[العالم الفلكي]

بسم الله الرحمن الرحيم

السلام عليكم ورحمة الله وبركاته

هذه المحاوره بين الشاعر ابوعوجه و الشاعر الكابتن

ابوعوجه

اليل ليل الشتاء واليل ليلٍ طويل=ياكابتن الشعر مدري كابتن الطايره
اسر سوات الذيابه لا تحط وتشيل=ارفع هدفها وانا افهمها على الطايره

الكابتن

إن كان طرقك يشابه طرقك مع ابوذيل=خل البدايه نهايه والقدم سايره
عز الله إني من اللي شفت قلبي عليل=المعتدي يعتدي والعالم تسايره

ابوعوجه

لا والله انه عن الشكه براس الطويل=ابعت مرماه لو رجولنا حايره
ايوالله اني بعد مثلك عيوني تخيل=خمسه وخمسين عام بجرحها صابره

الكابتن

خلك كذا واثبت بما قفك مثل النخيل=سولف ولا تقرب الكهرب ولا وايره
أما أشربوا عز وإلا وردوا السلسبيل=إن كان تبغى الحقيقه هذي الصايره

ابوعوجه

انا مع اهل المعرفه مابخس بكل كيل=لكن عوجاي سلطتها على الذايره
هذا الزمن فيه متساوي شجاع وذليل=قل لأمة الضاد قبل تجيهم العايره

الكابتن

بدخل معك وأختصر شي كثير بقليل=لا أخطا عليك الردي باالطيب لا تخايره
كان الرعاه اخذوا للذل معهم صميل=الروس مافيه شك سنينها جايره

ابوعوجه

انا مجرب حلا الايام والحنضليل=اعرف هل السلعه الزينه من البايره
واللي مقيل تراء بكره مايلقى مقيل=ومن صد عن واجبه ماتثور اله ثايره

الكابتن

يمكن عندك من الأيام عرف وحصيل=لكن الأيام هذي غير ومغايره
أن شبوا الشمعدان الخيل ماله صهيل=واهم من علمنا من هي له الدايره

وسلامتكم وصحت السنتكم ياشعار

الموضوع الأصلي: ابوعوجه و الكابتن | | الكاتب: العالم الفلكي | | المصدر: شبكة بني عبس