[فيصل ابن عدله]

يقهرها حياه


ولْوَلَت بسكات ياويلي ياويلي
تخنق العبرات يقهرها حياها


عجّلت للدار بالدمع الثقيلي
والحسن محشوم ماعينن تراها


أحسبك باليَمْ وانتي عنه ميلي
فازعن والروح جسرت من شقاها


ملثم العينين مجهد كل حيلي
باول الاعمار مدري منتهاها


لك رهنت الروح فدوة في شليلي
ضامية والموج عيّا في ضماها


ماردعني موج ماله من شكيلي
أسود اللجّات أرمل واهتواها


ماطلبت الناس فزعة في خليلي
وادري ان الناس صدت عن نداها


ما احسب ان العشق ساطي يا قبيلي
أشجع من الموت روحي ماحماها


جيت اشجَّ اليَمَ ليتك تظهري لي
ما اشوفك ليه عيني وش عماها


ليه موتك صار قبلي ياقتيلي
واحسبك ياموت تلطف في بقاها


يا عجيب اللي حصل ماله مثيلي
من جنوني صرت أضحك في عزاها


واثري ان البنت حية تشتكيلي
خافت من الموج تسرف في بكاها


كسحتي يابنت تضحك في غليلي
شوفتك تبكين فرحة ماوراها






الشاعر / فيصل حمد البركي

[عطر الريف]

كالعادة حضور لا بد منه
//
ربي يوفقك

[فيصل ابن عدله]

ياصغيرة

ياصغيرة مالقيتي غير قلبي تلعبـي بـه؟!
كيف جتكي هالجرائة تلعبيـن وتضحكيـن!



يالعوبة هاتي قلبي وانتي لعبـك مانعيبـه
بس لازم تستريحي طـول ليلـك تلعبيـن



ياغناتي انتي طفلة لا تجيبي لـي مصيبـة
يكفي اني ما أنام.. وأحسب انـك تعرفيـن



صار نومي من نصيبك في ظلامن نام ذيبه
هزّّ جفني من سواتك دمعتيـن وجمرتيـن



صار شكي في عذابك ..ياااعدوة.. ياااحبيبة
ليتك انك ياحبيبة لـي عـدوة عـن يقيـن



إحرميني من وصالك واشتميني.. بس غيبة
لن صوتك لو سمعتـة يمتحنـي بالحنيـن



تنكبيني في جمالك وتكتبي لـي هالظريبـة
وراس مالي دمعتين مسلسـلات بدمعتيـن



كَن حظي لي عدو وكنّك انتي تعتنـي بـه
وانتي حظـك إن قلبـك لايهـاب ولايليـن



كن ربـي ماخلقكـي غيـر آيـة ومهيبـة
وكن ربي يوم قدّر.. قـدّر انـي أستهيـن



أتجرأ.. أتمعـن فـي عيونـك هالعجيبـة
سحر يسلب نون عيني واتخبط دون عيـن



رمش عينك لو دعاني غصب عني أستجيبه
وادري انه رمش جاهل وادري انك تجهلين



بس ابا اقرب منك اكثر واتحرى منك طيبـة
ودي انعس بين خدك والشفايـف والجبيـن



سولفي لي وانسي ايدك فوق خدي تلتهي به
لوني لي كل لوحة فـي خيالـي تلمسيـن



طال ليلي أرتجيكي في قصيدن أرتجي بـه
أحلف انك مافهمتي من قصيـدي كلمتيـن



ناسي انك طفل يلعب والقصايـد ماتجيبـه
سولفوا لي عنك مرة بس انا ازبن منك وين



علَّموني وصفوني أكَّدوا لـي.. دون ريبـة
دار ذهني يوم شفتك وماوصلت الا رهيـن



مابقى لي في حياتي غير لوحن أنطوي بـه
سهرتني فيك نظرة قلت ابا اكتب شي زيـن

[فيصل ابن عدله]

ياااااااااااسااااااااااااااره
تدرين ياسـارة بليّـا مجامـل
ألقلب ينبض لك بعنف وحرارة


مشتاق لعلومك وضرب الانامل
والضحكة الحلوة وبرأ الجسارة


بكر وتواصيفك بفكرك تكمّـل
صوتك ومنطوقك وثغرك وناره


لا لا تخليني لحالي ترى امـل
والجن ماترحم وحيـدٍ بـداره


الحب في قلبي معزِّم وصامـل
والعين في ماها تصدر قـراره


وامسيت مجنونك وجفني تنمّل
والليل يسرقني ولاني خسـارة


أغير بالجوزا أشرّق واشمّـل
ونوبات اقبّل لك واشرّق بغارة


أهدّ في طيفٍ من الشوق ثامل
دايخ من اللهفة يضيّع مساره


أحس بالغربة وحيشٍ وهامـل
واقول ياقلبي تلفـت لسـارة


ألشوق وعيوني يتيم وأرامـل
واقف على بابك وطال انتظاره


الشاعر """ فيصل البــــــــــــركي

[فيصل ابن عدله]

ياريشــــــــــــــــــة الطير

ياريشة الطير خطِّـي كلامـي
لحـرة الطبـع ذيـك البنيـة
قولي لها كيف نَحْلت عظامـي
ألقلب شفقان والعيـن زيِّـه
سكنتي القلب دون اهتمامـي
سكنتي ختال مـدري سطيِّـه
لقيتي العيـن قـدرت تنامـي
ولقيتي الروح تضحك رضيِّـه
طويتي كتاب يشهـد غرامـي
طويك مع الوقت طويه خفيِّـه
أول مع الناس وسط الزحامي
واليوم مزحـوم دون البريِّـه
نشدتـك الله قولـي علامـي
ردي على روح جَبْرَت عصيِّه
سرب (القطا) طار ينزع لثامي
والظبي مرتاع يصعب عليِّـه
عليتني فيـه ياطيـر ضامـي
تطري علي فيه ذيك الصبيِّـه
دينن علي صار دينن لزامـي
لا اضميك ياطير جفَّل ظبيِّـه

[فيصل ابن عدله]

آتفاخـــــــــــر بانهزامـــــي

جيت غفلة آتختّل رمـش عينـي لايقـوم
واثري انّي آتختل لي ظبيـه فـي منامـي
مستريحة مستطيبـه للسوالـف والعلـوم
الكواكب مسهرتهن طيب منهن واحترامـي
كن وردة لونها احمـر واتمايـل بالنجـوم
واتضايق من بعضهن ضيّعنهـا بالزحامـي
هددتني عن منامي واشهد انـي إمهـزوم
يافشيلة طـول ليلـي آتفاخـر بانهزامـي
قام رمشي مـن منامـه يتعلـق بالرجـوم
يتغزل بالثريا وكـل نجمـن بـان شامـي
كَنْ عيني عين ذيبٍ لـو يغمّـض ماينـوم
وكن [قلبي ءوعيونك] [الضريبة والسهامي]
ماتهافـن دون قلبـي وماتـردّن بالعـزوم
إستقرن في وريدي واستراحن فالمرامـي
ثعت ابا ازبن عن عيونك في مزابن القروم
واتجمع من شتاتي واتشيد مـن حطامـي
واتهيأ فـي عتـادي واترقـب كـل يـوم
إلعيونن صوبتني من وهجها رمـح حامـي
آه منكي مانسيتـك لا صحيـح ولا حلـوم
كل ما امسي أتذكر كيف بردت بي عظامـي
ليه جيتي تسحريني في جمالـن إمحشـوم
وليه صرتي عقب هذا تقهريني في غرامي
عينـك اللـي ظالمتنـي ماتـلام وماتلـوم
حظي اللي بك نكبني ماتبرى مـن ملامـي
أرسلت لي من أدبها كان جيت ولك لـزوم
ودي ارحل عن منامك واتحشم في منامـي
قلت خلك في مكانك أللـي مثلـك مايقـوم
إستريحي في مكانك واتركيني في هيامـي
ماوهبكي هالمحاسن غير منشـي ألغيـوم
الله اكبر كيف قوّم من تراب اجمل قوامـي
سقت روحي في نعشها وغرامي محسـوم
واحسب اني أبتديها بالمصافح والسلامـي


ِالشاعر / فيصل البـــــــــــــــــــركي

[فيصل ابن عدله]

إنســي الهوى


ياهيـه ياعاشـق اليسميـن كلّمنـا
من ضيّعك في دروب الحب وازهاره ؟


ضاعت مهاة النفـود اللـي تعلمنـا
واقفت خلود الهفوف وروّحت سـارة


ماباقي الا انت واحنا وقافيـة( لمنـا)
إنسى الهوى وولع بماضيك زيقـارة


الحب ظلم العقول اشفيـك ظالمنـا!!
والقلب مثل الفراشة والهـوى نـاره


لاتلطـم الجـرح تكـفـا لا تألّمـنـا
ولا تعرضه في مهبّ الشوق واشعاره


إحنـا علـى الديـن آمنـا وأسلمنـا
والحب ذنب وعـذاب ونـار جبّـارة


من عقب ماغاب نور الحـق ظلّمنـا
تهنا معك والهوى ياطـول مشـواره


جينـاك بالنـور كبّـرنـا وسلّمـنـا
والذنب لـه فـي كتـاب الله كفّـارة



الشاعر / فيصل البـــــــــــــــــــــــركي

[ادري طيبتي غلطه]

الله يعطيك العاااافيه

شاعرنا فيصل

صحيح انك شاعر مبدع وامتعتنا بقصااايدك وعطائك المستمر

الله يبيض وجهك ويشرفنا وجودك

واتمنى منك تعطينا المزيد من ابداعااااااتك

والله يحفظك بصراحه شاااعر مبدع ومتميز