[سعد بن عادي]

.
.

هنا "نور الخشوع وسلوة الايمان" منه و فيه
يحث الخلق ما ترجو ثوابـه عنـد خالقهـا
هنا يستانس اللي ريح ضلوعه سلام يديـه
هنا الساعة تمر ارواحنا با اغلـى دقايقهـا
هنا حي الجباه اللي تطيح لوجه من ترجيـه
هنا حي الدموع اللـي لوجـه الله نعتقهـا

.
.
.

[سعد بن عادي]

ياتركي ان كان مايرضيك يرضينا
رجاحة العقل في الرجال من ثقله
لونسمع الناس ما رحنا ولاجينا
الناس تنقل كلام وتفخر بـ نقله

واللي تشوفه ليا اقفينا .. حكى فينا
لايخدعك فيه لا قلبه ولا عقله
موج البحر لو درى عن قيمة المينا
وقف له إجلال ياتركي وصفق له

[سعد بن عادي]

سبحـان ربّ الميّتـه والحيّـه=اللي عذابـه يسبقـه غفرانـه
رب ٍ تعالى وأعتلـى كرسيّـه=والكون كان بحكمتـه سبحانـه
ندعوه في وقت ٍ غشانا غيّـه=يضفي علينا عفوه ورضوانـه
الشرّ .. شات الكوره الأرضيّه=والخير .. قفّل دونهـا بيبانـه
وأحداثهـا خيالـه ورجلـيّـه=منها قنوات الفضـاء مليانـه
الظلـم فجّـر قنبلـه ذريّــه=و العدل عيّـا يعتـدل ميزانـه
طاحت وقامت ثـورة الحريّـه=والشعب دك الشارع بعصيانـه
أحد ٍ .. يقول مظاهره سلميّـه=وأحدٍ .. يقول موامره خوّانه !
والأمن بين الذيـب والجنيّـه=لا أوحى قنيب الذيب زاد إجنانه
و ناّنـة الإسعـاف والدوريّـه=في كل ليله فـي البلـد ونّانـه
ثار الرصاص وناحت القمريّـه=وطير السعد ضيّع جميع الحانه
والكارثـه بالنشـره الجويّـه=كنّ الغيوم من البشر زعلانـه
أمـا تجينـا عاصفـه رمليّـه=وإلاّ يناولنـا الجبـل بركانـه
مخطوف لون أحلامنا الورديّـه=والواقع الملموس شهب ألوانه
ترمش عيون الطفـره النتيّـه=وتجرّنـا بعيونهـا الفتانـه !
وكلّ السبايب من خراب النيّـه=قلوبنـا فـي غلّهـا بلشانـه
يا مراجعين السيـره الذاتيّـه=الطيّب اللـي محتفـظ بإيمانـه
لا تشطبـون الكلمـه العفويّـه=اللي كلامه صح .. صح لسانه

[سعد بن عادي]

صحيح الحبّ الأعمى خالقه ربي بدون عيـون=لكنّي شايف اللـي فيـك يـا خلّـي محبّبنـي
نزاهة روحك و ندرة وفاك وعرضك المصيون=وطهارة قلبك وسطـوة حـلاك اللـي معذبنـي
وذكاك ومنطق أسلوبك لا سولفت بغلا مجنـون=هذا غير الوصوف اللـي مخبيّهـا وتعجبنـي
أنا ما ودّي أبحث في خبايا الشكل والمضمـون=أقول المختصر .. كلّك على بعضـك تناسبنـي
أناظرك وتناظرني ونظـرات العيـون تمـون=لا قمت أسألك بعيوني .. وبعيونـك تجاوبنـي
أحبّك كثر ما قلبي يـدق وخاطـري مشحـون=وأحّبك كثر ما طيفك علـى طاريـك يجذبنـي
وأحبّك كثر ما شابت من لحون الغـرام لحـون=وأحبّك كثـر مـا تقرانـي عيونـك وتكتبنـي
رميت بفلسفة عشقك على سقراط وافلاطـون=ولا فكوّا رموز ٍ في غرامـك بيتهـا مبنـي !
تغيب ويمتلي صدري من الشوق ويضيق الكون=تقول أنّك مـع غيابـك عـن الدنيـا مغيّبنـي
أخذني معك يا سيد الحبايب لا تقـول شلـون=على كف المحبّه ودّني فـي قلبـك وجبنـي !
لا تتركني تحت رجوى وصالك والجفاء ملعون=عقوبه .. مالي ومال العقوبـه .. لا تعاقبنـي

[سعد بن عادي]

يا بنت فكري سمّي وقومي .. وسيري للأمـام=الخلف لأهل الخلف وانتـي بالوفـاء متقدّمـه
دربك سليم ومستقيم وهاجسي معـك أستقـام=بينك وبينـه حبـل ميثـاق العهـود المبرمـه
الله يبيض وجه من يتعب علـى خيـر الكـلام=والله يسود وجه من يفتح على الفاضـي فمـه
ما شابت عيال الحلال إلاّ مـن عيـال الحـرام=أما الحـرام تحللّـه .. وإلاّ الحـلال تحرّمـه
هبـت ذعاذيـع الريـاح الموسميـه بإنتظـام=ولاني من اللي كلّ ماهبّ الهوى ضاق إنسمـه
شاعر وقلبي كم يغيض ويمتلي حـبّ وغـرام=هاذي ثلاث عقود في صدري ما غيّر سستمه !

[سعد بن عادي]

واهنـي ّ اللـي ضمـيـره مستـريـح ولا تعـنّـا=مـا يحطّـه بيـن دورات الـزمـان ولا يشيـلـه
يصبح ويمسـي .. ويلقـى فـي حياتـه مـا تمنّـا=تحتـه الفرشـه حريـر .. وفوقـه الفيّـه ظليلـه
والله أنّـي يـوم أميّـز وأتفـكّـر فــي زمـنّـا=كثروا أصحاب الفضول .. وقلوّا أصحـاب الفضيلـه
التطـوّر يـوم جــاب التقنـيـه مـنّـا ومـنّـا=ولّعتنـا ليـن سلّمـنـا عـلـى خـشـم الفتيـلـه
وشبكـة النـتّ الكبيـره عقـب حلّـت فـي وطنّـا=عنكبتنـا وإنكبتنـا .. مـن فصيلـه فـي فصيلـه
نجتمع فـي الشاشـه اللـي نورهـا الساطـع فتنّـا=وطاولتـنـا مستـديـره والكـراسـي مستطيـلـه
أبتدت غـزوات الانتـر .. وأنتهـت غـزوة مهنّـا=مـا نريـد الغـزو الاول عقـب ورّدنــا بديـلـه
يوتيوب .. وفوتوشوب .. وفيس بوك .. و يا الله إنّا=في رجاك وفي حجـاك عـن الفضيحـه والفشيلـه
القبيلـي يـوم شمّـر عـن ذراعـه قــال حـنّـا=مـن زحـول العولمـه لـو يذبـح سلـوم القبيلـه
قفّـل الغرفـه عليـه ودردش وفـرفـش وغـنّـا=وقـام يرقـص للعلـوم الخاثـره ويـشـدّ حيـلـه
شيبت في نصف راسـه .. صـورة الكـف المحنّـا=وشيبّت في النصف الآخر صـورة العيـن الكحيلـه
من برب .. لبـاك ولكـم .. شامنـا صافـح يمنّـا=هكـذا عـاش التواصـل بيننـا بأهـون وسيـلـه
يـا محـرّف بالحقايـق لا تــردّ العـلـم عـنّـا=يـوم قلـت الذيـب عـوّد يومـي براسـه وذيلـه
نتبـرّا مـن بـلانـا .. والـبـلا فيـنـا ومـنّـا=ونتـذرّا فـي خطانـا .. والخطـا نخلـي سبيلـه !

[سعد بن عادي]

ايه يانفسي من ( العز ) اشبعي
والله اني ماتركتس ( للرخو ) !

فيه ناس امن الغلا تاقف معي
بس مهما كان مامثل [ الاخو ]

[سعد بن عادي]

انكسار الذات في بعـض الامـور
لـو تطيـع النفـس ذلـه ذلّـهـا
كل يوم اعيش ب.. احساس وشعور
وادخـل ديـار الغـلا واحتلّـهـا
لين عفت العيش مابيـن السطـور
ورحـت ادور حـل يشبـه حلّهـا
انهـدم بيـت القصيـدة دور / دور
وليت هـدم الحـب يشفـي غلّهـا
الزهور تموت في عمـر الزهـور
لـو مراويـح السحـاب تعلّـهـا
رحت احط لقلبي المجـروح سـور
واخلـق الزلـه عبـث وازلّـهـا
والشهادة في وفـا الاحبـاب زور
والمحـبـه مايظـلـل ظـلّـهـا
مابقـا فـي ظلمـة الايـام نـور
ولا غـرام ولا سيـوف اسلّـهـا
ياشعـوري لاتـلـف ولاتــدور
اكتفيـت مـن المحـبـه كلّـهـا