[نايف سليمان]

اعزائي الافاضل في قلعة المجد والتاريخ يسعدني ان اتقدم اليكم بفكره جديدة كأهداء لهذه الشبكه المميزه حيث انني قمت بجمع رسائل جوال لشاعر من شعراء عبس وسوف اضعها بين ايديكم تحت عنوان ( رسائل )واستميحكم عذرا ً عن اية قصور .


شاعركم / محمد بن معيوف بن دبيان الشويلعي الرشيدي


رسالة بمناسبة مكرمة الاجازه من خادم الحرمين الشريفين الملك عبد اللله بن عبد العزيز آل سعود :

يانوّ ياممطر سحاب ٍ بلا مـزون= نثرت ماك بشهر رحمه وغفران
الله يجير خطاك من عثرة الكـون = ويبقيك رب ٍ كوّن الانس والجـان
سحاب خير ٍ من قضا الرب ممنون = غيث ٍ على جرد الدهر هل هتان
كف العطا في كوكب المــــــــد مرهــــــون = كف ابو متعب غيث من غيث الامزان

رسالة ذكرى :

والله تخوفني مقابيل الايام= الياذكرت ايام مبدا حياتي
شوي واوصل حد تحطيم الارقام= واقول ماسوى الملوح سواتي
واحطم اشهر حب خلد بالافلام =جوزيف مع تاي التنك والزناتي

رسالة غزل :

ياهم والله ماحد ٍ مثلي اغلاك =حتى غلا امك زايدٍ عن غلاها

رسالة فراق :

يامدور على فرقاي نفسي عزيزه= والله اني على فرقاك لانهض جناحي
اعتبر كل رحلتنا عباره وجيزه=(ريشة غراب طارت مع هبوب الرياحي)

رسالة مناجاه للدار :

يادار وين اللي كما العود لك طيب= اللي يعادل شوف عيني غلاهم
خلوتك منهم بثت براسي الشيب = ماباقي ٍ بركونك الا صداهم
يادار وين مرادفات التراحيب= اللي تقابلني بنبرة نداهم
يادار اثر دمعي على غيرهم عيب= الله يحفظهم ويسعد مساهم

رسالة مسافر طيران :

من يوم قال الهاتف المطلوب مغلق قلت اكيد= انه مسافر والسفر بين الثريا والثرى

رسالة للحظ :

متى تدور بحظي الشين الايام= وياقف على رجليه عقب انسداحه
يالعن ابو حظ ٍ ليا طاح ماقام= اللي ليا احتجته ماينهض جناحه

رسالة رد على شخص :

لاتحسب ان العيد كشخه وتجميل= العيد فعلا ً بالمشاعر والاحساس
ويكمل ليا عايدت روس الرجاجيل= ومصافح الخلان مع زحمة الناس
وعيد ٍ تقابل به نشاماً حلاحيل =يغنيك عن زيف المظاهر والالباس

رسالة عيد الاضحى بيوم مقتل صدام :

يالله دخيلك من صباحك يابغداد= متغيرن عيدك عن بلاد الاسلام
عيدك مخالف مايشابه للاعياد= نفذ نهار السبت بالقايد اعدام
تراقص الشيعه مع صفوف الاكراد= وضحو نهار العيد في راس صدام

رسالة فراق في يوم عيد :

ماعاد لي في فرحة العيد حاجه = اقفيت صوب وفرحة العيد في صوب
العيد يوم القاه يطلق حجاجه= يوم ان فعلاً صبح الاعياد محسوب
واليوم اشوف العيد عندي سماجه= عادي لو البس ثوبي الصبح مقلوب

رسالة شجب الحظ :

انا مثل بن برمان والطير حظي= على راسي من العيد جاب البلاوي
اقضه وهو لعروق قلبي يقظي= وهذا علي امر ٍ منزل سماوي

رسالة الى نايف وفارس :

ياوجد قلبي على الاحباب يانايف= وجود فارس على طيبه واهاليها
المبتلي بالهوى دايم وهو خايف = الليل سمار والافكار يطويها

رسالة موقف من اشخاص :

الياعثرك الحظ طشك بالرخوم= اللي يجفلها سمار اظلالها
ياوجد حالي يالزحازيح القروم= ماللحمول الا ظهور جمالها
الحر منزاله على روس الرجوم = والبوم بسفوح الجبل منزالها
هذي ديار ٍ ماوراها الا الهموم= واللي سكنها حالته يرثالها

رسالة مواساه لصديق :

والله اني يوم كلمتك وانا بالحيل رايق= بس حسيت بكلامن منك ماريح شعوري
ضاق بي صدر الفضا من يوم قلت ان انت ضايق= اشك لي همك لاعل الله يجملني بدوري

رسالة رد على سؤال :

وين انا والنوم تنشدني مانمت= كيف تنشد وانت باحوالي خبير

رسالة استماحه للنوم :

لوا هني اللي لياحط راسه =عينه تنام ولاتجيه الهواجيس
ماهو بمثلي كل ما اقبل نعاسه= ثارت عليه من المشاكل كوابيس
كنه مكلف في شؤون السياسه= ومطلوب وتدور عليه الجواسيس

رساله الى ( لطام ) صقر من نوع ( حر ) لأبن عمه الصقار عبيد عبدالله دبيان :

يالله عسى لطام مايشوف مكروه= مزبن حمام البر غصبن بلا طيب
مصخر الشرد لياتل هدوه = مادق قلب مطلعه لاكفخ ريب
عقب السطر لطام للدار جابوه= خطير ويخيب الرجا فيه ويصيب

رسالة معاناة عيد :

كل ٍ يقضي له لهالعيد حاجه =ويحط راسه فوق ظهر المخده
ويرتاح عقب السوق واهل اللجاجه= خلاص همه ثوبه يصير قده
وانا تقول بطرف عيني زجاجه = ماتنقضي حاجات راع الموده

رسالة رثاء لحب توفي بالقلب :

رحمك الله ياحلم ٍ قبرته = كفنه القلب والقبر الضلوعي
رفض قلبي جنازته وجبرته= ورثيته قبل شعري في دموعي
لك الله كم جزعت وكم صبرته= وشلته هم يالقلب الجزوعي
مشيته كيل واخيراً شبرته= وعلي اصعب شوي من حب كوعي
ابسلّم عليه الياعبرته =عقب ما اطفيت في ليله شموعي

تقبلو تحيات محبكم نايف بن سليمان والى اللقاء .

الموضوع الأصلي: رسائل جوال للشاعر / محمد بن معيوف بن دبيان الرشيدي | | الكاتب: نايف سليمان | | المصدر: شبكة بني عبس

[الساري العجلان]

رسايل جميله تشكر عليها

[برق الوسم]

رسايل جميله تشكر عليها
وصح لسان الشعراء
واسمح لي بنقلها للمكان المناسب هنا
تقبل مروري

[الاجهر]

يالله دخيلك من صباحك يابغـداد
متغيرن عيدك عن بلاد الاسـلام
عيدك مخالف مايشابـه للاعيـاد
نفذ نهار السبت بالقايـد اعـدام
تراقص الشيعه مع صفوف الاكراد
وضحو نهار العيد في راس صدام
---------------------------------------------------------------

لاهنت يابن محقوظ - -- الشاعر / محمد بن معيوف شاعر لة مكانة وهو من شعار القبيلة الشباب يتمتع بصفات كثيرة - الدين - والخلق - والعلم ، وفقه الله لكل خير

[عيد بن عبيد]

وين انا والنوم تنشدني مانمت=كيف تنشد وانت باحوالي خبير

نايف سليمان
سلمت على هذه الدرر وفكره جدا رائعه ان تجمع رسائل لشاعر من شعراء القبيلة
ننتظر المزيد
تقبل تحياتي
اخوك
عيد بن عبيد

[The monsoon]

رسايل جميله تشكر عليها

[احمد سبيتان]

صح لسان الشاعر محمد معيوف بالحقيقه رسائل جميله
تستحق ان تكون قصائد

تحياتي وتقديري

[بعيدالمصابيح]

رسايل جميله تشكر عليها