[ابوفهد العويمري]

( شيوخ في ذاكرة التاريخ)


بسم الله الرحمن الرحيم
الصلاة والسلام على أشرف الأنبياء والمرسلين سيدنا محمد وعلى آله وصحبه أجمعين .


هذه سيرة مختصرة لبعض من مشايخ بني رشيد كما ان الشعر يتكلم عنهم ويخلد لهم ذاكرتهم .
(1 )قاسم بن براك شيخ مشايخ بني رشيد في الزمن السابق
يقول شاعر من عنزه
راكب من فوق منبـور الاوراك
حر مرمـل لـه ثـلاث سنواتـي

حرٍ على قطع الفيافي هـو أمنـاك
أشقـر حمـر ذرعانـه مفتـلاتـي

أشقرحمرمنصاه بيـت أبـن بـراك
مـن دون جاسـم راكبـه لايباتـي

من دون جاسـم لاتوانـا بممشـاك
ستـر العـذارا ناطـح الموجباتـي

كـز القعودونصـه الشيـخ ملفـاك
وأشرحله الموضـوع باللازماتـي

يابو دليم أنخي الولى ثـم أبنخـاك
بالله ياهـل الطيـب هاتـو عباتـي

بالله ياهل الطيب يازين مـن جـاك
زبن الدخيـل ومحتمـا الجاذياتـي

زبن الدخيل ليا وصـل لاذبح جـاك
عنها الايديـن الطايلـه قاصراتـي

ومن تطلبـه حـق وبالحـق عيـاك
مايطاوع الاعقب ضـرب الهواتـي
مايطاوع الاعقـب شدتـك يمنـاك
بالسيـف والالـكـزت باللهاتــي

والحق ماعنـه المشاكيـل تنخـاك
ان كان ارجالـك تنطـح العايلاتـي


ان كان وتحدهم صميـدع ونشمـاك
يودع سرب خيل المعـادي شتاتـي


وانت الذي ترد على حوض الأدراك
وان قمت فيها بحيـل ألالـه تاتـي


أن قمت فيها قومت مابهـا أشكـاك
تفـك عسـر قفولهـا المغلقـاتـي


ومن عقب مندوبي تراني أتحـراك
وانتم كعام اللى على الحـق عاتـي


وأنتم كعام اللـى بجمعـه تهقـواك
ياأهـل البويضـا فعولكـم بيناتـي


ودليم وفد يفـم عيالـك وشـرواك
نسل الفهـود مطوعيـن العصاتـي


وتمت عسا سهـوم المنايـا تعـداك
واللى بوجهك مـا عليهـا فواتـي


( 2 )الشيخ سرور بن سمران بن سمرة شيخ شمل بني رشيد بالحجاز عاش من عام 1296هـ وتوفى 1371هـ عن 75 عاماً تقريباً . وقد أعطاه الملك عبد العزيز راية الجهاد (بيرق) وحارب عدداً من قبائل الحجاز بإذن الملك عبد العزيز حتى خضعت هذه القبائل المتمردة وتوحدت الجزيرة العربية على يد مؤسسها الملك عبد العزيز. يقول عايض بن سمير الذيابي يصف احد غزواته

ياماحلا مسراح زينـات الاقـران =هجنا هميماتـن عليهـن الطلوعـي
مدن من ام ارميث والصبح مابـان =والعصر بالمفرع طويلات بوعـي
الهم على جـال المليليـح معطـان =ربعا على غبر الليالـي جزوعـي
ياما رمو للضيف من عقر الضـان =مع منسف يشبـع عليـه الهلوعـي
السبر قلطهن سرور بـن سمـران =فوق الصيقـر واقتفتـه الجموعـي
قال ابشروا شاهدت حلوات الالبان= وقلط من الطابـور ميـه رثوعـي
كم خفرة من فعلهـم سدهـا بـان =حليلهـا هلـت عليـه الدمـوعـي

اسباع وادي الحمض وطيور شوفانا =لذيب وسـط اديارهـم مايجوعـي


3- الشيخ محمد بن بداي القلادي (راع الحجبا)
يرثيه الشاعر الابيتر بهذه الابيات

جانا خبر ياليت ماهو وكـادي=ياليت جياب العلوم اختصرهـا
قالوا توفا الشيخ سقم المعادي= ياما بهج كبدن وكبدن جمرهـا
مرحوم ياشيخن ركبت الشدادي= في ساعتن تكثر بلاوي خطرها
مرحوم ياجياب قطم التـوادي=عليك عيني مايبطـل سهرهـا
ابكيك يارعا يهـن بالحمـادي= ترعابه العراء وتبني وبرهـا
مرحوم ياسقم الرمك بالطرادي= سقم الكبود اللي تزايد عجرها

4--الشيخ راشد بن علي العويمري شيخ مشايخ العوامره الذي أنفرد بمشيخة العوامره عن الفرادسه وقد قال الشاعر المعروف براعي العمرات من عنزه

البارحه هبت هبوب الشمالــــــي =وبرده يذرف دمعت العين تذريف
هبت وانا بحضين زين الدلالــــي =ومكيف(ن) عند اريش العين تكييف
جانا المقوعي فوق حيل اسمانــي=واخذ ابكار(ن) مترفاتن مشاعيف
وفريت لاجرى لك اللي جرالـــي=واطا على صم الرضم والشغاريف
لحقتهن دون الحويط لحالــــــــي=مستيسر مالي بروحي تصاريف
وزبنتهن راشد كريم السبالــــــتي = شيخ حدى دونهن برخم السيف
قال أرجعوا هذا دخيل الدلالــــــي= كني بعيطاً عن سموم اللواهيف

وقال أخر راشد بن علي هوكبدا العدا& عند أقتحامالخيل في ميدانها وقال عنه حمد بن عدله ( من ساس ربع على الشطات بتعاني&من عقب راشد شجيع من شجيعيني

(5)الشيخ هديبان بن عواد الجحيش شيخ شمل المهيمزات والشيخ هديبان كان من البارزين جداً خلال حروب الملك عبدالعزيز لتوحيد نجد وبعد معركة الفاضلية استدعاه الملك عبدالعزيز وقال له ماذا تريد أن اعطيك فقال الحرة وبعض الناس لاموه على هذا الطلب لكن الشيخ هديبان أصر على ذلك والحرة التي اعطاه الملك عبد العزيز لهديبان هي حرة بني رشيد وتتكون هذه الحره من صخور سوداء صعبة
ومن ابناه الامير سويلم بن هديبان رحمه الله. يقول الشاعر رابح بن دحيلان العويمري
يمدح بها الامير سويلم ويصف المعركه التي دارة بين الشيخ هديبان وبين شيوخ مطير

ياراكب اللي سايقه مايهيني=كد كمل التمرين توه بدابـــــــه
مقال وده ورشة مهندسيني =ولا قيل عند حسين سوي خرابــــــه
يفحاه ابو عيسى من الغانميني =سعد عين اللين انتخى واعتزابه
من تحت ويله مثل رش الغشيني =شختول وبل(ن)مستوي من سحابه
يلفي على ذباح كبشن سميني =لراع العماير شوق جالي عذابه
حليلته من منقع الطيبينــي =من ماكر(ن) رب المقادير جابــــه
يامير يالاطام للمعتديني =لشافك ممرورن تصيبه مهابــــــــه
انا اشهدنك من علا الطيبيني =عد(ن) بحر من مد جاله روابـــــــــه
اخوات هدبا كلهم كامليني =سو الحريب ليا تصعب بدابــــــــه
كد لي خبرت افعولهم من اسنيني =عصر(ن) مضى يوم(ن) هاك الحرابه
على ملا مح فطرن صاملينـي =وخلافهم جمع(ن) غداله ضبابــه
كم هجمتن لفوادها مصبحيني =وكم ويلد(ن) منهم عطيب(ن) صوابه
كم خفرتن راحت تصيح الجنيني =واقفوا بطرشن مايعدد حسابـــــه
جتهم اشيوخاً للابل مرتهيني=يبون قطعاناً على حد لابـــــــــه
جاهم نذير(ن) واطلبوا فازعيني =وتوافقو عقب العشاء بحد غابـــــــه
قامو عليهم قومت(ن) صامليني =وراحت قلايعهم بالايدي نهابـــــــه
راحو ذهاب ونصهم عادميني =وشبعت بمنثرهم هجاف الذيابــــــه
لو تسأل الابيض بهاك البطيني =ليخبرك عن كاينن ما مضابـــــــــه
اقولها ماني من الكاذبينـي =ولاني بسرمادي(ن) يدور جلابـــــــه

(6)الشيخ ابراهيم أبن غثي رحمه الله شيخ الخيارات غني عن التعريف له معروف كبير حيث كان احد الرجال حكم عليه بالقصاص بتهمه وسعى فيها الشيخ ابراهيم حتى نفى عنه حكم القصاص حيث كان الشيخ ابراهيم بن غثي له تقدير خاص ومكانه عن رجال وشخصيات الدوله رحم الله الشيخ
يقول الشاعر رابح بن دحيلان العويمري

راكب اللي موردن من وكاله =جمسن حمر ماكاده البعد يطويه
لطاف مع حزم(ن) وحزم(ن) بداله=مثل اشقرن شاف العلف يم داعيه
يلفي على يدركون الجمالـــــــه=لابن غثي ونعم من يعتزي فيــه
اللي ليا ركب الرشا فى المحاله=تلقى السباع الساعيـه تدرق فيه
ابراهيم عز اللي نزل عند جاله=لطم العنيد اليــا تخبط طواريـــه
من ماكر(ن) جاي(ن) لبوه وخواله= امعرب الجديـــن ماشككو فيــــه
يامطلع اللي حط حبسه لحاله= جاه القصاص بسرعة(ن) يبا ينهيه
من حكم شيخ (ن) يوم قطع اسباله= تهمه بعيده حاشته ووقعت فيه
امه تصيحه يوم سمعت بفاله = تهل دمع (ن) خافي(ن) مذخرة فيه
عليه ابو حباس دلا احباله=من وسط سجنه طلعه في مداليه
مثل الذي من فوق الامتان شاله =اظهر رديفه واشهب الملح غاشيه
وحيات جياب المطر من اخياله =ماينلحق رد الجزاء لو سعى فيه

(7)عالي بن معتق بن حمدان من فخذ الحمادين من الرويضات من بني رشيد .

كان عالي بن معتق في يوم من الأيام في وقت المهاجمات وتطاحن الفتن هجمت على عالي خيل من الأعداء وكانوا العرب في يوم رحيل وكان عنده ناقه وولدت بنفس الساعة وهجت الناس ونصحوه الحاضرين أن يترك الناقة ورفض وفحج على الحوار وبدأ يدافع عن الناقة واعتصم راعي الخلفه بالله وصمد وكل ما ذبح من الخيل ثلاث أو أربع أنصاعت عنه الخيل هاربة وثم حمل الحوار واتجه إلى طريقة وحينما يشاهدونه الفرسان الهاجمين يتناخون بكلمة النشاما رجل واحد أغنموا الناقة ثم يعودون إليه مرة ثانية وثم ينزل الحوار ويفحج عليه ويبدأ يرميهم بالرصاص وبدأت الفرسان على هذه الحالة حتى ذبح من الخيل عدد عشرين من الخيل وبتر رجل أحدى القوم وهو شيخ القوم الهاجمين وأصابه أصابة بالغة وصدهم عن نفسه صداً تاماً وحمل الحوار على ظهره والتحق بضعينة أهله أما القوم الهاجمة أسعفوا صاحبهم الجريح وانسحبوا من حيث ما أتوا وتمثل عالي بهذه الأبيات الشعرية ليصف بها ما حصل له

مسموح يا اللي تفعل الطيب يمناك :: يمنا على العليا تحـوش النفايـل
عز الله أنا بالشجاعـة ذكرنـاك :: وهذي شهودك من كبار الدلايـل
يا راعي الخلفه بفعلـك مدحنـاك :: والطيب ما يجحد بسلـم القبايـل



(8)-- الفارس المعروف محمد بن عواد بن عجوين الرشيدي من فرسان بني رشيد البارزين الذين لهم منزلتهم بين فرسان القبيلة وشيوخها. لقد خاض هذا الفارس معارك وملاحم عديدة ومعروف عنه الكرم كما قال في مدحه الشاعر: طالب بن الجويعان العنزي:
ياعيال يا اللي على الثنتين
............................. ....حطوا جواعد على شدة
حطوا عليهن دلال زين
......................................... ...الصيح ما محلي المدة
البيض ينصن ابن عجوين
.................................................. .. تنصاه بيض بلا عدة
وابن عجوين كان يضرب به المثل بالكرم والسخاء
يقول شاعر اخر من قصيدة طويلة يصور بها كرم ابن عجوين:-
يامسري القوم يامحمد
.................................................. .....يومن ضوء القمر غابي
سارين لين الفجر عمد
.................................................. .....خمسة عشر يوم بحسابي
رحم الله المسلمين جميعاً.
للشيـــخ الفارس / خنيفربن ضاري زعيم القعابيب
في ذات يوم اختلف رجل يدعــي راضي من الحنانيه من حرب
مع اقاربه وجماعته خلافا شديد
وهرب واستجار ببني رشيد وكان الذي اجاره الشاعر هذيل بن زبنه
فاكرمه واجاره ومكث في جواره سبع سنين وهم بمنزلة الاخ وابن العم
وبعد هذه المده اسطلح الرجل مع اهله وجماعته فعاد اليهم
ورحل من ديار بني رشيد بكل حفوه من الرجال الذين اكرموهم غايه الاكرام خلال هذه المده
وعلى راسهم هذيل بن زبنه

وبعد مضي قرابت شهر من رحيل الرجل الا وغاره مفاجئه على ديار بني رشيد
وحلالهم وبالخص حلال هذيل ونهب المغيرون حلال هذيل وقتلو ابنه
واتضح بعد ذالك ان المخطط لهذه الغاره وقائدهم ودليلهم هو الرجل الذي
اجاره هذيل والذي قضى عنده سبع سنين معززن مكرمن وكان ابن هذيل القتيل يخدمه
كما يخدم اباه وكان يشرب من حليب ابل هذيل قبل ان يشرب ان يذوقها هذيل واهله

فجع هذيل من هول ماحدث حيث انهو فجع في ثلاثة اشيئا
مقتل ابنه ونهب ابله وخيانة جاره ؟؟

وكتب هذه القصيده يستنجد بقبيلة القعابيب من قبائل بني رشيد

حيث قال :

ياعيال ياماشين من فوق ثنتين=تريضوا لبيات شعر صحاحي
لعيال بن قعبوب لوهم بعيدين=ونعم فيكم ياطيور الفلاحي
خصوا خنيفر شوق من تدعج العين=حبس الضعاين في نهار الصياحي
قل جارنا اللى عندنا سبع سنين=رماد ناره ماذرته الرياحي
غزا علينا مخلف للقونين=ماقدر الجيره وزين الفلاحي
خذوا لنا ثار العيال المسمين=هاتوا لنا جل البكار الطياحي
ان حلة القلة وصار السعد زين =بيوتهم تسمع جضيض الصياحي

وبعد وصول القصيده للشيـــخ الفارس / خنيفربن ضاري زعيم القعابيب
اخذته الحميه واعد عدته وجهز نفسه وقومه للغزو والثأر
ورفض ان يخرج معه أي من فارس من قبائل بني رشيد

سوا جماعته القعابيب لان الشاعر هذيل خصه وجماعته بالقصيده

وخرج خنيفر وجماعته لغزو

وهاجموهم ونكلو بهم وتمكنو من الرجل الخائن وقتلوه





في الختام اعزائي الاخوه الطيبين الذين اطلعوا على هذا الموضوع البسيط (موضوع الطالب الابتدائي) المختصر الذي لايعتبر موضوع كامل عن مشاهير وشخصيات بني رشيد* فشخصيات وفرسان بني رشيد كثير يعجز التعبير عنها

اقول انا ليس بمورخ وليس بكاتب القبيله لاكن هذا المقال المتواضع تم نسخه من جهو د القائمين والمهتمين بتاريخ ربعنا بني رشيد .



وتقبلوا فائق احترامي وتقديري

ابو فهد العويمري,,,,,,,,,,,,,,,,,

الموضوع الأصلي: شيوخ مازالو في ذاكرة التاريخ | | الكاتب: ابوفهد العويمري | | المصدر: شبكة بني عبس

[ابن دحيلان]

السلام عليكم ورحمة الله وبركاته
اخي بيض الله وجهك ومشكور

[سعد الفلاح]

الله يعطيك العافيه أخوي أبوفهد العويمري على موضوع ((شيوخ مازالو في ذاكرة التاريخ )) نعم فعلهم المشرف لنا لان يغيب عن أذهاننا ولا عن حقوق التاريخ وتسلم يمينك ولاهنت يلغالي

[ابوفهد العويمري]

	الاخ المؤقر سعد الفلاح اشكرك على مرورك بهذا الموضوع تقبل فائق احترامي وتقديري

[المكوشح]

الاخ ابوفهدالعويمري شكرا لك على هذا المجهودالطيب وبيض الله وجهك وسلمت يمينك وشيوخ يستحقون ان يخلدون فى ذاكرة التاريخ ==ارجوا من الاخوه تثبيت الموضوع ===

[مسندالعويمري]

بسم الله الرحمن الرحيم

الا خ العزيز ابوفهد العويمري وفقك الله

السلام عليكم ورحمة الله وبركاته

هذا الموضع مهم جدا وتاريخ وقصص وقصيد في القبيله العزيزه قبيلة بني رشيد

ابوفهد شكرن لاتكفيك منا انت قمت بعمل مهم ولكن لايكفينا منك ننتظر مثل هذا فهو المطلوب

في مثل هذا المنتدى وغيره


ابوفهد بيض الله وجهك ودامك الله بصحه وعافيه وكثر الله من امثالك

[خالد العويمري]

يعطيك العافيه ابوفهدالعويمري مجهود حقيقة رائع جدا
الف مليون شكر
تحياتى

[فواز الدواي]

ابو فهد تطلاك البيض

رحم الله الميت منهم وبارك الله بالحي

ونعم فيهم جميع

تقبل مروري