[سعد بن عادي]

يا وسع صدري مير للضيـق مرهـون=وأن ما توسّـع كلّـه .. يضيـق كلّـه
يمشي تحت رهن الإشاره على الهـون=وترمي عليـه مـن السلـوك وتتلّـه
وسلوكها ما بيـن ناشـف ومدهـون=وصـدري ليـا قامـت تلامـس تعلّـه
أحيان أجامـل وأتـرك السـدّ مدفـون=وأضحك مـا بيـن الخطّـر المسفهلّـه
وأحيان أجي مشحون .. وأروح مشحون=وأقـول مـن يعقـد حجاجـي يفـلّـه
ثـلاث تحكمنـي ولا قلـت وش لـون=المعرفـه .. والعاطفـه .. والجبـلّـه
العقل صاحـي لكـن القلـب مجنـون=والكـل منهـم نظـرتـه مستقـلّـه !
يـا صاحبـي مـا للمحبيّـن قـانـون=والحـبّ لغـز .. ولا عرفنـا نحـلّـه
قلبـك مثـل قلبـي مكبّـل ومسجـون=أحـرار مـيـر قلوبـنـا مستحـلّـه
عسى الغـلا لازال بالحفـظ والصـون=والله يبيـحـه لا تـغـيّـر مـحـلّـه
أهديتنـي جمـره علـى راس غليـون=وأهديتـك مـن العمـر شيحـه وفلّـه
ورغم إختلاف المـدّ لا زلـت ممنـون=والشـوق يآخذنـي علـى كـل ملّـه
فوّحت دمّي لين صـار أشقـر اللـون=وأخـذت مـن مجـراه فنجـال دلّــه
ما غير أغنّي فيك لـو كنـت مغبـون=يا ملّ قلبي من غرامك يـا مـن لّـه !
دايم ضحايا العشـق لإجلـه يضحّـون=كم فاض مـن كثـر الضحايـا سجلّـه
وأنـا غديـت بحكـم فاتـن ومفتـون=راضي بحكـم الحـبّ .. والحكـم للّـه
وأن قام يكبـر بيننـا شاسـع البـون=أرفـق علـيّ وشاسـع البـون قلّـه
عـز الله أنّ الشـكّ ماهـوب مامـون=سيـف الجفـا البتـار يمكـن يسلّـه
أقنع لو أنّ الحال مـن دون فـي دون=وأخـذ الكـلام اللـي عليـه الأدلّــه
لا تشتكي لـي والعـرب وش يقولـون=شكـوا ً لغيـر الله تـراهـا مـذلّـه !

[سعد بن عادي]

صحيح ما ني على ضلع الوسامة ملـك
لكني أرقى على ضلع المراجـل رقـي
لا صار غيري يحب الدنفسـه ويعلـك
أتعب على الطيب لين يصب منه أعرقي
أعانق الغيم وأسبح في مـدار الفلـك
أخايل شعاع نور الشمس من تشرقـي

[سعد بن عادي]

لاغبت والا تعبت وصابني حاجـه
أمانـه الجوري لحـد ٍ يبكيهـا
تحملوا صوتها المبحوح وازعاجه
واللى يبي فرحتى ورضاي يرضيها
أخاف تحتاج للدكتـور وعلاجـه
وتطيح من حيلها محـد ٍ يوديها
هى نور عيني ونور القلب وسراجه
هالله يتمـم لهـا والله يخليـهـا

[سعد بن عادي]

تدرى وش الحكمه اللى دوم في بالي؟؟

( حاول تبيّن شموخك ..في انكساراتك)

[سعد بن عادي]

حبيت حرف النون من شان خلى

وحبيت كل اسمٍ بدا بأوله نـون

[سعد بن عادي]

كل مـا غنيّـت قـاف ٍ يطـرب اللّعابـه
أعترض لي من يقول .. أنته وراك تغنيّ ؟

قلت قصّـاد وعلـى قـدّه يقيـس ثيابـه
قال أردّ العلم عنك .. وقلـت ردّه عنّـي

أثر حتى في الهوايـة مشكلـه وطلابـه
أتركوني ما أحترفت ولا أشتهـرت بفنّـي

والله أنّي مـا دخلـت الساحـة الكذابـه
ولا نزلت بسوق يعننّـي ويـا ذاكنّـي !!

أي وربي ما مسحـت الجوخـه الجذابـه
ولا ترجيّت المشالح بيـن هـنّ وهنّـي

لي سموّي لو سموّ الشيخ ما يرضا بـه
المـدوح الزايفـه لا ينتظـرهـا مـنّـي

أن مدحنا ما مدحنا غيـر أسـود الغابـه
لو عيال الذيب ترقص مع عيال الجنّـي !

عشت يا راسي بخير ولا عليـك رقابـه
يا عسى تفداك روس ٍ خاب فيهـا ظنّـي

[سعد بن عادي]

ياقو باسـي علـى صبـري وياثقلـي
لوكان تالـي زمانـي جاينـي خفّـه!
امشي وعيني سما والشوك في رجلي
واثر طريق العنـا لفّـه ورى لفّـه!!
مابين يمكـن ولكـن منعقـد حبلـي
تكفى يايمكـن تجمّـل رجّـح الكفّـه.
ما اقول انا احسن من اللي بعدي وقبلي
اقول عنـدي ضميـر ومبـدأ وعفّـه.
يعني: ما افكر في وضعٍ مايناسب لـي
ولا احدٍ تجي له مقاديره على شفّـه!!

[سعد بن عادي]

طب طب على قلبي ترا قلبي سريع الارتباك
يخاف بسم الله عليه من الهوى لا هبّ له

حاول تهدّي روعته واحذر تشيله في يداك
يمكن لا شلته ينفجر .. مثل إنفجار القنبله

الله وكيلك .. كم جرا له من هذاك ومن هذاك
مير انتبه لا تنشده وش سوّوا الأحباب له !!

يا صاحبي لا تحبس أشواقك وعطني من غلاك
وأعطيك كلّ اللي ذخرته للسنين المقبله

خذ ما تبي من خبرتي بالحبّ والباقي فداك
وحافظ على اسرار المحبّه وأصدق العشق أنبله

قل لي أحبّك .. لين أشوف البرق يبرق من شفاك
وأقول أحبّك .. لين ينبت لك في صدري سنبله