[محمد بن سلمان]

اسعد الله اوقاتكم بكل خير وايليكم مايلي

ياليل انا لي معك عهـد ومواثيـق=ولولا العهد كلٍ مشى فـي سبيلـة
الياضويت ارقا بروس الشواهيـق=شـم الجبـال النايفـات الطويلـة
امثال سلسلة السـراوات وطويـق=صعبه ولكـن ماهـي ابمستحيلـة
بفروعها اقطف من زهور الزماليق=اللـي توصـف للكبـود العليلـة
اللي عليها المرزمـات البواريـق=تهـل كـل الوسـم يومـه وليلـة
من شان وافين الشبور المطاليـق=اهل المواقف مسرجيـن الكحيلـة
اللي تميز بين مـرزوق ورزيـق=ولايجرمون المتهـم مـع زميلـة
اتعب واعاني واسهر الليل واضيق=ولاارضى يجي بين الاصايل دخيلة
والشعر وزن ومفردات وطواريق=احدٍ يشيل الشعـر واحـدٍ يشيلـة
يا راكب اللـي مابقيـره تعاشيـق=فـي عامـه الاول جديـدٍ مديلـة
لونه يشابه لون ريـش الغرانيـق=البازعـي بالمملكـه هـو وكيلـة
عن بسمة الحاسد وهرج المطافيق=لعقة عسـل بكبودهـم حنضليلـة
عطوه لكن ماهي بعطوة مخاليـق=عطيـةٍ مـن عنـد راع الفضيلـة
اللي لياصكـت عليـك الغواليـق=مافيـه غيـره واحـدٍ تشتكيـلـة
مسراه وفقه من خيـار التوافيـق=مع ديـرةٍ فيهـا يضيـع الدليلـة
دارٍ عليهـا خافقـي والمعالـيـق=خليل في لحضـة مـوادع خليلـة
يادار كـان الكـل دارٍ عشاشيـق=عزالله انك عندي اجمـل جميلـة
لكن اطيق ونـوب يـادار ماطيـق=من نظرتك ياام العيـون الكحيلـة
نظرة عيونك ياغلا تنشف الريـق=بيـن الحصـون الباليـه والنثيلـة
فهمت من نظرة وسـاعٍ محاديـق=وصمت الشفايف واكتراث الجديلة
عن ماتكنينـه بوسـط الصناديـق=على فراق اغلا زمـان وفصيلـة
نتائـج الواقـع بـدة دون تحقيـق=فيها علامات الرضـى مستحيلـة
على محيـا اللـي كنفهـا تفافيـق=وخيل وقنا ورهاف علـطٍ صقيلـة
يوم الزمان اللي يصافق تصافيـق=لهم سرايـا مـع سرايـا القبيلـة
يـادار كـلٍ ذم وقـت التفاريـق=وكلٍ خذا من ميلة الوقـت ميلـة
لكن جـل المرزمـات الدواليـق=تنهل من فوقـك مخيلـة مخيلـة

محمد سلمان

وسلامة الجميع

الموضوع الأصلي: ( زهور الوســـــــــــــــــم) | | الكاتب: محمد بن سلمان | | المصدر: شبكة بني عبس

[برق الوسم]

شاعرنا محمد سلمان صح لسانك قصيده رائعه لاهنت وتقبل مروري

[جميل مساعد]

بيض الله وجهك ...تحياتي

[عبدالله المظهور]

محمد سلمان الوهيداني
شااااعر .. الشعر
لله درك على هذه الشامخه
قصيده في منتهى الجمال والرقه
استمتعت كثيراً بمقدمتها وعشت معها جواً اااااااااااااخر
صح لسانك ايها الشااااعر المبدع
تقبل اعجابي
وتقبل تحياتي وتقديري .

[هاني العرعري]

الله عليك شاعر بمعنى الكلمه

لا يختلف عليك اثنان لله درك


استمتعت بقرائتها تقبل مروري

[راعي شهاب]

صح لسانك وبيض الله وجهك

قصيده شامخه بشموخ صاحبها

سجل اعجابي ومتابعتي

وتقبل تحياتي وتقديري

[محمد بن سلمان]

اقتباس من مشاركة برق الوسم شاعرنا محمد سلمان صح لسانك قصيده رائعه لاهنت وتقبل مروري

صح بدنك لاهنت اشكرك على المرور المشرف لاهنت يابرق الوسم

تقبل سلامي

[ابن نملان]

صح السانك لاهنت