ضــع اعــلانك هنا
 |
الملاحظات
|
|
خيارات الموضوع | ابحث بهذا الموضوع |
|
|
 يـارب تهدينـي بلطفـك للصـراط المستقيـم عفت الطريق الملتـوي وأقـدام رجلـي ملّتـه يا أجود جواد أعوذ بك .. وألوذ بك يا أكرم كريم قلبـي مبلـلّ بالخطـا والنفـس زادت بلّـتـه أنا اشهد أنّ لا إلـه ألاّ أنـت رحمـن ورحيـم وأنّ النبـيّ المصطفـى عبـدك وتابـع ملّتـه وهبتني نظم الشعر وأصبحت في الوديان أهيـم من هاجس ٍ عرّض على صفق الهبـوب وتلّتـه يجّرنـي وأخـاف يرمينـي لسانـي بالجحيـم أرجـوك يـا ربـيّ بغفرانـك تسامـح زلّتـه في كل ليل .. أبليس يجمع لي من الذنب العظيم ويحطّهـا فـي سلّتـي وأردّهـا فـي سلّـتـه وأكثر ما يربكني و يكسر عزمي عيون الحريـم وأنا معي سيف ٍ يذلّ أطلق شنـب مـن سلّتـه أستغفرك وأنا الضعيف اللي من ذنوبـه سقيـم يدوّر التوبه عسـى التوبـه تـداوي علّتـه ! |
|
|
 ياقلبي لك شهر لا انته بلا ميّت ولا انته حي
تلاوعك الضروف وتلحق الونه ورى الونّه ! شغلت الفكر وازعجت المحاني وانت وضعك سي ولا لك فضل في ماصار فيك ولالك المنّه ! ماتشكي من صواديف الغرام ومن دروب الغي عليك الله وامانه والقدر ماعنّك وعنّه ! تعبت ومعك عنيّت المشاعر والتعب منسي وهاجوس القصيد يضيع كله لا اختلف ضنّه ! سلامة قلبك الطاهر وعمرك ياحياة الحي سلامة روح من تحيي الفروض وتحيي السنّه ! عسى عمرك طويل وباقيه دايم ظلال وفي ولاتشكين من لفح السموم ولاهب الكنّه ! وعساك ابخير وايامك فرح والله يديمك لي وانا فدوة ثراً رجليك بالاقدام ياطنّه ! ياكثر اللي يبا يفقدك لانك في سمانا ضي وياقلّ اللي بماسويتي امثالك يسونّه ! غياب الام يطوي حالة ابناها لاغابت طي نساء الارض طول وعرض والله مايسدنه ! ياويلي كان حظي ماكسب لي من رضاها شي وانا دوّر تحت ماطا قدمها بارد الجنّه !! |
|
|
قالوا أنّ الحرّ .. يفهـم بالاشـاره
مير طير البحر يفهم ويش هوبـه كل ما يحرف على الساحل مساره أنحرف ظله ومالـت بـه جنوبـه ينفرد صدره من أسبـاب الحـراره وينكمش ريشه من أسباب الرطوبه أن حذفته .. خابره ضنوة خسـاره وأن تركته .. ليه ألدّ العين صوبـه أقبـل .. ودبّـر بلفّـه وإستـداره والهوى مع كسرته هبّـت هبوبـه ما يغيّر نظرتي .. وانا اخو سـاره لو يطير بثوب ثانـي غيـر ثوبـه مخ راسي ما تزعزع عن مـداره يوم فكّـر بالصدوقـه والكذوبـه من يساويني بالاسماء المستعـاره علّموه أنّي على الواقـع عقوبـه أبدوي ٍ ما يعرف مـن الحضـاره غير جوالـه وشاشـة لاب توبـه كل ّ مرّ .. يعارضـه زاده مـراره وكل َ عذب .. يباشره زاده عذوبه ! |
|
|
رومانسيّة .. وحساسه .. وفيك من الجمال فنـون
ملامحـك الفريـده بالـحـلا والمـلـح فنـانـه وطبعك هادي.. ودمك خفيف.. وهرجتك بالهـون لا غردتـي بصوتـك راح قلبـي يعـزف ألحانـه على معزوفة أنفاسك.. تقول أنّ النّسـم مـوزون زفيرك لا أرتفع خانه .. شهيقك يرتخـي خانـه ! عليك رموش صف جيوش .. تحميك وعليك عيون خطيره من نـوى يدخـل بحرهـا يلبـس أكفانـه تسافر بي ليا ناظرتهـا .. خـارج نطـاق الكـون أقول أصحي .. وأنا واعي وهي خـدره ونعسانـه تواصيفك تخلّي كل شاعـر مـا يعـرف شلـون يصب مـن الحـروف الابجديـه حبـر وجدانـه أشوف الناس وأميّز ما بيـن الشيـن والمزيـون ولا شافت عيونـي فـي حياتـي مثلـك إنسانـه رميتيني في دوامـة غـلاك الطايـش المجنـون وأنا عاشق خجول ويستحـي قلبـه مـن لسانـه أحبّك .. والمحبّـه مـا تمـوت وسرّهـا مدفـون عسى ربي يصونك من سهوم ابليـس وأعوانـه |
|
|
يـا رب لا تغيـر علينـا وحنـا
من دونك ضعيفين يا رب وصغار أنت المعين اللي بعطفـه ضمنـا منجاتنا من شدة الوقت لا جـار |
|
|
عليك الغلا منساب .. يا أمّ الحلا والزين جمال العذارى بإسمك .. حزامه وتاجه .. وزينك طبيعي بالمساحيق وش تبغين ما يحتاج .. للمكياج منتي بمحتاجه .. كريم الأساس وحمرة الفم وكحل العين ترا اللي مصنّعها ما يعنيك بإنتاجه .. خلقك الولي فتنه ومن تحتها خطيّن يا كثر البنات الليّ عطيتيهن الصاجه ! .. تحيّرت في وصفك وفكّرت أجيك منين وخفت الحسود يمرّك ويعقد حجاجه .. نزيهة جناب ولا تسولف بك الواشين ولا أنتي في سوق القيل والقال دوّاجه .. أحبك وقلبي ما عطاك المحبّه لين وقفتي على بابه ورحتي بمزلاجه .. أدسّ المشاعر عنك وانتي بها تدرين ومن دونك الدنيا ما تسوى ولا حاجه |
|
|
خلّ السياسه تستعدّ وتستريح وتستدير
يا موجز الأخبار سلّم لي على تفصيلها ، مانيب يمّ اللّي حصل واللّي بعد يمكن يصير جوارحي مشغوله بمنتوقة ٍ تومي لها ، الجادل اللي تلّني لعيونها سلك الحرير قامت محاجرها تحاصرني وتسرج خيلها ، أفرد لها صدري وأقلّـطها على الضلع القصير حطيتها بين الضلوع ولا قدرت أشيلها ، الله خلقها عن بنات الجيل فيها طبع غير والطبع خلاّها بعيني فارقه عن جيلها ، بالشكل والمضمون فازت ربّة الحسن المثير واللي تنافسها على عرش الحلا يا حليلها ! ، أحبّها .. والحبّ مستكبر وأنا قلبي كبير يمنعني أحكي عن غرابيل الهوى وأشكيلها ، أخشى عليها من زمان ٍ فيه شرّ وفيه خير وأخاف منها بين عدلات الليال وميلها ، إليا عرض لي طيفها خبيّت مكنون الضمير وغمضّت عيني ثم نطقت بهمس .. يا حبيّ لها |
|
|
تفضّل يا حبيبي وأدخل بقلبي .. وصكّ البـاب بسط لك كلّ دقاته .. وجاتك بآخـر أخبـاره لا تزعل لو تحصّل بين نبضاته بقايا أحبـاب عطاك الضوء الأخضر تبحثه و تفتّش أسراره يحبّك .. والعلاقات القديمه فصّ ملـح وذاب تلاشت .. لا تحاسبني عن الماضي وتذكـاره على رسلك وأنا شاعر مزاجي والهوى غلاب ما يتركني في حالي لين أغنّي له على أوتاره حبيبي لو تكرّم في عيونك سجّـل الإعجـاب أغازل كحلها تاره .. وأقاوم رمشهـا تـاره رمتني في بحرها وأن رسيت بساحل الأهداب غشاني موجهـا والحـب يدفعنـي بتيـاره يقولون العرب ما للمحبّه والغـرام أسبـاب وانا أقـول المحبّـه والغـرام أسبابهـا (!!) !
آخر تعديل بواسطة سعد بن عادي ، 14-06-2011 الساعة 10:34 PM.
|
«
الموضوع السابق
|
الموضوع التالي
»
| يتصفح الموضوع حالياً : 3 (0 عضو و 3 ضيف) | |
|
|
مواضيع مشابهة
|
||||
| الموضوع | الكاتب | القسم | الردود | آخر مشاركة |
| إهداء لكل رجل ! | كبرياء امراة | المنتدى الأدبــــــــــــي | 8 | 26-06-2013 09:54 PM |
| إهداء إلى كل شخص عزيز | مناورالعويمري | المنتدى الإسلامـــي | 24 | 11-12-2012 09:14 PM |
| سائق يترك معلماته على قارعة الطريق بعفيف | عليان علي | المنتدى الإعلامــــي | 8 | 15-02-2012 01:14 AM |
| إهداء إلى ولد الجزيرة .....~{ | الغريبة | منتدى الصوروالفيديو والسفر والسياحه | 9 | 30-11-2009 09:54 PM |
| إهداء لك رشيدي | شاعر حرب | منتدى الشـــعــــر | 16 | 24-06-2008 09:19 PM |
الساعة الآن +4: 01:17 AM.
جميع الحقوق محفوظة شبكة بني عبس
