[بدر الحشية]

يالله ياللي تسجـد النـاس لرضـاه=ياوامـر خلقـه علـى حـج بيتـه
تفرج لمن سده على الناس ما ابـداه=راضي على مقسومك اللي عطيتـه
من شن يسل الحال والجسم يبـراه=والنـاس مايشفونـه إن ماشفيـتـه
قلت آه واجرحـاه مـن خلتـي آه=وإن حملوني حمـل غـي قويتـه
قالوا سفا بالحال ويش اللي أغـواه=قلت آه ويش المنكر اللي وطيتـه؟
قالوا جهلت وبـان علمـك لمنهـاه=قلت آه علمـي يامـلا مـا كميتـه
قالوا طلبنـا لـك مـن الله معافـاه=قلـت آه وحدتـه وعفـوه رجيتـه
قالوا هله وأحباب عينـه نصحنـاه=قلـت آه هـذا واردٍ مـا بغيـتـه
قالوا ندور لك من البيـض حليـاه=قلت آه لـو غيـره بكفـي رميتـه
قالوا نشاش العـود مالـك بلامـاه=قلت آه عود الموز بإيـدي لويتـه
قالوا تـزوج كـود تدلـه وتنسـاه=قلت آه لو خذت أربـع مـا نسيتـه
قالوا من أقصى الناس وين أنت وياه=قلت آه ما أنسى يوم جاني وجيتـه
قالوا نشوفـه عنـد هـذا وهـذاه=قلت آه عمره ماعقب حجـر بيتـه
قالـوا عليـلٍ ناقلـن داه بــرداه=قلت آه بأقرابـي وروحـي فديتـه
قالـوا نشيـر ولا نفـع ماحكينـاه=قلـت آه هـراج النمايـم عصيتـه
قالوا كثر شيبـك وقلبـك بعميـاه=قلت آه لـو قلبـي غريـر نهيتـه
مطـاوعٍ قلبـي بعجفـاه وإقــداه=وإلى عطى منهـاج دربٍ عطيتـه
يانـاس خلـوا كـل وادٍ ومجـراه=قلتـوا كثيـر وقولكـم مالقيـتـه

الـــشـاعــر/عبدالله بن حمود بن سبيل

الموضوع الأصلي: ياللـــــــــــه ياللي تسجد الناس لرضاه | | الكاتب: بدر الحشية | | المصدر: شبكة بني عبس

[صادق الوعد]

مشكور اخوي بدر على النقل الرائع وصح السانك والسان الشاعر... ابن سبيل

[فيصل الرشيدي]

تفرج لمن سده على الناس ما ابداه
راضي على مقسومك اللي عطيتـه


الله الله الله ونعم الاختيار


صح لسان الشاعر

وتسلم عسى تسلم من الشر يمناك

يا بدر الحشية على النقل


ربي يسعدك ويوفقك

[راعي البلها]

صح لسانك ولسان شاعرها
ولاهنت اخوي بدر على النقل والاختيار الرائع

[بدر الحشية]

صادق الوعد
سيف عنتر
راعي البلها
سعدت بمروركم العذب ولاهنتم