[فيصل الدلوم]

،،
،

قولولهـا

،،
،

(قولولهـا).. اللـي بقـى بالقلـب ماقلتـه=من قبـل لاأنسـى هواهـا (وإتناسانـي)
ماخنتهـا والغـلا فـي داخلـي شلـتـه=يومـن غلاهـا مـن الله شـي ربـانـي
كلامهـا.. كــان قـاسـي ماتحملـتـه=من ظلمها صرت أنا (المجني) مع (الجاني)
صبـرت وبالـي عليهـا حيـل طولـتـه=عشان لايشمت (القاصـي) مـع (الدانـي)
من يوم (حـل الفـراق) وبانـت أسئلتـه=والله مدري من اللـي مزعّـل الثانـي..!؟
كـل شـي بغيابـهـا يـانـاس هملـتـه=شوفوا (فراق الحبيبـه) ويـن ودانـي..!؟
القلـب لوكـان بـيـدي كــان بدلـتـه=وحطيت أنـا فـي مكانـه واحـدن ثانـي
عشان لامـن جرحنـي أنسـان وزعلتـه=أنسـاه لاغـاب عـن عينـي وخـلانـي
إن كان (رقمـي) مـن الجـوال كنسلتـه=مـاراح تنسـى أبـد (أسمي)(وعنوانـي)
أنـا (علـى شانهـا) الموضـوع قفلـتـه=وإهـي بعـد لازم تقفله(علـى شـانـي)
لـودرب الأفـراق يغـري كـان كملتـه=خلوهـا ترجع..(قبـل لاصـك بيبانـي)
أقسمـت إنـي صدقـت بـكـل ماقلـتـه=وإنـي أحبهـا ( كثـر محبـة أخوانـي)

الموضوع الأصلي: من اللي مزعـّل الثانــي..!؟ | | الكاتب: فيصل الدلوم | | المصدر: شبكة بني عبس

[فهد المويسه]

صح لسانك يا بو ناصر

وقصيده جزله من شاعر جزل

وتقبل سلامي

[عبداللطيف العايضي]

صح للسااانك الله لا يهينك قصيدة جزله من شااااعر جزل

تحياااااتي لك

[مسندالعويمري]

صبـرت وبالـي عليهـا حيـل طولـتـه
عشان لايشمت (القاصي) مـع (الدانـي)

صح السانك يافيصل على القصيده

الاكثر من رايعه واكثرمن مواقف يعني منه الكثير

تحياتي لك واعجابي

أقسمـت إنـي صدقـت بكـل ماقلـتـه
وإنـي أحبهـا ( كثـر محبـة أخوانـي)

[ابو براك الرياض]

صح للسااانك الله لا يهينك قصيدة جزله من شااااعر جزل

[الشامخ]

صح السانك وقصيده جزله

[كهل الصباء]

أخوي فيصل الدلوم؟
يسعد مساء هالطلة.

أولا:أخوي فيصل أنا أول مرة أقراء لك قصيدة وهذا شرف لي اني أتعرف على واحد من أبناء عمومتي ومن شعراء القبيلة الشباب.

ثانيا:قصيدتك رائعة بشكل عام ولكن شكلك استعجلت عليها ونشرتها أول ما كتبتها قبل ان تقوم بمراجعتها وتنقيحها لذلك حبيت اني أكتب لك بعض مرئياتي حولها كما أرجوا منك أن تقبلها وتوسع لها صدرك:

(قولولهـا).. اللـي بقـى بالقلـب ماقلتـه=من قبـل لاأنسـى هواهـا (وإتناسانـي)
بصمة ابداعية رائعة في مدخل القصيدة كمقدمة لموضوعك.

(ماخنتهـا والغـلا فـي داخلـي شلـتـه=يومـن غلاهـا مـن الله شـي ربـانـي)
غلاها من الله شيء رباني:اختيار خاطيء لكلمة شيء لم تخدم معناك بالشكل الصحيح حيث انك في هذه الحالة جعلت لغلاها وصفا بالربوبية بدون قصد لأن شيء تجعل كلمة رباني تعريفا مطلقا للذات.
فلو قلت غلاها من الله حكم رباني لأصبح التعريف محصورا بالحكم وصار المعنى سليم.

(كلامهـا.. كــان قـاسـي ماتحملـتـه=من ظلمها صرت أنا (المجني) مع (الجاني))
المجني:هنا تفيد تذكير الجناية فقط فكأنك أصبحت أنت الجريمة بعينها.
فالواجب عليك أن تقول المجني عليه لأكتمال المعنى.

(صبـرت وبالـي عليهـا حيـل طولـتـه=عشان لايشمت (القاصـي) مـع (الدانـي)
من يوم (حـل الفـراق) وبانـت أسئلتـه=والله مدري من اللـي مزعّـل الثانـي..!؟)
وصف دقيق مدرك لحدث يصعب الادراك في وقته.

(كـل شـي بغيابـهـا يـانـاس هملـتـه=شوفوا (فراق الحبيبـه) ويـن ودانـي..!؟)
شكوى بديهية لكل محب.

(القلـب لوكـان بـيـدي كــان بدلـتـه=وحطيت أنـا فـي مكانـه واحـدن ثانـي
عشان لامـن جرحنـي أنسـان وزعلتـه=أنسـاه لاغـاب عـن عينـي وخـلانـي)
صراحة أعجبتني في هالبيتين المملؤة بالإبداع الشعري العجيب وأنا متأكد انك لو ما إستعجلت على القصيدة لأصبحت كلها إبداع عجيب لأنه لا يكتب مثل هذا الا شاعر متمكن.

(إن كان (رقمـي) مـن الجـوال كنسلتـه=مـاراح تنسـى أبـد (أسمي)(وعنوانـي))
إبداع.

(أنـا (علـى شانهـا) الموضـوع قفلـتـه=وإهـي بعـد لازم تقفله(علـى شـانـي))
حرف الهاء في آخر كلمة تقفله أثقل نطق البيت.

(لـودرب الأفـراق يغـري كـان كملتـه=خلوهـا ترجع..(قبـل لاصـك بيبانـي))
الأفراق:خطأ لغوي ليس له مصدر.

(أقسمـت إنـي صدقـت بـكـل ماقلـتـه=وإنـي أحبهـا ( كثـر محبـة أخوانـي))
بيت ختامي جيد.

أخوي فيصل القصيدة جميلة إزدادت جمالا بقوة ترابط موضوعها وسلاسة التنقل بين أبياتها.

صدقني لو تعطيها شوي من الإهتمام وتراجعها لتطلع متميزة أكثر.

أشكرك أخوي فيصل مرة أخرى.


ودمت بووووووود.

[العريض]

صح لسانك اخوي فيصل الدلوم قصيده في منتها الروعه