[سهم]

عبدالله بن مرهــب :

يامرحبا ترحيبة الطيب ورجال المواقيف=باسمي واسم ربعي هل العز وظهور السواني

يالشاعر اللي ذاع صيته ولكن مابعد شيف=نبغى نسريها..على العز وجزال المعاني




عبدالرحمن بن خضيــر




دام البقى بأهل الوفا والرجاجيل العواريـف=بأسمي وأسم عبس المسمين ذرفين اليماني


الحمدلله والشكـر دام مانحتـاج تعريـف=ماأظن عبدالله جهل فيك ياسهيل اليمانـي





عبدالله بن مرهــب :

الناس واجد مير حنّا نبي روس العواريف=دلتكــ..ينقصها..يابوزيد..هيل..وزعفراني


الموج هادر وأنتبه للشراع وللمجاديف=سفينتك وسط البحر ماتوصلك المواني



عبدالرحمن بن خضيــر




قدام عبدالله يعدي على روس المشاريف=ليته يغنيها معانا على عشـر وثمانـي


أحيان تأتيك اللقافه من الروس الملاقيف=واحيان علم أهل الوفا والنشاما مايخفاني





عبدالله بن مرهــب :


اليا غزينا ياولد عبس ماجينا مناكيف=الا بعلمً يغضب النذل ويسّر العواني


وأنــا ادري أنك..من هل الطيب وأهل الرمح والسيف=مير الزمن هذا زمان الفشق والجبخاني


عبدالرحمن بن خضيــر




كل البقوم رجال وأهل الوفا شرابة الكيف=ومنين ماهب الهوا مال عود الخيزرانـي


شفناك يابرق الحيا قبل لاتهب العواصيف=لكن ما عيد الضحيه مثل عيد رمضانـي





عبدالله بن مرهــب :




أليا أنتصرنا..يابيض الوجه..مافيها معاريف=الضلع مايشكي من الريح للغصن اللياني


لكن ماشفناك عقب التعب يابارق الصيف=عيد الضحيه..راح مير انت شوفك عيد ثاني





عبدالرحمن بن خضيــر




ياحيف ياللي جبتها عكس ماقلناه ياحيـف=انت وراك تغيـر العلـم وتخـل المبانـي


واجب على عبدالله انه يقوم بواجب الضيف=لايزعل الضيفان ويطاوع فـلان وفلانـي





عبدالله بن مرهــب :




رحبت,,بك..والدرب واضح ولايحتاج توصيف=وأنا أعرف الخيّال..من مسكته..خشم العناني



الله يجيرك ياولد عبس من بعض الصواديف=والا انت ماتجهل مكانك ولا تجهل مكاني





عبدالرحمن بن خضيــر




لاوالله الا تـو ماصـار بالرجـال تخريـف=من يوم قام يردد الهرج ويحـذف الأوانـي


ترا الحقايق تختلف يابقمي ماهي كما الزيف=والزيف سمي زيف لو قال انا ماني وماني





عبدالله بن مرهــب :




حمامتك غنت...على الغصن..وألهتها الغطاريف=لاتدحم اهل الغانيه..غير بجنوبً متاني


أن وقعت..فالراس تصحالها حدب السراجيف=وأن وقعت..فالساق غنولها دانه وداني





عبدالرحمن بن خضيــر




ياللي تبا تشيل الجبل ما أنت قادر شيء ياضعيف=أصدم براس طويق وأرجـع سـوات العقربانـي


عزالله أنك من مقابـل هـل الطنخـات بتعيـف=والمـر مـر وسـم ياللـي تحسبـه برتقانـي





عبدالله بن مرهــب :



الشعر في وادي وابوزيد في وادِ السواليف=شرهتك..والله يالسنافي على منطق لساني


اللي بقوله ياعديم المعاني والتواصيف=فرصه سعيده..وانت ناجح بعد جاك امتحاني





عبدالرحمن بن خضيــر




حنا عقدنا موتمر عالمي في داخـل جنيـف=لكن حداني ياهل العرف ما أدري وش حداني


النار دايم تشتعل بالحطب وتشـب بالليـف=والعلم واضح وأختلف بالدقايـق والثوانـي

الموضوع الأصلي: محاوره بين عبدالرحمن بن خضير وعبدالله بن مرهب البقمي | | الكاتب: سهم | | المصدر: شبكة بني عبس

[العقاد]

مشكور على النقل اخوي سهم
ومحاوره جميله بين شعراء معروفين يعطيك العافيه

اسمحلي بنقلها الى موقعها الصحيح

[مالك الصامل]

مشكور ع النقل محاروه رائعه...

تقبل مروري..

[مرشدالمظيبري]

مشكور على النقل اخوي سهم
ومحاوره جميله بين شعراء معروفين يعطيك العافيه

[سهم]

اقتباس من مشاركة العقاد مشكور على النقل اخوي سهم ومحاوره جميله بين شعراء معروفين يعطيك العافيه اسمحلي بنقلها الى موقعها الصحيح

مشكور على لمرورك طال العمرك

[سهم]

اقتباس من مشاركة مالك الصامل مشكور ع النقل محاروه رائعه... تقبل مروري..

مشكورعلى مرورك المميز

[(*العرعري*)]

أخووي سهم بيض الله وجهك على هالنقل وصح لسان شاعرنا ابوخضير ولايهون البقمي واسمحلي بتغير لون الخط الأبيض لأنه ماينشاف

[العقاد]

اقتباس من مشاركة (*العرعري*) أخووي سهم بيض الله وجهك على هالنقل وصح لسان شاعرنا ابوخضير ولايهون البقمي واسمحلي بتغير لون الخط الأبيض لأنه ماينشاف

مشكور اخوي العرعري على التعديل فعلااً اللون الاول ماينشاف