[رشيد]

.


بعد القلوب اشدّ من بعد الاجسام

مادام غصن الودّ طارت رفوفه

كم واحد نشوفه من العام للعام

اقرب من الّلي كل يومٍ نشوفه

الادمي تقوده ظروف واحكام

وما كل واحد يخدمنّه ظروفه

نطرد ورى سرب الاماني والاحلام

ويالله عسى بعض الامور مخلوفه

لو يكشف الواحد صناديق الايام

ما كان خضّب بالأماني كفوفه

العمر يمضي والتجارب له احزام

والشيب يضرب للنواصي دفوفه

كم واحدٍ غافل وهو يلبس احرام

مايدري احرامه لموته (بروفه)

طول الأمل كفّه تلوّح لقدام

والنفس لمعانق هواها شغوفه

والضيق يتسلّل على روس الأقدام

لـ إحساس من شعره على اسوار جوفه

يا صدري اصبر وانت في بهوك اقسام

من المواجع غير نفسك عيوفه

لا تنحني لو كانت عروقك حيام

وعذوق لينة ما بذرت مخروفه

صدر السما ما ثقّله كثر الأجرام

واللي تهاوت ما عليها حسوفه

ضيوف قلبي تغرف عدوده الالام

وعلى الزمن يا كبر شرهة ضيوفه

مابين قام الحظ والحظ ماقام

الحزن رتب بالحنايا صفوفه

يحطبني بفاسه ويتركني حطام

باسباب معروفه وغير معروفه

وانا ماغير اهيم واتشجّر هيام

واثمر قصيدٍ يانعاتٍ حروفه

-

عطا الله ممدوح



.

الموضوع الأصلي: صناديق الأيام | | الكاتب: رشيد | | المصدر: شبكة بني عبس

[ساري الغدرا]

لا تنحني لو كانت عروقك حيام


لله درك من شاعر
شطر عن قصيدة كامله
اعجبتني القصيدة بتسلسلها وامثالها وحكمها
ونقول صح لسان الشاعر والناقل
وتحيايتي لكما
وشكراً يا رشيد على الانتقاء المميز

[كبرياء امراة]

سلمت الأيادي

[رشيد]

اقتباس من مشاركة ساري الغدرا لا تنحني لو كانت عروقك حيام لله درك من شاعر شطر عن قصيدة كامله اعجبتني القصيدة بتسلسلها وامثالها وحكمها ونقول صح لسان الشاعر والناقل وتحيايتي لكما وشكراً يا رشيد على الانتقاء المميز

اشكركم جزيل الشكر


.

[مرزووق]

صح لسانك ياشاعر