[ذيبان الرشيدي]

السلام علكيم ورحمة الله وبركاته

أخوتي الكرام
أسعد الله أوقاتكم بالخير واليمن والمسرات




أقدم لكم هذا النخبه من أبياتي
التي لم تكتمل
بعد

والتي أبت
الا
أن تلامس
قلبوبكم قبل عقولكم
وأن
لاتبقى
أسيرةٍ للانتظار المرير
بعد
حينها هذا

أكتبها
والنفس تقول
عل وعسى
أن
تحظى على حيزاً قليلاً من أعجابكم واستحسانكم

لا أحب الأطالة كعادتي
اليكم ماكتبت

ياقلب يالي .. داسك الهم والغم = ياقلب لاتشكي زمانٍ مضالك
كفكف دموعك وأرفع الرأس وأعلم = ماكل وجهٍ لاضحكلك صفالك
مبطي تجرعت المرأره مع سم = وأخفيت همٍ بالحنايا بدالك

عرفتلي .. من مر الايـام ثنتيـن = وجعلتهن .. للغير عقبي علامـه
الحر .. مايدرج كسير الجناحيـن = والا الرخم .. يدرج جويع النعامه

وقف مكانك .. يانظر عيني شوي = وأسمع كلامٍ صادقٍ مـن حنينـي
أن كان شوفي .. عندك الزاد والمي = فأنت النظر للعين .. وأيضا ظنيني

كانك تبي شوفي .. ترا حزة عصير = هي دخلتي للنت .. ياطيب الفـال
خل العتب .. خل الزعل والمعاذيـر = خل العصاري بيننا .. تصلح الحال
وأن كان مالي .. ياهوى البال تقدير = منك العذر .. يامتعبٍ كل رجـال

ماجيت ابدل ريحة الثوم .. يشموم=وأجزع على حكم ..القدر والليالي
الي كتبه الرب .. صاير ومحسـوم= أمراً عرفته .. مـن قديـمٍ وتالـي

لاضاق صدري .. من كلامٍ سمعتـه = لاعدت أميز بين .. صاحي ومطفوق
قمت اتعـوذ بالـي فعلـه ذكرتـه = الواحد .. الي يزبنه كـل مضيـوق
ربٍ على خيره وشـره .. شكرتـه = سبحانه الي .. يشكره كـل مخلـوق
ربٍ الا منـي .. شكيـت وطلبتـه = ماكبني ضايق .. وباكـي ومخنـوق

وضح النوايا .. ياخوي المسافيـر = لا .. لا توردهـا ديـار المنـيـه
لا لا تسلمها.. يديـن الشناهيـر = ثمٍ تموت .. وتصبح أكبر ضحيـه
نياتنـا .. ماتنشـرى بالدنانـيـر = ولاحنا ندور .. من وراها جزيـه
أدخل على الله .. لاتزف التعابيـر = يم العروس .. الي هـوت للرديـه
أفهم كلامي .. واضحاً دون تفسير = عل وعسى تفهمه .. باقي البريـه

يابنت .. لا لا تحسبينا وراعيـن = كلمه ترده .. وكلمه أخرى تصده
أما تجينا .. ياطويـل الكراعيـن = والا تروح .. وصادق الحب رده

ياعاذلي ماني على الهم ملزوم = مادام أشوفك ضاحك السن سالي
وشوله أبكي ضيقة العم واليوم = وأبكي على وقتٍ جميلاً مضالي
وأشنا زماني وأرفع الصوت محروم = ماكن غيري ضاق فيه المجالي

دون الكرامه .. ترخصين وتروحين = دون الكرامه .. غيرك الفين وحده
حبك بقلبه .. مثل لعب البزاريـن = ومثل الذي رأسه .. يفك ويشده

يابنت كلمه .. بختصرها بشطرين = هاكِ الخلاصه .. ياعذابه وسعده
أما تجينا .. ويجمع الوقت قلبين = والا تروح .. وظامر القلب رده

الله خلق هالناس .. سمرٍ وبيضان = لحكمةٍ يابنت .. ربي عرفها
الفرق مايحسب .. على شكل والوان = الفرق يحسب .. عالقلوب وشرفها

ياخوك قلبي من عناء الوقت تعبان = نفسي من المجلاس .. يكثر كسلها
مرت علي أيام .. ماشفت أنسان = وعيني تكظ الدمع .. صافي لا اهلها
من باعني بعته .. ولانيب غلطان = والنفس ..ماترغب لمنهو جفلها
من يحقرك بيعه .. ولو كان سلطان = هذه قلوب الناس ..محدن وصلها

الموضوع الأصلي: دون الكرامه ترخصين وتروحين ... دون الكرامه غيرك الفين وحده { بعضٌٍ من بعض } | | الكاتب: ذيبان الرشيدي | | المصدر: شبكة بني عبس

[عبدالعزيزعلي]

:
:
شاعرناذيبان صح اللسانك مليون
روائع روائع روائع ماكتبت
دمت رائع كما انت
تقديري لك
:
:

[ابو سعد الرشيدي]

ااااااااااااخ اخ على الوجع يالغالي

يسلموووووووووو ايديك

[عبد العزيز]

بيض الله وجهك وصح لسانك يا متألق
أبياتك في منتهى الروعه تمنياتي لك بالتوفيق

[البعيد الهادي]

بيض الله وجهك وصح لسانك يا متألق
أبياتك في منتهى الروعه
تحيآآآآآآآآآآآآتي لك

[شهاليل]

شاعرنا العذب المتألق// ذيبــان
ابيــات تفوح منها رائحة العزه والشموخ
.
.
استاذي ...... دام عزك وشموخ قلبك
صح لسانك على هذه الدرر الرائعه ...
وافـــر امنيااتي لك ..!

[ذيبان الرشيدي]

اقتباس من مشاركة عبدالعزيزعلي : : شاعرناذيبان صح اللسانك مليون روائع روائع روائع ماكتبت دمت رائع كما انت تقديري لك : :

لاهنت

وصح

بدنك

يالامير

على المروور الراائع
والجميل

لاخلا ولاعدم
منك

تقبلــ
جلــ التحيهــ والسلامــ
ذ
ي
ب
ا
ن

[مرزوق العجوني]

صح لسانك يالذيب ولا هنت وتقبل مروري