[امل مفقود]

حبيت ان أنقل لكم قصيدة الشويمس امل ان تحوز علي اعجابكم

جيتكم ياهل الشويمس والسلامه
جيتكم بأعذب لحون السامريه

جيتكم والشوق متصدر كلامه
جيتكم بأحلى الليال الخرمسيه

جيتكم كلي ولع مفلت حزامه
جيتكم يا عزوتي وأجمل تحيه

جيتكم يا هل القيم يا هل الشهامه
والأصاله والحروف الأبجديه

وطيبكم ثابت مثل ضلع ٍوشامه
وارثينه من جدود ٍوأكبريه

يا سلايل عبس يا روعة وسامه
يا سلايل فخرنا شمس ٍوفيه

جابني نشوة غلا وقمت غرامه
جيتكم عنوة خوي ناوي خويه

يالشويمس ديرة المجد ومقامه
ديرة العطر الزهر والنرجسيه

ديرة النفس العزيزه وإحترامه
ديرة التاريخ والنقش الثريه

ديرة الزرع الخضر روض الخزامه
ديرة المي القراح السرمديه

ديرة الجو النقي وقت الظلامه
ولا ظهر نور الصباح الأرض حيه

والمطر لاحل وإنسلت سهامه
ريحته تطوي عطور الشانزليه

وإن لفينا للكرم ذروة سنامه
عندكم ننسى العلوم الحاتميه

وكان جينا لشجاعه والزعامه
نكتفي نقرا الفصول الأوليه

والخياري فارسك وأعلي هيامه
ساكنك منذ العصور الجاهليه

وإحتماك يوم ضرب ٍوالخصامه
بالبنادق مع خيول وصمصميه

حتي جا عبدالعزيز ضم إنقسامه
وصرتي في عهد السعود السندريه

العهد جنه وعلي العدوان طامه
يحرق الطاغي على روحه وجيه

وعهد ابو متعب تكاتف والتحامه
والعطا والخير واليد السخيه

ديننا ثم الملك دونه حسامه
والوطن ثم الوطن حنَّا الحميه

ومسكها صلوا علي خير الإمامه
وأعتذر لو صار نقص ٍبالهديه

كلمات الشاعر /سعد بن جميل الرشيدي

الموضوع الأصلي: قصيدة الشويمس لشاعر سعد بن جميل الرشيدي | | الكاتب: امل مفقود | | المصدر: شبكة بني عبس

[السيف القاطع]

قصيده جزله من شاعر مبدع وهل الشويمس يستاهلون كل ماقيل فيهم يعطيك العافيه يا الحرف المفقود

[محمد الراشد]

قصيده جميله ووافيه وصح لسان سعد ولاهنت

[عايض حماد بن عريجه]

قصيدة جزلة ويستاهلون ربعنا اهل الشويمس ولاهو قصور بالباقين

[سعد بن جميل]

اشكرك امل مفقود علي نقل القصيده