[شاعر الصعاليك]

سعدت باللعب مع اخوي الكبتن ، وحبيت
انقل لكم الطاروق بالمحاورات المنسقة


الكبتن

ابا اغازل بقلعة عبس بنت المجد بين الناس=لو الحراس كلـن معـه بـاروده وجنبيـه
انا فارس وعندي مال نقد ومن ذهب والماس=ولا ابغى الا هنوفٍ تشغل عقـول الهواويـه

الصعلوك

تغازلها وحظك شوفها يالكبتن الحسـاس=وهي تسري بتال الليل مع ناس ٍ شقرديـه
اذا تبغى الهنوف الناعمه روح على مكناس=وانا رجال واميـز ليـا شفـت الحراميـه

الكبتن

ياكثر اللي يغازلها بصوت الوتر والمرواس=فقـارى والفقـارى مـا تشابـه للغناويـه
انا لهاذي وذيك وفي عز ولي طناخت راس=ولا تروعني علـوم الصعاليـك العليميـه

الصعلوك

تفقد مـا جمعتـه يـوم روحتـوا لابـو نـواس=سكارى الحب في سكره ما هي يم الرومنسيه
ظلام الليل ما ينجيك يا الكبتـن مـن الوسـواس=واذا بانت عليـه الشمـس عانـه يزبـن الفيـه

الكبتن

انا اجمع وانت علمني ليا من دقت الاجراس=تراني نوب ما اسمع مير خلك مقدم الهيـه
اعوذ بربي الوالي من الوسواس والخنـاس=وانا حرن نـداوي يشبعـه ثنـداة قمريـه

الصعلوك

تسولف من سعه والا على ما قيل فيك انعاس=يا راع البندق اللي رميها من حول رجليه
قرينا قصة ٍ تحكى باسم عباس ابـن فرنـاس=خلقه الله بلا ريش ٍ وركب ريش عاريه

الكبتن

انا حطاب والحطاب مـا يمشـي بليـا فـاس=ومرباعـي ليـا حصلـت لـي دارٍ سنـاويـه
عليك شوي وتجيب القصص وان طول المجلاس=تجيب قصص غريبه والمصادر كتـب عبريـه

الصعلوك

انا خابرك حاطب ليل مالك فالبلد اجناس=ولكن نوب ما تفرق ما بين العود والحيه
مطوع تنصح البدوان بالدله وبالمحماس=ولكنك تجيب التتن وتبيعه علـى ميـه

الكبتن

ترى الحياله مسلسل كويتـي مانـع ودواس=لكنك لانت لامانـع ولانتـه صايـر وخيـه
دخيل الله تعلمني وانا خابرك ساسك سـاس=معك والا عنك حتى نصير ثنين طرقيه

الصعلوك

تعلمني وانا اللي شارح ٍ لك علـى الكـراس=لكن اقلوب خلـق الله بهـا دقـة حسينيـه
ترى الاشراف من مكه ولا هم شاربين الكاس=واذا شافوا مجاهر ركبـوه بوسـط دوريـه

الكبتن

صحيح ان البحر يبقى بحر لو خضه الغطاس=على هلـون والاخبـار مربوعـه ومثنيـه
يموت كليب واحزان الجليله برقبـة جسـاس=لكن لعيونها ابا اكتب ثمان حـروف مرثيـه

الصعلوك

صحيح اخر زمن يظهر لك الدجـال والبـلاس=وكل ٍ قال انا مهدي وجاين لاجل مهديه
يجوز ان الطيور اتلا الزمن تبحث عن النوماس=مدام ان الحفاه اهل الغنم يبنون محميه

الموضوع الأصلي: الكبتن - الصعلوك | | الكاتب: شاعر الصعاليك | | المصدر: شبكة بني عبس

[أخـو جـزعـة]

الله الله

عزالله فطاحله وشهادتي فيكم ماهي مجروحه وبس الا عمليه جراحيه ما تحرز فيها هههههههه

[أميرة البنات]

ياساتر هههههههههههههههه

صح الله السنتكم يالشعار ^_^<<

[المقبل]

ابداع من الاثنين

[قطاع الفيافي]

صحت السنتكم ابداع من طرفين

[ابن شلال]

صح لسانك ولسان الكابتن

[بيطار الشعر]

الكبتن وشاعر الصعاليك

صحت اللسنتكم

طاروق راقي

[زراق الاشهب]

عزالله ان شاعر الصعاليك خطير خطير

مطوع تنصح البدوان بالدله وبالمحماس = ولكنك تجيب التتن وتبيعه على ميه ياسلام سلم

يجوز ان الطيور اتلا الزمن تبحث عن النوماس = مدام ان الحفاه اهل الغنم يبنون محميه

قصف جوي

تفقد ماجمعته يوم روحتو لابونواس هنا مربط الفرس وشاعر الصعاليك يقصف الكابتن من هالشطر

طاروق رائع اعجبني شاعر الصعاليك فيه بكل صراحه