[سالم الحمد]

أولاً : وبكل مصداقية وأمانة

نشكر الأخ سعد بن عادي على دعوة شاعرنا الكبير


نسأل وبمعنى الأصح نسفسر من شاعرنا :

المنطقة كما يعلم الجميع تفتقر لمكاتب التنسيق بين الشعراء سواء شعراء المنطقة وهم كثر
أو الشعراء الآخرين بهدف حضور المناسبات وإقامة المحاورات الشعرية

نسفسر من شاعرنا الكبير ونقول :: هل هناك تنسيق ومشاركات مع المكاتب
التي تقع خارج المنطقة ؟

وما رأيك حول إنشاء مكتب مستقل في منطقتنا ؟

شاعرنا الكبير كما تعلم بأنه قد يحتاج شخص ما شريط مسجل لإحدى
المحاورات الشعرية ولا يستطيع الحصول عليه مثلاً لقدامة زمن
التسجيل أو لأي سبب آخر و المهتمين بفن المحاورة كثر
ولله الحمد والشكر ما رأيك بإنشاء الاستديوهات التي بدورها
تعمل على تسجيل المحاورات الشعرية
في منتطقتنا مما بدوره يسهل الوصول والحصول على أي محاورة
مسجلة بين الشعراء ؟؟؟

[ناصر بن شري]

نشكر الأخ سعد بن عادي على دعوة شاعرنا الكبير

..رشيد بن عنيزان الرشيــدي..

مــروري ســلام وتقــدير.. لشخصــكـــم.. الكــريم ..

نـــعــم..((..ابــومعــدي..)).. انت ســيف تفتــخر بــه القــبيله غــني عــن التعــريف..

واكـــرر الشــكر والتقــدير..

ولاحــترام الى منتديات..قبائل بني رشيد.. الشـــامخه

نبــراس المــاضي والمستقبـــل..



للـــجميع

واشكر العضو ناصربن شري على نقل رسالتي للشاعر الكبير ابـومــعدي

مصنت بن شري الرشيدي
][ابــو..رشــيد..][

[سليمان بن رشيد]

المحاورة الثانية عشرة :
وهذه المحاورة بين الشاعرين رشيد بن معدي ومسعد الجهني :
رشيد :

يامرحبا بالجميع وكل كايد يهون = ترحيبتن بالوفا والعز عنوانها
ومن بعدها يالقصير جب جديد اللحون = بالحفلة اللي تعنيتم على شانها

مسعد :

دام البقا يالرجال اللي تسد الديون = اللي نهار اللزوم تميل ميدانها
إن كان تبغى العلوم اقرب من المكرفون = واحرص من الشعلة الحمرا ودخانها

رشيد :

الله يسلمك وجهينة بعد يسلمون = والناس ماتمشي إلا بأمر سلطانها
حنا لنا بالوفا تاريخ لا تجهلون = بالكفة اللي رجح مرجاح ميزانها

مسعد :

يابو معدي ترى قافيك كحل العيون = علم بني عبس تكمل قدر جيرانها
ياكبتن الطايرة راسك تحمله متون = ادرى على الطايرة لاتطيح جنحانها

رشيد :

يا أصحابنا ياجهينة بالوفا تبشرون = ياللابة اللي ترجع كيد عدوانها
وحنا بني عبس وقت اللازمة مانخون = والأرض ماتميد لين يثور بركانها

مسعد :

الله يعز الرجال معمرين الحصون = إن كان قلنا سلام تقدم أيمانها
يالشايب المنتظر ثارت عليك الجنون = والنفس ماهانت إلا شايبن هانها

رشيد :

بيني وبينك سوالف مجد كاين يكون = لياحضر رحمانها ماحضر شيطانها
يا أصحابنا بالجزيرة كلكم تمرحون = وحنا نميز مسي النفس وأحسانها

مسعد :

فوزي يطالع وأخو سلمى يحد السنون = احسب حساب الجنايز وأحضر أكفانها
لولا الثمر مانطالع في فنون الغصون = الأولة روحت والثانية عانها .

المحاورة الثالثة عشرة :

وهذه محاورة بين الشاعرين سلطان الهاجري ورشيد بن معدي :
رشيد :

الله يحيي ضيوفنا الأكرام = من شاعرلأهل الوفا يافي
الليل ياسلطان بن وسام = قالوا لي إنك شاعر سنافي

سلطان :

دام البقا مار الوعد قدام = مع كل درب وكل محرافي
أنت الفقيه مفسر الأحلام = وأنا بعدشاعر ومتعافي

رشيد :

حنا تواجهنا بعام العام = لكن ماوقنا على الخافي
مع حضرتي ماتحمض الأفلام = لو أن حيلك حيل نسافي

سلطان :

أنته مصدر والرجال حيام= كل يبا يسعى ويطافي
وإن كان في خشمك شوي عرام= لا تدخل إلا المجلس الدافي

رشيد :

لولا العدالة كثروا الظلام = والمحكمة تحكم بالأنصافي
وش همني من قوة أبو عصام = يذري على جثمانه السافي

سلطان :

هذي مباراة لها حكام =ياحارسن ماصد الأهدافي
تلد عينك شرق والا شام = حنا شربنا المشرب الصافي

رشيد :

على الحقيقة صرت الأقلام =بيني وبينك قول جغرافي
تراي أعرف إنك قليل رحام = لكن ميقافك وميقافي

سلطان :

ماني بمتحيزم بدون حزام = ولا أتمشى والقدم حافي
فرعون يومنه بنى الأهرام = في هيبته يذكر وينشافي

رشيد :

البدو دايم ترفع الأعلام = تنطر يجي للخيل عسافي
علي من يمناي والأقسام= لتارد وثم تصدر عيافي

سلطان :

على يمين ورفقة الإسلام = ماتسري إلا والستر ضافي
اصبر على حظك ثلاث أيام =وأقول لك توفي وتستافي

رشيد :

أنا فرحت بدعوة العزام = اللي دعا شعار الأشرافي
لكن زادن ماوراه إيدام = يابو لهب بالحيل ينعافي

سلطان :

صنوا على أكه واحكموا بغلام = وإلا خسارة صن ياكافي
وش بعد أهل حايل عن الدمام = ياسرع مغزاهم والأنكافي

رشيد :

يالاعب الميسر عليك أوهام = أثريك متباهي وعكافي
البعد بعد القلب ياصدام = مافيه لنبه نورها طافي

سلطان :

ياعنبر أمريكا ومسك الشام = اللي حصل منكم ماهو كافي
ماني بطامع عيشة الأيتام = لو الليالي شهب وعجافي

رشيد :

ياللي تعبد النصب والأزلام = بكره يجيك الغيث هتافي
تراك ياصايم مع الصيام = يمكن يجرح صومك رعافي

سلطان :

حنا نعد أرقام فوق أرقام = وأنته تعد أرباع وأنصافي
أنته رجل والهيل جاك شمام = هيل الحبش ماهو بنسكافي

رشيد :

من طيبكم يامسوقين الخام = حكام عرف بدون عرافي
وأنته حشيم ومن رجال حشام = لكن خذاك السيل جرافي

سلطان :

بالهون ياجسمن بدون عظام = ترى الحكيم يذل ويخافي

المحاورة الرابعة عشرة :
بين الشاعرين / رشيد بن معدي ورجا الله المحمدي
رجا الله ـ رحمه الله ـ :

ياسلام ويامسى الخير ومن العايدين = بارك الله في ليالي العرب وأيامها
بعد وافق عام الألفين عيد المسلمين = فرحة الإسلام تمت وحسن إسلامها

رشيد :

مرحبا ترحيبتن تبري القلب الحزين = عاد عيد أصحابنا في بلوغ أحلامها
عام الألفين أعربي والدول ترطن رطين = الله إنه ينصر بلادنا وإمامها

رجا الله :

بارك الله فيك يابو معدي قول آمين =دعوتي لك لاوراها ولاقدامها
خمني إنك ماتشوف الرقوم إلا بعين = والعرب تقرأ وتكتب بروس أقلامها

رشيد :

أشركك في دعوتك وأنت ضمن المؤمنين = وأهل الأرحام أنا ما قطعت أرحامها
النظر ممدود ياصاح ضمن الصالحين = وأهل الأصنام تسجد بجنب أصنامها

رجا الله :

البداية في بدر والنهاية في حنين = وأنت خليت البرودة وجبت حزامها
صارع الأيام واعمل لها دنيا ودين = المطية تالي الوقت بيض عظامها

رشيد :

الله أكبر قايد السؤ شيخ المشركين = والصحابة فوق راسه ترز أعلامها
حط في وحدة رمل واترس الأخرى عجين = واترك الدنيا تفلم بحلو أفلامها

رجا الله :

وقعت وحدة وطارن ثلاثة وأربعين =والمطوع كب تسعة وعشرة صامها
لو أطيعك في علومك لحقت الأولين = مير مسك مبتداها ومسك ختامها

رشيد :

أسرجت من يدك والله يعين المستحين = الذلول إن عصفت ما لزمت خطامها
لاتعود سالفتنا ياراع القريتين = مثل من سكينها فوق روس أيتامها

رجا الله :

روح جيب الحجة اللي عليها شاهدين = لاتجيب اللي تشيل العرب وخيامها
أنت ذباح الحسن وأنت ذباح الحسين = وأنت نكبة شعب بغداد ياصدامها

المحاورة الخامسة عشرة :
بين الشاعرين / رشيد بن معدي وحامد بن حيا :
حامد :

سلام الله سلامن يعتبر للمعرفة مفتاح =بداية معرفة لأصحابنا وعرفي يكفيني
وألا يابحر ياللي دايمن يغرق بك السباح = تبا تودي ابن مربح غبتك وألا توديني

رشيد :

هلا يامرحبا ترحيبتن تكشف كما المصباح = أغنيها وأهندسها وأحط لها قوانيني
أنا وأنته لنا قسمة ثمينه والرجال شحاح =لكن المشكلة يابو لهب دينك ما هو ديني

حامد :

ألا ياهولتي من عرضة المعفى على الذباح = لياقلت استريحوا قام يتبعني ويدعيني
أنا ديني على سنة محمد وأطلب الإصلاح = وإذا إنك مختلف خلك بعيد ولاتخاويني

رشيد :

تهول ما تهول لاتطيرها بدون جناح = تبا تزعل بحيل الله وتبغضني وتغليني
أنا الملهم وأنا المعطى وأنا الحاوي وأنا الجراح =وأنا ماأطق خشمي تذرفين الدمع ياعيني

حامد :

أنا ماهالني غير أنت مثل السارق المزاح = لياقرب لك السكين نكست الجناحيني
ولا أنته ملهم إلا بالعناد وقلة الإصلاح = ولكن ياقليل الفود لاتغيض المواليني

[سليمان بن رشيد]

المحاورة السادسة عشرة :

بين الشاعرين رشيد بن معدي وفلاح القرقاح :
رشيد :

هلا يامرحبا ياللي حضر من كل فج ودار = أرحب في محل ابن فرج راع الوفا الوافي
بعدها ياصفوف الملعبة نادوا على الشعار = أبي شاعر ليا غنى يدرجها بالأنصافي

فلاح :

عسى فيك البقا ياللي ترحب واجب ومقدار = ومن بيني وبينك ماتروح أرباع وأنصافي
ليا جينا معك يارشيد لازم تتعب الأفكار = عسى ربي يعينك يالمعزب تكرم اللافي

رشيد :

عسى الله ما يهينك ياعميلي والفلك دوار =كذا طبع الشريف لياحضر في حفل ألأشرافي
أبا أتعب واتجهد واتقصى واقبل المعذار = وأنا رجال لي معراف أقابلكم بمعرافي

القرقاح :

لو نطاوع كثير من العرب رحنا يمين يسار = ولكن للرجال أهل الوفا توفي وتستافي
ياشايب لاتتعبني وأنا ببداية المشوار = يقولون السماء ماهو بصافي والسماء صافي

رشيد :

سوالف لو تبقى لو لاخوصة ولامنشار = وأنا ما ابيك تطري لو محرافك ومحرافي
وأنا ماأتعب الصاحب مع الإدغام والإظهار= أحولها على الواقع ويالله سترك الضافي

القرقاح:

ترى لولا الحسد بين العرب ماقلت الأمطار= أنا أظن القضية طال عمرك شرحها وافي
علامك مادخلت البورصة ياتاجر التجار = مادامك شاعر شبعان لا خاسر ولاحافي

رشيد :

صحيح اللي تقوله والحديث بسنةالأبرار = لكن الشعر له تفسير غير بخط جغرافي
دخول البورصة فيها قدا وأخطا جسام كبار = وتالي الوقت قام الوقت علمه يبحث الخافي

القرقاح :

ترى جندي الخفارة لامشى أكثر من ثلاث أمتار = يجازونه لونه جندي صامل ومتعافي
لياراحت جنيهات الذهب لشريطي وسمسار= ولاحصل مراده غير راع المرقد الدافي

رشيد :

تقوله وأنت جندي ماوصلت لرتبة الإمار = لكن راوح وبدل خطوتك قدام وخلافي
عقود الماس لأهل الماس ما يطمع بها السبار =وناس يكسبون الماس ما يطرون الأنكافي

القرقاح :

أنا من فضل رب البيت لاغادر ولابوار = لكن أنته ظنونك خافية ماهي بتنشافي
يقولون الحول يمكن يحسب إن البعير حوار = وجنيهات الذهب ماتنصرف مع كل صرافي

رشيد :

تقوله وأنت كنك طالعن من مدرسة غوار = تهندسها على قافك ولافكرت في قافي
ليا منا تواجهنا وصار البيع بالدينار = شريت الجوهرة من سوقها ماني بخوافي

القرقاح :

ترانا لا عسفنا الصعب طاوع بالطريق وسار = يوالف للرسن والقيد لو ماهو بميلافي
لو أنك هكذا شفناك من عاد الكبار صغار = لكن ماشفتك إلا ها السنة يالصاحب الوافي

رشيد :

ألا يالشاعر القرقاح روح مع طريق القار = لك الله ما أنت عاسف وأنت قلبك يرجف إرجافي
معاني اللعب عند أهل الوفا تبقى علم وشعار = ماتملكها على كيفك تسولفها تسولافي

المحاورة السابعة عشرة :
بين الشاعرين /رشيد بن معدي وفيصل الرياحي

الرياحي :

ياسلامي على الحضار من كل حي = والتحية على الحفلة وعزامها
ودنا نستوي والملعبة تستوي = جعلها عامرة وترفرف أعلامها

رشيد :

مرحبا ردتن تطوي الطواريق طي = وأهل المعرفة دامت مع أيامها
تستوي كان ماعكر على اللعب شي = وأهل المعرفة ما صرت أقلامها

الرياحي :

ياخويي مع المشوار نعم الخوي = قافلتنا مشت والخير قدامها
يتعب الأدامي ما حصل اللي يبي = ليت كل النفوس تحقق أحلامها

رشيد :

يالرياحي تدرج ماعليك وعلي = والطواريق سقها وانشر أفلامها
إن بغيتوا عشية وإن بغيتوا ضحي =ادرجوا والنصارى تعلن إسلامها

الرياحي :

فيه حظ ضعيف وفيه حظ قوي= ليلة القدر ما أقشر حظ من نامها
أنا أقدر علوم البدو وأنت بدوي =والنصارى نصارى تعبد أصنامها

رشيد :

فيه حظ بخيت وفيه حظ ردي = وغرة الشهر تبقى حظ من صامها
ودنا منك علم الزرع وأنت حضري = والبلاد العزيزة بأمر حكامها

الرياحي :

ويش دعواك ياللي تبي تدعي = دام رجليك تمشي راقب أقدامها
الله يلوي لسان الصاحب الملتوي = صحبته ساعتين وتقشع خيامها

رشيد :

اعتبرتك من أهل العرف عالم جري = لأن بدو الجزيرة ماتت أغنامها
اللوى للملاوي والصعب يهتدي = والشهور الحرام نقدس أحرامها

الرياحي :

مامعك علم في الدنيا وماتحتوي = كيف عملاقها يمشي مع أقزامها
البحر معترض من يرتوي يرتوي = والبحر لأهل الدنيا من أنعامها

رشيد :

صاحبي صاحبي لو مذهبه عسكري = يلتزم في حدود الأرض ونظامها
قلت كل الخبر في جعبة الأجودي = وقام يضرب يمن طيبة على شامها

المحاورة الثامنة عشرة :
بين الشاعرين / رشيد بن معدي ومستور العصيمي :
رشيد :

سلا م تسليمتن تمشي بسلم العرب = أقولها والعرب تسمع هناديبها
الليلة الملعبة تحسب حساب الذهب = حفلة شيوخ توقف في مواجيبها

مستور :

يامرحبا ياهلا باللي يسد الطلب = حيا الله الطيبة واللي يجيني بها
الناس يارشيد حطوا للقضية ذنب = أشوف رعيانها تسرح وتضوي بها

رشيد :

فيك البقا يالعميل اللي يفك النشب = أوحيت وأنته لعل أذنيك توحي بها
حنا بعام يقولون العرب به عجب = ونبقى ضيوف تحت حكمة معازيبها

مستور :

النار لابو لهب ياصاحب أبو لهب = لاعاد عينك عن الأقصين تغضي بها
من لامعه سيف في يمناه يضرب ركب = مير الركب مانبي تطلع مضاريبها

رشيد :

إن شبت النار نحسبكم حساب حساب اللهب = أزريت أميز هل الديرة وأجانيبها
ماني موريك يامستور رمي العطب=وأهل الأكاذيب أحاسبها بأكاذيبها

مستور :

الله يعز الرجال أهل الحسب والنسب = اللي لحاها تخلص دون أشانيبها
نبي نبيع الجمال اللي كلاها الجرب = لكن خلك معي قطع عراقيبها

رشيد :

الله يعز الرجال وهيد يابوشنب = تراك في وسط ديرة عاوين ذيبها
مستور شاعر ولكن فيه قلبة عصب = يدري بأمور العر ب ما تقل يدريبها

مستور :

أشوف لي في عيونك باصحيبي غضب = لكنّ ماأدري عيونك ويش أسوي بها
دروب ياهونها ودروب فيها تعب = وأيامنا من يبا يدرى عواقيبها

رشيد :

مادام شفت الغضب ياجب تحل السلب = وتعامل أهل الوفا في نفس أساليبها
البل لياسرحوها حط معها جنب = واللي يصبح بها بكرة يمسي بها

مستور :

نبي نسلمك ابن ردعان وإلا العزب = يسجلون اللحون اللي تغني بها
الصادق اللي صدق والكاذب اللي كذب = معني الروح ماحصل مطاليبها

رشيد :

الله يسلمك يالخطّيب واللي خطب = الملعبة بنتكم ورشيد خطيبها
مادام هذي علومك تو حان الشبب = الناس شالتك يامستور في جيبها

مستور :

ما أنته بدافع مهرها والنصيب انكتب = ليتك تحفظ الفروض اللي تصلي بها
أبا أتوجه على الشاعر وقولوا وجب = العقرب اللي تشيل السم بذنيبها

رشيد :

لاعاد تعتب عليه وأنت تنسى العتب = ترى الفناجيل معروفة شواريبها
جاهك موجب لو أنك ساكنن في حلب = وحنا هل الدار ونميز مناصيبها

مستور :

يارشيد جر العوى والذيب دوبه قنب= ماعاد لك حظ بالديرة وأنا ذيبها
الليل دوب استوى والنور عنك انحجب = ياشيب عينك من الأيام ياشيبها

رشيد :

ليا عوى الذيب في الظلماء يثور الندب = لين الذيابة تعشى من مناديبها
الله غالب وعبد الله كم ينغلب = لكن وين البيوت اللي تماري بها

مستور :

إن كان ثار الندب يبغى يثور اللغب = لكن وثق علمها قبل ترمي بها

المحاورة التاسعة عشرة :
بين الشاعرين / رشيد بن معدي ومستور العصيمي

مستور :

يارشيد الرشيدي طق راسك براسي = واترك الفايدو لمدورين الفوايد
راحوا أهل الختوم اليض وأهل الكراسي = ماتبقى ياكود مطردين الشرايد

رشيد :

مار راس الرشيدي كنه الضلع قاسي = يكسر الراس لو الراس ناقص وزايد
راح دور الصحيح وحل دور العكاسي = وابتلش صاحب النية بكثر العقايد

مستور :

لاتذكرني الموضوع ماني بناسي = مير ماني مضريها للقط الرفايد
في العلوم اختلا ف وبالأمور التباسي = أصبحت في حلوق الناس مثل القلايد

رشيد :

والله إنا نعرفك يالعقيد السياسي = مير تبقى العوايد عند راع العوايد

[سليمان بن رشيد]

المحاورة العشرون :
بين الشاعرين / رشيد بن معدي وعلي الهجلة
علي الهجلة المطيري :

سلام الله عليكم والسلام بداية الأعلام = وبعده من معه علم بعد جينا يجينا به
نبي نفتش ملف أصحابنا اللي من زمان العام = ونظر كتبت حروفه وننظر حال كتابه

رشيد :

لعلك للبقاء لن السلام تحية الإسلام = ومن بعدالسلام اللي معه طاروق غنابه
ملف أصحابكم ثابت ليا من صرت الأقلام =وكان إنك تريدالنار جا للنار شبابة

علي :

أنا ورشيد في الضلع الطويل نركز الأعلام =وباق الناس كلن واقفن وينفض ثيابه
ملفك عارفينه ما يجيه خلاف من قدام = لكن من الجهات الثانية لا ينفتح بابه

رشيد :

أنا وإياك وسط الملعبة يامفسر الأحلام = وباقي الناس كلن يعتزي ويفتل أشنابه
ملفي ثابت بالشرع يتبع سيد الأحكام = لكنك درج المعنى وجا للحق طلابة

علي :

ألا يابعد نزل الساحل الغربي عن الدمام = لكن الله يسهلها وجابة ناطحة جابة
سواليف العرب يارشيد مقسومة ثلاث أقسام = وبعض الناس أظنه مامعه عقل يتلهى به

رشيد:

تقوله لاحادي ولابادي ولاعزام = تدرج بالطريق وصار ولد النمر في الغابة
كثير الناس ممافيه قام يقطع الأرحام = وبه كف يتصبح فيه والآخر تمسى به

علي :

أنا مهتم وأنته لو تلقى لك فراش تنام =وأنا خايف علاك النوم بأتلى الوقت تضرى به
لعله له وليته من يجي في منزلة صدام = يكفخ لان يفلح ثم يضرب به ومشعابه

رشيد :

مادام إنك زعيم الخوف يابو زيد ما تنلام = أجيك ببيت يسطي فيك مخراجه ومضرابه

وأنا بيني وبينك خصمتن تشقى بها الأزلام =على خطين وأنته خوذ ما جاز وتورابه
علي :

أخاف إنك حلمت إنك تبي تطلع من الحكام = وحنا لو رشيد يصير حاكم مارضينا به
ليامنك عرفت أهل اليمن تنسى ديار الشام =وحنا اللي يجينا من تواليك نتوصىبه

رشيد :

عسى ربي يديم الأمن ياقى الفارس الضرغام = وابن عبدالله الغطفان عيا يملك أعصابه
أنا من عادتي ما أكذب ولا آكل عيشة الأيتام = وأعرف إن القدر نافذ على ما أخطاه ماأصابه

المحاورة الحادية والعشرون :


بين رشيد بن معدي وصياف السحيمي .
صياف :

يارشيد يارشيدعطني علم وإلا خبر = بعض المخاليق لاحية ولاميتة
يازين مشي الفياض وزين مد النظر = هذي تقوم الصباح وهذي مبيتة

رشيد :

القيض حامي ولابالقيض موسم مطر = والرجل تحسب ذنوبه في حسب نيته
الأمر لله وطيع أمر ولي الأمر = وأحدن حسانيه ماغطت على سيته

صياف :

لقيت لي في جبال طويق جرة كفر = واللي نظرفي سماه تطيح طاقيته
أنته نفخت الهوى وأبعدت عنا البحر = ماباقي إلا الوليد يمسح لحيته

رشيد :

حنا على سنة محمد وبكر وعمر = واللي براسه جنون تموت جنيته
ما باقي إلا يجيك المهدي المنتظر = ياويل قلبك ليافتشت برقيته

صياف :

الحبل موجود ما أدري طال وإلا قصر = لابارك بذاك الورع ووخيته
يالله لعل الشجر يمطر ويطلع ثمر = ويسلم الدار من زوارطرقيته

رشيد :

الصبح ياتيك مرين يقص الأثر = ويسوق متروك يم ديار تركيته
صياف عنده علوم من كبار العبر = رشيد ماعنده إلا خشم جنبيته

صياف :

أنته مثل صاحبي لو أن شعرك حمر =وأنا ما أبا الجحر لادابه ولاحيته

المحاورة الثانية والعشرون :

بين الشاعرين رشيد بن معدي وصياف الحربي :

صياف :

من هو اللي يسج الجيش ثم الخيل = انتصف ليلنا ورشيد ما شفناه
ياحليل السحاب ليا طلع له سيل = كل واحد يجي عنده ويشرب ماه

رشيد :

سجة الخيل للعوارف ويل = مير أجاوب مغنيها على معناه
والمطر لو يطيح عصير وإلا ليل = الضعيف يحدونه على المضماه

صياف :

ارفع يديك فوق إن كان عندك حيل = وازهم فلان ثم فلان لاتنساه
يذكرون أبرهةغازي بظهر الفيل =مار ياكثر حذفه بالحصى كثراه

رشيد :

رفعة يدي تعدم جيل بأثره جيل = يوم كلن على بيره يمد رشاه
لاتحدث علي بمحكم التنزيل = ثم تاطا الحنش ويروعك ماطاه

صياف :

من هو اللي قرا التوراة والإنجيل = يوم بعض العرب ممنوع مايقراه
أنت محظوظ تاكل من فطاح الحيل = مار حنا حرامن حرم ماذقناه

رشيد :

جابها واحدن حربي بحد هذيل = مير ما أدري لوأنه راح للمنفاة
وأنت شاعر وتاكل من حبوب الهيل = يحتسي الهيل والمسمار في مخباه

صياف :

لاكحلت العيون انظر مع الدربيل = يمكن إنك بعد كثر التعب تلقاه
ما أقدر أقولها تراك رجل حليل = بس ماترقد إلا وسط بطن الشاة

رشيد :

بعد بكرة تحللها على التسجيل = ثم تعرف تنحيتك مع المنحاة
دام مانته بقادر حطها وتشيل = مير أقدر معيض اللي معاه الجاه

صياف :

أنت يابو حنيك أتعبت جيش عقيل = قافلتنا لا تقطعها مع المثناه
لو تكثر دموعك ما معك منديل = مار خل البشر كلن على دعواه

رشيد :

الله أكبر تدربيتم بوجه الريل = يوم صياف عمست من عليه أرياه
مير بالله دوبك لاتزيد الكيل =أنبش القبر وأحطك تحت مرساه

[سليمان بن رشيد]

المحاورة الثالثة بين صياف السحيمي ورشيد بن معدي .

رشيد :
في محل أهل الوفا وأهل الوفا يحمد ثناها =ورثة الفرسان يعرف مجدهم بأول وتالي
ياهلا يامرحبا ترحيبة يوضي سناها=في المسير والضيوف أهل الكرامة والأهالي
صياف :
في محل اهل البيوت إلي يذرينا ذراها=البقا لك يالمرحب بين الاقصئ والموالي
الديار الطيبة تمطر ولايصحي سماها = يوم جيناها جماعةمالقينا البيت خالي
رشيد:
يالعلك للبقاء والسالفة في مبتداها = وأنت صرفها وحرفها على مر وحالي
يوم جيتم بالبيوت اللي رفيع مستواها =إن وقتم غروبي وإن وقتم زوالي
صياف :
ابتدينا باول الطرقة ونعرف منتهاها = ثم بأمر الله نروح كلنا والكل غالي
السباع الشهب تعوي لين تقرب من عشاها = وأنت لو أعطيك ثلثيت السوالف وش بقالي
رشيد :
يرمي الرامي ولايرمي لكن الله رماها =والقمر يبدي هلال وثم يكمل في هلالي
والسباع تلجّ بالأصوات ماتلحق مناها = وأنت لو تضغط بمال آدم ماتاصل راس مالي
صياف :
خل راعية الرحى تطحنلك الحب برحاها = ما أنت أبوي ولا أنت أخوي ولا أنت واحد من خوالي
يارشيد بن معدي تعرف الشمس وضحاها =انتبه لاتبتدي وتروح وأقراها لحالي
رشيد :
الرحى بقعاء وبقعاء سيفها داخل جواها = لوّ أنا ماقلت يمديني علي السيل سالي
اضرب الدرب السليم وخل معك أسوة لطاها = مستعد أصرف جوابك فالجنيه وفالريالي
صياف :
ياكثر من مد كفه للكريم ولاملاها =نوب يصغيها يمين ونوب يصغيها شمالي
البضاعة نزلوها السوق والتاجر شراها = والشرود العاصية ماعاد تمسكها الحبالي
رشيد :
هكذا طبع الليالي والليالي في صباها = لاتبيعون الرحال ولاتشدون الرحالي
والبضايع ضرها بالسوق من فعل عملاها = يتركون أغلى جواهرها ويشرون الخيالي
صياف :
لاتمشى في الجبال ولاتعثر في حصاها = شافت الدرب الوسيع وسافرت ياهملالي
أنت وش بك تأكل التمرة وتعطيني نواها = خلها حملة وسهلة ياغناتي ياحلالي
رشيد :
أتمشى بالجزيرة وآزن الرجل بخطاها = ماعلي من السحيمي لو يصيح ولو يلالي
أبشروا في تمرة ما عاد يلحقني جزاها = وإن ماكفتكم التمرة يجي معها عقالي
صياف :
أكثر العربان لو يقدر على الحية شواها = يامخيلة البروق اللي تلوح بلاخيالي
ياكثر من ياصل الهضبة ويرجع ما رقاها = عقب ضلى يصعد الضلع الطويل ولايبالي
رشيد :
أنت ياراعي المدينة والمدينة في زهاها = لاتحاول تختل العربان صعبين المنالي
وأنت من ناس عزاز وياعسى الله يهداها = لاتخرقون السهال ولاتعدون الجبالي

صياف :
أنت ياراعي الحليفة والعلم واللي وراها = لاتمد يديك بالظلما وتاكلك الجمالي
أنت من ناس تبى المكسب ولاربي عطاها =نوب تلقاها خفاف ونوب تلقاها ثقالي


المحاورة الرابعة :


محاورة بين الشاعرين رجا الله المحمدي ورشيد بن معدي :

رشيد :
سلام يامحفل أهل المجد وأهل الوفا=رديتن يقدح الكبريت بأطرافها
ياصاحبي يارجا الله عرفنا بك كفا = مفتاح بيت القصيدة وزن محرافها
رجا الله
يامرحبا وسط حفلة نورها ما طفى =من مرها شافها من مرها شافها
البحر دوبه صفا والجو دوبه صفا =لكن نية رشيد أخافها أخافها
رشيد :
لك البقا وأشكر أهل الحفل واللي لفا =أهل الوفا ماأقرض أسهمها ومعرافها
وأنته من الشك والهوجاس قشعة شفا=تومي من النود وعصار الهوى لافها
رجا الله:
سعود ثوبه ضفا ورشيد ثوبه ضفا = والخير والشر قدم الناس وخلافها
الظن والشك لايشقيك خله قفا =تبغى ترد غبة الأمواج وتعافها
رشيد :
رشيد ضاري لرجم بليس بالموقفا = وسعود لن جاته الصعبات عسافها
تو ابتدت ياخوي مقيط بالمزلفا = الحذفة الطايشة ترجع لحذافها
رجا الله :
الحمد لله والأيام بردودفا = جنيته رشيد من قبل أمس بكتافها
ياكم ياكم نجمن بان ثم اختفى = يامثبتن روس خلق الله على أكتافها
رشيد :
رجليك والصمد يامصودع يجيك الحفا = لاتصير في قبة مسيلم وتطافها
أنا أدري إنك تبا المخراج والمصرفا = مير الخزينة ذهبها بيد صرافها رجا الله :
رجليك والنار يامرضان تبغى الشفا = العاصفة لاتطير عبس ولحافها
العود هذا مهول قر وإلا نفا =يرضي خبول العرب ويحارب أشرافها
رشيد:
إن هبت الريح هوجا رحت مثل السفا = والله لا أغني على الحربي بجغرافها
والله لا أحدك على الضيقة وصم الصفا = وتثور بندق عيل وتصير لقافها
رجاالله :
تقولها وأنت شايب ميت ملحفا = مكتوب مكتوب مع حايل مع أوقافها
يالشايب مكتفا يالشايب مكتفا = بكتاف جنيتك وكتافك كتافها
رشيد :
تقولها وأنت نايم ملتحف شرشفا= لكن وش ها لمصيبة وش تشرشافها
ياصاحب المعرفة وش علم رميك هفا = الله يخلف على الحبلان وأسلافها
رجا الله :
لابارك الله بشايب عبس لاخرفا= ينفخ على الالناس لين يضيق محرافها
لاقلت يارشيد علمن شين قلنا جفا = ما يختلف سيف عزوتنا وسيافها
رشيد :
الله يبارك بشايب حرب لا ذرفا = إن وايق البير حول قبل غرافها
أنا أدري إنك شنيف المنشنف شنفا = لكن أا نيك نربطها بمشنافها
رجا الله :

اللي مضى لي كفا واللي مضى لك كفى = أنا على بيرها وأنته على أردافها .

[سليمان بن رشيد]

اقتباس من مشاركة المقوعي يامعين المسلم اللي علـى الدنيـا صبـور=يامجيبـا للـدعـا ياشـديـد الانتـقـام الذنوب تداهـم النـاس والتوبـة طهـور=والأمـل بالله رهبـة ورغبـة واعتصـام واحتفظ بأركان الإسلام يا العبـد الشكـور=من تشهّد حج وأزكى وصلـى ثـم صـام والكريم معان والمؤمـن الذنـب مغفـور=والشجاع الله منجيه من ضـرب السهـام وسيرة أهل المجد تروى وأهلها في القبور=كنهـم حييـن ولهـم معـزة واحتـشـام ويعلـم الله ماتكـنّ الخوافـي بالصـدور=وانتشيت بعشق الأطلا ل وأذكـار الغـرام يامعالي وادي المجد من ماضـي العصـور=ياعسـى ينهـلّ فوقـك هماليـل الركـام من حقوق الوسم والغيث جـلاّي الدهـور=بارقه ياضي وودق الرعد يصحـي النيـام مدة أربع طعش ليلـة وهـو نـوٍ جسـور=يلطم الجيلان سيلـه ومـن فـوق العـدام من قرى الحرة لوادي الثمد مثل البحـور=والروافـد كلـهـن سـايـلات بالتـمـام وامتلت بالسيل كـل المحانـي والحفـور=ثم دوّر دربـه اللـي قبـل تسعيـن عـام واتجه وادي الرمة مـن معاليـه بحـدور=ومرّ بالباطن وفيّض جنـوب عـن سنـام وأخضرت كل الروابـي بنبتـات البـذور=واشتبك نبت النفـل بالريـاض وبالوشـام وأشرقت شمس الربيع وتفتحـت الزهـور=واسطعت في جوّ مابه عجـاج ولاعسـام واختلط صوت أم سالـم بتغريـد الطيـور=فوق عشب وصف نبته بوصف بروج شام واستوى طرد الحباري وتجريـب الطيـور=الحـرار اللـي بتدريبهـن فـنّ ونـظـام وربعت ديرة بني عبس وافيـن الشبـور=منبع المجـد الحقيقـي ومدهـال الجهـام من شفا الكورة لساق الجوى حـدّ مخبـور=في مضارب عبس تسكن بني عبس الكرام يوم وقت السلب والنهـب والـدم مهـدور=محتميـن حدودهـا بالبنـادق والحـسـام في نهـار فيـه صيحـات ودمـيٍّ تفـور=والنقا مـردود يـوم المثـارى والخصـام تسمع الفرسان تزجر مثل زجـر النمـور=ووردوا أهل الخيل للموت ميـراد الحيـام ليا انتهت فتنة معَ قوم مـع قـوم تثـور=ورجحت كفة بني عبس في لبس الوسـام نصف قرن ومشكلتنا مـع الغبـرا تـدور=قاتـل ومقتـول بيـن المخولـة والعمـام واعتزينا في رشيـد وحمـا كـل الثغـور=وصار رئيس عبس في حرب وإلا في سلام في السليلة حرب الأتراك أخذ ستة شهـور=وانتهى في كسر قـوات مدهـون العظـام ولاحكمنا السمبسي والمغامـس والجبـور=وغيرهم كم من غزانـا ولا حصـل مـرام رغم ذاك وذاك ومقارعة حـدب الظهـور=ما تضعضع عزمنا زاد نـا قـدر ومقـام وملحمتنـا بالوفـا بحـر جمـه مايغـور=من خلقنا الله على العـز بانيـن الخيـام بالشجاعـة والكـرم والمـروة والبـرور=والوفا للجـار والضيـف نقريـه الطعـام والرشيدي تاج راسي وأنا باسمـه فخـور=لـو تبعدنـا مسافـات مـا فينـا انقسـام مانقـول بعيـد وقلوبهـم معنـا حضـور=القبيلـة تشتـرك بالأسـى والابتـسـام بالكويت النـا مناصيـب وشيـوخ وجـذور=ومجـد خالـد بالمعـارك ومجـد بالنظـام وقسم منا فوق الأمواج سوى لـه عبـور=وحط رحله في سواكن وحـارب واستقـام وراينا واحد وراع الخطـا ماهـو معـذور=وبأمـر قادتنـا الأفاضـل يتـمّ الالتـزام والقبيلة في صلة مجـد والزايـر يـزور=وكل شيخ مـن القبيلـة لنـا قيّـم مقـام وكلمة أهل المجد والمجد ما هو بمحصـور=ولقبايـل بالجزيـرة لهـم كـل احـتـرام ومن يذمّ أهل الوفا رجل ناقص ومحقـور=ذمَّة أهل المجد بالشـرع بهتـان وحـرام ولا يضر العلم ثور ورث لـه علـم ثـور=الحديـث بغيـر مسنـد كـلام فـي كـلام والقبايل قاطبـة ماحصـل فيهـم قصـور=كـل قـوم تدحـم القـوم بفعـول جسـام والجهـل كلـه ظلمـات والقـرآ ن نـور=الكتاب اللـي منـزل علـى سيـد الأنـام وانتهى عصر الجهل وابتـدى للعلـم دور=وأجمعوا في طاعة أمر الإمام ابـن الإمـام والقبايـل كلهـم بايعـوه بـلا غــرور=وصار أبو تركي كما النور جـلاي الظـلام قادهم صقر الجزيرة على حكمـة وشـور=وأيـده ربـه بنصـره لتحقيـق الحـلام وحّد أطراف البلاد وبنـى للمجـد سـور=وقال أنا خـادم لطيبـة وللبيـت الحـرام وحكموا بعـده عيالـه وزاد النـور نـور=وعاش شعب المملكـة بالمحبـة والوئـام والسعود ملوك الإسلام من بيـت معمـور=وأبو متعـب للبقـا والمؤسـس للرحـام يامليـك الأفئـدة والخواطـر والشـعـور=طال عمرك يابـو متعـب لنـا دايـم دوام ونا يبك سلطان يمناك فـي كـل الأمـور=قايد الحرب المخضرم وشعبه مـا يضـام والرسالة من قـلادي ليـا سالـم سـرور=شيخ له عزوة وسطوة ليـا شـدّ الحـزام ابن سمرة له مواقـف ومجـد مـا يبـور=يفهم التاريـخ والشعـر يعطيـه اهتمـام ياوسيع العرف ياعارفـة عبـس الغيـور=الحقيقـة بالمواقـع بهـا شبـه انـعـدام والرجال لها مراجع عسـى ماهـي دبـور=مايبيعـون القيـم بالتهـكـم والشـتـام وإن ما جاء الأمر شورى تفشى كـل زور=وأنـت أبوهـا سمهـا والمعـدي مايـلام انتهى الموضوع وسطور تحكي عن سطور=وأذكـر الله بأولـه وأشهـد الله بالختـام

القصيدة بعد تعديل الأخطاء الإملائية .

[سالم سلمان بن معاود]

السلام عليكم ورحمة الله وبركاته
الحمدلله رب العالمين والصلاة والسلام على أشرف الأنبياء والمرسلين,,,,,
أتقدم بالشكر الجزيل وأعظم التقدير للأخ الفاضل الكريم سعد بن عادي أبن حمد لمابذلة من جهود فعالة وعالية ومن الخطاء الموفقة بأذن الله تعالى لأستضافتة لشاعرنا الكبير وعلمنا الشامخ رشيد بن عنيزان بن معدي بن حمد وكما أضيف ترحيبي الودي والصادق بشاعرنا رشيد بن عنيزان وأرحبة كل الترحيب وأهلا بشاعرنا الكريم ,,
والسلام عليكم ورحمة الله وبركاته