[.last breath]

*
*
*
*
*
*
*

ماشاء الله ....
المتصفح مليان الوان أكيد الــــــــرونق
مرت صح ...

ماشاء الله يازينكـ وأنت ماشي حافي ونازل من سلم قوس قزح ..

الناس كلها معاكـ بسبب الموكب
وأنت ماتدري باللي صاير وراكـ
بالله لاجيت مرة ثاانية
تعال لحالكـ بس بدون أي رسمية مواكب^-^
تسلم على المرور....والدعاء
وعلى كل شيء
*
*
*
*
*
*

اوب وحنان لا لا ... من جد المتصفح مليان الوان ....
لوسمحتي حنان
أمسكِ المساار الايمن مع الشاحنات

يقولون... انك بعد الغياب سمنتي ماشاءالله ^-^

<<<<امزح خخخخخ ....بااالعافية

*
وعلى فكرة ترى شفت حارتكم .....
يازين حارتكم ويبرد ماكم!!!!
*
*
*

سلمان الشويلعي ... يامرااحب ترحب ...
هذا انت والا جبين الشمس
يامرحبااا يااامرحبااا.....

للمرة المليون بعد المليار والتريليون
أسألكـ وش أخبار الولد عساهـ طيب ترى تمايمه عليّ ...
أذأ رديت هههههه ....

هااا يالربع هذا اصبعي إذا رد سلمان
أكسر كيبوردي
*
*
*
*
*
*
دقيقة باقي أخت رهيييييبة
ونس سوالفها

أصبروا بااقي بنت وحدة أصبروا شوي ...
يمكن تتأخر عليكم
شوي

الظاهر جالسة تتشقلب وآخذهـ راحتها...
الظااهر انها مانتبهت لي يوم دخلت

شوي خلوها تاخذ رااحتها....

زين....انها تعبت...

شهاليل
...الحين كلهم رااحوااا صح....الحين ماعندنا احد...
وانا يعني
وشسمه
بصراحة
ودي
يعني
يعني.... بالعربي

تعال وخش قلبي ودي ارحل بكـ....
بس تكفى لاتعلم احد

اخذت ضيمكـ ولاعدمتك انا ولا المنتدى...
كانكـ تحفة زمان ومكان

لكـ كل آياتي يامطر...
ولكـ كل اوراقي المقدسة
واقلامي يااطهر
*
*
*
*
*

غداااا ... لقاءنا مع التاريخ

[أسايرها تعاندني]

راااااااائع بكل ماتحمل هذه الكلمه من معنى

اخي العزيز كل كلامك صدق وحقيقي ولكن من يسمعك
ولو سمعوك من يؤيدك ومن يعمل بما قلته ...

مشكله الرياضيات صعبه ومشكله سهولة الوطنيه اصعب
ومشكلة التفحيط صعبه ومشكلة التفحيط بعد الأختبارات واجب اصعب

شكراً لك اخوي على طرحك وتميز قلمك بطرحه
ودمت بحفظ الله معافى وموفق بكل ماتسعى اليه ..

ثلاث مرات اقراءه و بكل مره يعجبني اكثر

[نايف ابن عليثه]

متآبع ..

الى حتى

آعلآن النتآئج هههههههه

والتوفيق للجميع ..

[شهاليل]

اووووووف
يآشين جو الامتحاناات .,’
دايم متكهرب ..,
وخلصنا اول يوم ..,
وقسم أنه كان حافل .,’
احلى مافي الموضوع المراقبه اللي كانت معي .,’
طبعا انا ماعرفها ان كل وحده كانت تدرس مرحله
سألتها شو اسمك .,؟
قالت ام هاشم ..,
قلت اي طيب وش اسمك .., ؟
قالت ام هااشم ..,
عاد انا قلت الاخت تستهبل ..,
عصبت وقلت انا ابي اسمك اوب كنيتك ..,
ضحكت المصريه وقالت يختي والله العظيم انا اسمي ام هاشم ..,
ياحليلها يازين اسمها .,
والله مافيه من جماعتنا وحده تحمل نفس الاسم .,

اما باقي الامور سهالات ولله الحمد .,
قوة غش ..,
انوآع الاستهتاار والاستهبال ., ’
طالبات في مدارس خاصه وملخصات ودروس معينه ..,
وآخرها تقول ياستااذه مو عاارفه صعب .,’
>> قلت في نفسي حسره علينا
يوم كنت ادرس كأني في دوره عسكريه مو بمدرسه .,,’
سقى الله ايام الشده بالخير ..,




سبورة اللجنه >> مغبره مو
خخخخ


بريث ..,
يوم حافل حقيقه ..,
خخخخخخخخخخخ
ياحليل فيصل يوم نوى يرسب ماحصل الا الوطنيه ., ’
كان رسب في مادة تستااهل خخخخخخخخ ..,
بالله قبص خدوده .,
*
*
اشوفكم بكره على خير ..,
ويارب محد يغش

[قلبي إماراتي]

لا ست بيرث نبي الشهاده الكبيره
والله يوفقك

[سعد محمد]

متابع بهدوء ...


والله يوفقك ويوفق جميع الطلبه والطالبات

[.last breath]

*
*
*
*
*

( تاريخ – بلاااااغـــة)
اهم الاحداث لليوم الثاني على التوالي.

قبل الفجر ...انا والوالد والوالدة

وسكوت مخيف بيني وبين الوالد منذ حادثة الامس
تخللها نظرات تخترق الاجساد وتستقر بالقلب
ودعاء الوالدة موسيقى تصويرية لهذه النظرات ....
امي صااحبة اعظم الادعية في العالم (ودكـ تلحنها وأغنيها)
....غفت عيني وامي تدّعي.....
يارب توفق فهد ...
يارب ترحم فهد ...
يارب تحبب الايام في فهد

وفجأة صحيت..

وتفالي على الكتااب وخط ابيض على خدي!!!!
وامي تدعي وتقول : يارب تخلي فهد يكرهـ التفحيط

والتفت بسرعة : ياهـ ....الحين ...التفحيط وش دخله ..!!!

قالت: ماعليه ياولدي يمكن ابوكـ يرضى
ويعطيكـ سيارته تداوم فيها

قال الوالد بغضب: والله لو مايبقى الا انت من عيالي
ولا يبقى من المواصلات غير سيكل ماعطيتكـ يااولد شيخة

هنا..أيقنت إن المشي ريااضة مفيدة في الصباح تعمل على تحريكـ الدورة الدموية.
---------

مشيت ومشيت...حتى وصلت ولا واحد من الاصدقاء جاني ولا احد وقفني
مااااهـوب عشان مامعي سيااارةلا لا لا ...
ولا ماااهـوب عشاني برحة في المدرسة

لكن يمكن
عشان شكلي تغير عليهم لاني مخفـف تحليق شعري البارح

كثير من الطلاب يستحي إذا حلق شعره..والمدارس يشددون على الحلاقة ..
إنا أشوف إذا شعر الطالب جميل مايحتااج...
بس صديقي مبااركـ يقول :
لا... لازم كل الطلاب مثل بعض يحلقـون مافيه احد شعره جميل
والثاني لا..وش ذنب اللي شعرهـ شين!!

شعر مباااركـ مو نااعم ولاحتى جميل...
الا إذا تروش يصير نااعم بسبب الماء واذا طلع الشمس يتلفلف

------------
المرور ومعهم ادارة ثانية تفتش على بوابااات المدرسة ....
أحس إن فيه شيء صااير
المدرسين مع بوابة الرئيسة يدخلون بسرعة
والطلاب تفتيش ...

عند الباب جيت ابي الشرطي يفتشني..

وطالع فيني وحسيت انه قال :
هذا الولد طيّب وحبوب..وأكيد مامعه شيء

عاد انا إذا حسيت بنظرة عطف عليّ أسوي نفسي مسكين
ومظلووم وحزين ومشي بشويش والتفت ورا ويمكن أبكي وأجيب شهوود

حاول إن تتخيل ..
خوف اختبارات – خوف من الامن وانوار الدوريات –
استحياء من تعليق الشباب اثناء التفتيش –
خوف ......فعلا مدرسة رعب وخوف لن ينتهي
والسبب عقول كانت ولازالت لاتعرف من تخاطب
----------------------
وقفت قداام عند بوابة الاختبار اذاكر ...
بدون مايشوفني الاستاد/ مانع ...
وأذاكر ... احوال الجزيرة العربية قبل دعوة الشيخ محمد بن عبدالوهااب
يقولون بتجي بالاختبار
(الاشاعات مثل هذي تكثر قبل الامتحان فقط)
...وهذا من اسرع انواع الاشاعات انتهاء..

وانا وااقف أذاكر سمعت اثنين
يسولفون ورا حاجز بيني وبينهم

يقول الاول: كل هذا .. وين مخبيه عن التفـتيش
قال: مخبيه لكـ.... شفه بسروالي

قال : دخلها خلاااص لا احد يشوف ....
قال : الوعد بعد الدواام

قال: وكيف الحين
قال: تمام..وخر عني ترااها شدددددد...

أعجبتني كلمة شدد ...
وصارت على لساااني ولا أدري وش معنااها!!!!!!

بعض الطلاب يرددون كلام مايدري عن معناه
ويحااسب محاسبة العارف الخبير المتمرس...مالسبب
وكيف تريد من الطالب إن يعتبركـ أب وأنت لاتعتذر له
ولا تكون الملجأ له عند الخووف
*
*
*
*
*
اليوم شي غير طبيعي ...جو عالمي الصباح

كالعااااااادة قبل توزيع الاورااااق
جالس أسولف مع نااااايف
*
*
*
*

بدا توزيع الاوراق ............وبعد عشرين دقيقة

ولاول مرة في خطوة جريئة

اعلنت المدرسة في صالة الاختبار عن العشرة الاوائل
في مادة الرياضيات كخطوة تشجيعية
وبعد ماانتهى وكيل المدرسة من القاء اسماء العشرة المتفوقين
في مادة الرياضيات امس ...

على الفور ضجت الصالة بأبتسامات وعبرات مخنوقة...
وكانت فرصة لاتعوض لاخوكم لكنها لم تطل المكوث
لحظة فعلا كانت أغرب من خيااال

محمد..... جلس يبكي من جد يبكي ايوالله
من جد بكى بسبب الدرجات

وفيصل....
مستانس بقوووة ماادري وش يحس فيه ^-^

بس الغريب إن مبااركـ ماطلع اسمه...شي غررريب

وفيه ...

وفيه ثلاثة طلاب عـيال عم طرشوا.........
انا احسبهم اللي أمس
لكن مبااركـ يقول ان عيال عم الثلاثة
في المستشفى تحت حراسة عسكرية

لاحول ولاقوة الا بالله .........
أشغلونا ولازال السر غااامض!!!!!!!!!
---------------
مباركـ ابوروان....
بعد عشر دقايق التفت له
ولقيته نايم مخلص ومنتهي

ماشاء الله ... ماشاء الله ...ماشاء الله

-------------
اختباااار ماكان صعب بس كانت الاسئلة طويلة
ولا أذكر اني شفتها
حاولت احل مااقدرت...كأن الاستاد بالاسئلة
يتكلم عن شيء مااعرفه...
يااالله شكلي داااج والشباب يحلون ماشاء الله ...

هذي أخرة اللي يجلس على المنتدى
ويسولف مع شهاليل وحنان ورشيدية وافتخر
والرونق وسلمان الشويلعي...
^-^

ياليتني ذاكرت!!!

مشكلة المنتدى والمدرسة والوقت ....
احيانا افكر في المنتدى من اجل صيااغة فكرة لطرحها هنا
وأحيانا افكر فقط في الالعااب هل فلان دخل او لا ...
واحيانا افكر في كيفية العثور على موضوع منقول لكتابته هنااا ...
وفي كلا الاحوال الجميع خااسر عـدا من يبحث عن نفسه في حبر القـلم
------------
حسن...شفـت بجنبه استاد عايض ويسولف معه
ويروح ويجي ويجي ويروح

...كل مارفع حسن يده الاستاد على طول يجيه ويسولف معه...
يااحظ حسن...
حاولت ارفع يدي...بس طالع فيني الاستاد من بعيد
وقال : الاسئلة وااضحة ولاتحتاج ....

ياالله كيف عرف !!!

ابي المعلم ... لافرق بين الطلاب...واذا كنت تطبق الفروق الفردية..
فلابد إن تعلم إن الفروق الفردية ليست في المظهر
او أن هذا ابن فلان
او لكـ مصالح مع منهم من اهل هذا الطالب المهتم به ... أتق الله.

والله قهر...
----------------------------------
اليوم ..عـلي نكبة
ماحضر ولا احد فـقـدهـ من العيال

...قـلق من جد...

ولقيناااهـ جالس برا لحاااله...جيته عندهـ
وسألته : سلامات عليّ ليش ماأختبرت
قال : نسيت ماجيب قـلم ولا لقـيت
وقلت للاستاد بطلع السياارة أجيب قلم..وطلعت
وقلت ياولد فـرصة الواحد يهرب من المدرسة !!!!!!!!

هذا كيف افهمه انه اختباار .. المفروض لو يطردونكـ ماتطلع ...
----------------
اكبر خبر هزني...
كانت المفاجأة....أسئلة التاريخ ماأحددها ولا شرحها
ويقولون الشباب انه حذفها من المنهج ...لكنه جاب الاسئلة منها

والله قهر!!!
----------------
بين الفترتين.....
*
*
*

وصلت اوراق او منشورات إن اليوم تحدي في التفحيط
بين نايف جناابة ومجدي تعفيطة عشان مباراة مصر وغانا...قدام بندة ...
انا ماادري وش دخل المباراة في التفحيط....

اووب نسيت أقولكم

مجدي تعفيطة هذا مصري

العادة الطالب المصري دافور وحريقة
لكن مجدي عكس تماما...
وأغرب مصري شفته في حيااتي مقـلع وزااحف ..
ابوهـ فاتح منجرة في الخضرية ...
ويقّـدر التفحيط
وامنيته انه يشتري جيب شاااص

وصدقوني بأذكركم أذا مااشرى سيارة
وانا ابن الوطن...
لحد الحين اروح رجلية للمدرسة
واتميلح قداام ابوي عشان يطلع سيارتي من الورشة

اما ناايف جنابة ...
نصاااب كبير يقول إن ابوهـ عنده مفتااح تجوري المنطقة الشرقية
ههههه
يفكرالدعوة للحين ... تجوري وبوكـ عجوز مربط ..

وفعلا كان هنااكـ تحدي كبير جدا والمرور
لازال واقف عند بوابات المدرسة

عزيزي..هذا مقتطفات في حكايات الطلاب بين الفترتين ..
القاب وتفحيط ونصب تفخيم والاختباارات داخل الابواب ماعادها على الابواب
-------------------------------------------

دق الجرس ... ورميت كتابي
وحاولت أسوي نفسي أسوق سيارتي المصدومة
آن أن اوووح

وامشي مسرع وأصدم اللي قدامي
وادخل بين الطلاب
وكأني اسوق

واسمع تعليقات الطلاب وهم يذاكرون:
عاش ملك الطارة
عطه خير
اسفط على جنب ياراعي الدتسن ههههه

وهذا التعليق الاخير لصديقي حسن
وقفت عنده أمزح معه

وقلت له ووخر تراها شدد
واضحكـ له وهو سااكت
كأنه..استغرب الكلمة ونادني على جنب
قال فهد ماخبركـ كذا خابركـ رجال ماتعرف العلوم هذي ...

انا أستغربت وقلت ليش وش معنااها
قال : معنااها !!!!!!!!!!! (بعد الاختبار .. أقولكم)
------------------------------
الفترة الثانية ...البلاغـــــــــــة

افضل أختبار واحسن اختبار ...
المراقـبين اللي في اللجنة ....
برررحة ماعندكـ احد
أ/ صالح أ/ جعفر أ/بشار .......
وكلنا أخذنا راحتنا

غرابة تجتاحني بسبب المعلمين
برغم إن أ/حسين يعيل ثلاث عوائل
الا اني اراه اقل من الاعالة في المدرسة
بسبب شخصيته الضعيفة

كذلكـ
أ/ جعفر....صااحب معارض سيارات كبير
ومع هذا أضعف من إن يدير ثلاث طلاب

اما
أ/بشاار صااحب شركة دعاية واعلان
ومع هذا تجدهـ لايهتم بالمدرسة وكأن الامر لايعنيه
*
*

ماهي الاسباب ....في هذا المسخ!!!
قد يكون لانك تعمل تحت ظل انظمة تحكمكـ ....
وهذه الانظمة (التعليم) لاتملكـ داافع للاخلاص
او للمحاسبة عند هذا الاهمال ....
وقد يكون ضعف النظام لايخدمني في تفعيله
----------------------------------------------
شيء صار خاارج المدرسة أول مرة أشوف بنات ...
المدرسة اللي بجنبا طلعوا بنفس توقيتنا...
بس يعلم الله
اني مانتبهت للبنات ولا سويت شي

بس ...شفت عـلي جنابة وناايف يتميلحون ...
*
*
*
*

دخلت البيت داايخ...
ولا عـندي استعداد اكتب حتى هنااا...
في راسي 500 كلغ من نوم....
----------------------------------------

غدااا....اختبار.........( نحــــــــــــــو)

انتظروني ....... وشكرااا لمروري ^-^

[.last breath]

في الاختبارات لم نعد نخاف من وجود البراشيم
في جيوب الطلاب بل نخشى وجود الكبتاجون


اكاد اصرخ واقول ابنائى برشموا
ولاتناولو هذا السم الزعاف مهما كانت الاغراءات
*
*
*
*
*
*


الكبتــــــــــــــــــــــاجون:

قرص ابيض مرسوم على احد وجهيه منحنيان
والوجه الاخر مشقوق منتصفه احيانا يكون لونه بني الشكل بنفس العلامات

اسمه الدارج : ابو مسحة

ولها اسماء عدة :

ابوملف ــــ الابيض ـــــ دفني ـــ ابوداب
داستون بيضاء ــ قشطة ـــ ابوقوسين

تأثيرها قوي ينشط الجهاز العصبي المركزي
يعمل على فقد المتعاطي الدقة في القدرة
على التقويم واصدار الاحكام
وضعف الاستجابات الحسية


تناوله بكثرة :
1. يولد العنف
2. والتهيج
3. والروح العدوانية



بعد زوال تأثيره:
يصيب بالصداع ـــ الاكتئاب ـــــ القلق



اخطر ما في هذه الاقراص :
انها مغشوشة حيث تكلفة صنعها قليلة
فيما تروج باعلى سعر
ومضارها كبيرة وسريعة ليس كالسابق ....




فــــأرجوك ابني الطالب لاتكن اسيرها
ولو وصـــــــــل الامر الى ان تبرشم
وان كان الاصل ان تجد وتجتهد
والله لن يضيع اجرك بأذنه تعالي

محبك واخوكـ
الذي يتمني ان يراك بصحة المؤمن القوي