[سعد بن عادي]

حنا عسفنا مهرةٍ .. ما تِعسـف
يوم العيون بفعلنا .. مذهولـه



لا تقعد تهايط .. ولا تتفلسـف
اللي تقوله .. ما قدرت اتطولـه


شعارنا .. شلفا وسيف ومنسف
وشعاركم .. تفّاحةٍ ماكولـه!

[سعد بن عادي]

لاتلومني لاقلـت فضفـض ودنقـت
. . . . . ماغير اسايس دمع عينـي سياسـه
لأني ما عرف انام ، في تالي الوقـت
. . . . . لازان نومي جاه طاري ، وحاسـه !
كذّبت كلمة حزن مبطـي ، وصدقـت
. . . . . وهالحين اكذب من يحـس بوناسـه
لازان جـوي يـوم واحـد وروقـت
. . . . . جاني صباح اللـي بعـده ، انتكاسـه
مبطـي اروح ادور النـاس لأضقـت
. . . . . ويروح بعض الهـم ويخـف باسـه
واليـوم للعزلـه وللوحـده اشتقـت
. . . . . وامر اعتزال الناس قيد الدراسه

[سعد بن عادي]

تسلسل الاحداث توحي بـ شيئين
اما حياة العز ولا الشهاده

[سعد بن عادي]

يموت الشعر في صدر الغريب وكل حرف ٍ مات
علـى قبـره يضحّكنـا شطـر مـدري يبكّينـا
تخيّر فالدروب ولاعرف خيـر الـدروب ايـات
مايـدري انّـا نعـوم ولالقينـا ساحـل ومينـا
نعيش ومشكلتنا مثل حرب الصـرب للكـروات
ياكبر المشكلـه لـن صـار حامينـا حرامينـا

[سعد بن عادي]

سلامتك من كل عين و كل شـرّ وكـل بـاس
يالجوهـر المكنـون يالالمـاس يالـدر النفيـس
يالمعدن الصافي و يالوافـي و ياطهـر اللبـاس
يا ابلغ مفاهيم الشرف و اثمن مطاليب العريـس
ما شفت طبق الاصل من جنسك طباق ولا جناس
اتيه ما حصلـت مثلـك لا جليـس ولا ونيـس
كنك على ما يهتـوي قلبـي مفصـل بالمقـاس
اجلس لحالك فيـه والله مـا يجالسـك الجليـس
بديت في بني العلاقه معك من حجـر الاسـاس
علاقةٍ يقبل بها الطيّـب و يرفضهـا الخسيـس
افنى و يفني الجيل كله ما لحق عرضك مسـاس
لو كان فيك من الفتن ما يستريـح الهـا بليـس

[سعد بن عادي]

انا عاشق وانا مغرم وانا لولا الهوى ما عشت

ولاكان لحياتي طعم لـولا الجـادل الطرقـا

هنوف ٍ فرقها عن كل من لبست غطاه وبشت

مثل فرق ابتسامات اللقا عـن دمعـة الفرقـا

[سعد بن عادي]

.

.

.

لا تاخذ الشوق من قلبي وتتركني
يشهد علي الوفا : ما جيت ابي غيرك
المحك مثل السحاب العجل في ركني
واحس في داخل ظلوعي بتقصيرك

[سعد بن عادي]

لازال .. كرسي حضرتِك ياالاميره
في ظل قصرك .. ماتغيّـر مكانـه
مافيه بنتٍ غيرك انتي .. جديـره
تملاه ، وتعيش امنياتـه وامانـه
تسوين في نظرة عيوني .. عشيره
ماهوب .. من زود الغلا والميانـه
الاّ انّك اصلاً .. قبل اعرفك كبيره
وابغاك تبقين الكبيـره .. بامانـه
كلّك على بعضك .. مثيره ، مثيره
روحك ، وقلبك في هواه وحنانـه