يبرق بما فيه

يسب غيره وان بخصته حقرته

واظن كلٍ حاضره مثل ماضيه

ومهما بقى يبقى على ما خبرته

وانك لا تهدي من تحبه بتوجيه

العود لو عدلت عوجه كسرته


.

الموضوع الأصلي: لا ضاق صدري من همومي نحرته #شعر | | الكاتب: رشيد | | المصدر: شبكة بني عبس