[مهاجر بلا زاد]

قريت هذه القصيده واعجبتني واتمنى انها تعجبكم وليتها لي

قلت الوداع و جاوبت دمعة العين=تجرح بساتين الخدود النديه
و اغضت و شفت بعينها الحزن حزنين=وصاحت على الفرقا انا مو قويه
و جاوبتها ارجوك تكفين تكفين=والله دمعك يشعل النار فيّه
و قالت تعاهدني عهاد المحبين=الله يخون اللي يخون بخويه
قلت ابشري واللي خلقك لاتظنين=حرام ما غيرك عشقت ادميه
وقصت شعرها قلت انا وش تسوين=قالت ابي من غرتي لك هديه
ونادتني الغربه على الهم و البين=واحسب ان الايام روحه وجيه
غربة سنه في ذمتي غربة سنين=متى على الله يلتقي الحي حيه
و رجّعت شوقي في خفوقي براكين=ورجعت انا كلي لها جاذبيه
وسألت ماردوا و انا اصيح هي وين=وكل نثر داخل العين ميّه
وفي معمعة حزني تلقيت رمحين=قالوا ماتت غافلتها المنيه
وفي غرغرتها ماذكرت غير حرفين=تشهدت باسمك شفاة البنيه
صدمه وجابتني على الارض نصفين=شلون راحت دون ذنب و خطيه
تكفون دلوني على القبر هالحين=ما عاد فيني للصبر مقدريه
ووقفت اطالع قبرها بين نصبين=وجلست اضم اغلى النصايب عليّه
واصيح وش بك يا غلا ماتردين=اشتقت همس اشفاك النرجسيه
وش فيك جيت من السفر ماتهلين=ماهي بلك عاده ولا انتي رديه
و حاولت في لحظة جنون اجرح الدين=و ازيح تربة قبرها في يديه
و بالغصب شالوني حشا تقول مسكين=و اصرخ بهم والله والله حيّه
اقفت وتاهت بي جميع العناوين=و الحزن يلعب في داخلي سامريه
و رجعت لدروب الشقا قبل عامين=مدري مين اللي فينا صار ضحيه

منقووله

تمنيت انها لي لمرووري بنفس المووقف

الموضوع الأصلي: قلت الوداع | | الكاتب: مهاجر بلا زاد | | المصدر: شبكة بني عبس

[فيصل الرشيدي]

قصيدة وربي بالقمة

صح لسان الشاعر وتسلم يمينك يا مهاجر على النقل الرائع

وبصراحه ذوقك عال عال ماشاء الله عليك


اسمح لي بتنسيق الرائعه

[الاجهر]

وصاحت على الفرقا انـا مـو قويـه

قصيدة رائعة مشكور

[العماري]

صح لسان من قالها

قصيدة قوية جميلة ;)

مهاجر بال زاد

الله يكون بالعونك

[عابد الرشيدي]

صح لسان من قالها هذه القصيدة

يعطيك الف عافية على لاختيار الرائع

[صقر عبس]

قصه واقعيه تتجسد فيها كل معاني الحب والعشق
:
:
:
:

يعطيك العااااااااااااااااااااااااااافيه اخوووي مهـــــــــــــــــــاجر
ذوووق رائع
اقفت وتاهـت بـي جميـع العناويـن
و الحزن يلعب فـي داخلـي سامريـه
و رجعت لدروب الشقا قبـل عاميـن
مدري مين اللي فينـا صـار ضحيـه الله الله من جدأ قووووووووووويه

[الهنوف]

صح لسااانك ويعطيك العافية على النقل الرائع..

دمت بخير
أختك الهنوف

[مهاجر بلا زاد]

اقتباس من مشاركة فيصل الرشيدي قصيدة وربي بالقمة صح لسان الشاعر وتسلم يمينك يا مهاجر على النقل الرائع وبصراحه ذوقك عال عال ماشاء الله عليك اسمح لي بتنسيق الرائعه

يسلموووو اخي على مروورك وتسلم على ذووقك والله والله يسلمك يااارب