[سعد بن عادي]

أحيان يعييك الدهر حتـى ولـو إنـك حكيـم
تصبر على جوره وتقنع من صروفه بالقليـل

لكن تعلم من دروس الوقـت وأفهـم يافهيـم
وأخذ الكلام اللي عليه اثبات برهـان ودليـل

إليا مدحت أمدح كفو وإليا خدمت أخدم كريـم
ترا رديّ الفعـل لايمـدح ولا يخـدم بخيـل

ولا تخاوي اللي على قول الخواجه سيم سيـم
يظهر على وجه الردى ولا على وجه الجميـل

وأعلم تراك من الجليس ومن تخالل والنديـم
إن كان راس كنت راس إن كان ذيلٍ كنت ذيل

خلك مع أهل الدين والمعروف والنهج السليـم
اللي يبادي ذكرهـا نعـم المخالـل والخليـل

وأقلط على اللي يعشقون الطيب والعز المديـم
تامن بهم لاضاقت الدنيـا وضيّعـت السبيـل

أجواد تلقاهم سواة النور فـي الليـل الظليـم
وقفاتهم عند العواني والخوي تشفـي الغليـل

وأحذر من اللي همهم عند العوايـل والحريـم
ترهم ضعاف نفوس لو زادو من المال الحصيل

أرزاقهم هبابهم والبخـل فـي الحلـه مديـم
والخير ماتذكر به قصـار اليمانـي مستحيـل

هاذي نتايج تجربه وأمثال قيلـت مـن قديـم
فيها العْبر تاخذ بها العقّال مـن جيـل لجيـل

أقولها من هيض ولا غيض والعقـل الحليـم
يدري بها في مجمل الواقع ولا يدري الهبيـل



..

[سعد بن عادي]

يا لابس المشلح على بالك يقولـون ونعـم
والاّ تبى من لبسة المشلح غـرور وكبريـا

والنعم زينة مير حولك مالهـا ماطـأ قـدم
وأزيدك من الشعر بيت ,الناس ماهم باغبيا

إن كان بيتك ما يعرف البنّ الاشقر والشحم
اكيد ما مرّت على مسمعـك تبقـى وتحيـا

حيث ان تبقى وتحيا مدهالهـا بيـت الكـرم
ما شرّفت بيت البخيل اللي ما في وجهه حيا

الجود ما يطرح علم والبخل ما يرفع علـم
والنور ما يقبـل وجيـه الاّ وجيـه الأتقيـا

اللي غناته طاعـة الله والله انـه مـا نـدم
واللي يحسبون الغنا بالمال ماهـم باغنيـا

يهدي بك الله رجل واحد خير من حمر النعم
فالساعة اللي ما يفيدك لا قريب ولا اخويـا

الموت يفرس فالبشر فرس الذيابـة فالغنـم
ما دايم الا الله ما دايم لا ملـوك ولا انبيـا

والمرجلة ما جات عند اهل المراجل من عدم
الا بطردٍ مثل طـرد البـدو لبـروق الحيـا

والاّ الريا لو في علومٍ غانمة ما لـه طعـم
ركعة بنيّة صادقة تسوى مية ركعـة ريـا

هذا الكلام اللي يقص العظم ويجـذ ّ النسـم
ان جاز لك لا بأس وان ما جاز في قلع النيا

لو يرفعونك فوق سلّم ما انت طايل يا قـزم
الا ليا طالت خشوم الفطس في شرق آسيـا

[سعد بن عادي]

السلام عليكم
و مساء الخير على الجميع
وكل عام وانتم بخير
وفي امن وامان ورخاااء
عذرا / للغيــاب
وتحيه /لقلوبكم وأيامكم / سعــاده

العيد كم عيد بيـن النـاس عدانـي
وانا اللي اغرس له الضحكه ويجحدني
اسقيته الامنيـات البيـض واسقانـي
طل انتظاري ولرضى النـاس قيدنـي
عيدت مرة فرح في جملـة احزانـي
لو كان ضحكة خوي الدرب تسعدنـي
واللي تركني علـى فالـي وخلانـي
تدنيـه الاحـلام والايـام تبعـدنـي
اغزله الدمـع ليـل العيـد وحدانـي
لو زحمة العيد باللا عيـد توعدنـي
ياحارس العيد قل للصبـح ممدانـي
ولا اعلن العيد وانس انـك تقعدنـي
قله من العايديـن ان كـان يقرانـي
وان ماقراني عذولـه فـيّ يوردنـي
ماجت على العيد والنسيـان مجانـي
قل ماتحملـت لـو مـره وعايدنـي
قلي مـن العايديـن العيـد نسانـي
لو قلت تكفى على النسان ساعدنـي

الغالي اللي جـرح غاليـه بسكاتـه
لويدري البوح كيـف يبـدد الكربـه

اطلق عنان الشعور وحـرر آهاتـه
ورسى على مركب العشاق وابحر به

ياضيق صدري على صبره وضيقاته
من ركزت الرمح حتى طعنة الحربه

الله يسقـي زمـن حبـه ونزواتـه
مافيه لحظه ماني بذكره واشعربـه

اتخيله وارسمه لين اجمـع أشتاتـه
وأتوه والقى خطا أقدامي على دربـه

الله ينجـي فـوادي مـن مناجاتـه
ياطول صبري ويابعـده ويـا قربـه

لايرحم الشاعـر الا مـن معاناتـه
وغيابه المستطير وضيقـة الغربـة

[سعد بن عادي]

شابت عيون الأماني يالخفوق الحزين
واحترت ابوّصفك يا حب ٍ عجزت اوّصفه


استضعف الهجر واحساس المفارق متين
دام الوفاء طبع والأخلاص فيني صفه



ما اقسى من اني اعيش الحب مذّهب ودين
إلا اني آعيش في دنيا ماهي منّصفه

[سعد بن عادي]

ياليت شعري يكتب شعوري الحي ,
يمكن .. تميّز قيمتك / وتعرفها !



وتشوف منزلتك على مثل ماهيّ ,
وأشر لك بـ / يمناي , وأقول شفها ,

[سعد بن عادي]

غافلني الهمّ وامليـت المحاجـر سهـر

في عيد ميـلاد جـرحٍ ماقـدرت ادفنـه


كم لي وانا اطويه من تحت الضلوع وظهر

لين اكتسح معظـم الاوقـات والامكنـه

[سعد بن عادي]

لا تتركين ..

الضيقه تسيطر عليك..
خصوصا : إنك تعرفين .. آسبابها,

تفائلي ..
وانا بدوري .. بحتويك
لين السعاده .. تلبسين ثيابها ..

[سعد بن عادي]

تـرى التواضـع لامنـّه زاد عن حدّه
يضعفك في عين غيرك وأنت ماتدري!