[الاجهر]

.الشعر والقصص الشعبية
تعرفون ان الشعر الغزلي أصبح الشعر السائد في أغلب القصائد واللي ودهم يقرون ويسمعون قصايد الغزل واجدين
لان الشعر الغزلي بصراحه يظهر في القصيدة وصف وتوجد وتشبيهات وأبداعيه وخاصه القصايد القديمة
لان قصايد الاولين تحسن التصور وتحس في الابداع

فالشعراء الاولين حينما يعشقون يكونون صادقين في حبهم واخلاصهم وفي صداقتهم ويكتبون قصايد تغنى من
جماليتها وتتداول بينهم في المجالس , وتلاحظ في بعض كتب الشعر اللي فيها قصايد الفخر والشجاعة
وقصايد الكرم وقصايد الرثاء وقصايد الغزل وقصايد أكرام الضيف وقصايد الوفاء يكون أكثر قسم هو قصايد الغزل
وفي موضوعنا نتطرق لبعض القصائد الغزليه والقصص الغزلية ..

وشعراء اللوعه والرثاء والحرمان يحملون في داخلهم مجموعة صادقه من العاطفه مصدرها القلب
فحين الفراق تهل الدموع وينثر الشاعر مشاعره وقصيدته فهو من اصعب المواقف اللي تّمر على الشاعر
ومن ضمن هذه المواقف ما حصل لشاعر الكبير عبدالله السبيل الذي فاضت به شاعريته من الشكوى والالم
على فراق الحبيب في قصيدة جميله منها

قالوا نشاش العـود مالـك بلامـاه=قلت اه عود المـوز بإيـدي لويتـه
قالوا تـزوج كـود تدلـه وتنسـاه= قلت اه لو خذت اربـع مـا نسيتـه
قالوا من اقصى الناس وين انت وياه= قلت اه ما أنسى يوم جاني وجيتـه
قالوا نشوفـه عنـد هـذا وهـذاه= قلت اه ما عمره عقب حجـر بيتـه
قالـوا عليـل نـاقـل داه بــرداه= قلت اه اباقربه وروحـي فديتـه

الشاعر الكبير سليمان بن شريم شاعر لا يحتاج الى تعريف فالكل يعرفه والكل يسمعه شعره
المليء بالتوجد والالم والشجن له عدة قصايد تدور حول موضوعنا ومن ضمنها :

يا ونتاه اللي بـرت جسـم حالـي=بري الدبا بنبنوب غصـن تغشـلاه
علـى عشيـر بالمـودة صفـالـي= وازريت انوش احماه وانـا اتعـداه
عرفّ جبينـه مثـل خـط الهلالـي= سبحـان ربي صـوره ليـن سـواه

.

الى ابطيت ما شفته وهو ما عنالـي= عفت المكان اللي يغيضـه ويجفـاه
لو دلهوني عنه مـا نيـب سالـي= اشفق على شوفه واهوجس بطرياه
هبي بريحه يـا هبـوب الشمالـي =كود الجنوب او مطلع الشمس تنصاه

هذا هو حال العشاق في الماضي نتذوق طعم الشعر الحقيقي من افواهم
دموع وألم مرت على شعراء نجد مما دفع وجود الابداع والجماليه في
شعرهم كما ان للهوى جروح يصعب علاجها في قول الشاعر الكبير : محمد
الاحمد السديري مخاطبا الشاعر زبن بن عمير :

جرح الهوى يا عمير محدن يداويه =غير الـذي دمـاه مالـه مـداوي
يا عمير انا جرحي من العام شاكيه =بأقصى الضمير بثومه القلب هاوي
حي جرح قلبـي ونجـض مكاويـه =قله بحق الحب يـا عميـر يـاوي
قل له يعـف ولا يعـذب مصافيـه =وان كان قلبه مثل قلبـي شقـاوي
ان غاب دايم كن عينـي تراعيـه =وان شفت غيره صرت مثل العماري
القلب من جـور المحبـه يباريـه =وعقبه بوسط الناس كني خـلاوي

سقى صوب الحيا مزن تها=ماعلى قبر بتلعات الحجـازي
يعط بها البختري والخزامـا=وترتع فيه طفلات الجـوازي
صـلاة الله منـي والسلامـا=على من فيه بالغفران فازي
عفيف الجيب ما داس الملاما=ولا وقف على طرق المخازي
ابو زرق على خـده علامـا=تحلاها كمـا نقـش غـازي
عليه قلوب عشاقـه ترامـا=تكسر مثل تكسير القـزازي

ومن القصص الشعبيه في الفراق العشاق قصة جرت على الشاعر عيادة بن منيس الخريصي الشمري
كان الرجال متزوج ومن زو جه عطاها الله جمال وحسن خلق ودين وعفه المهم ان مره من المرات
ارادت الزوجة انها تحج مع ابوها وكلمت زوجها وقال توكلي على الله يا بنت والله يسهل دربك ويرجعكم
بالسلامه وما تشوفون شر والله يوم راحت الزوجه مع ابوها ويوم انتهوا من اداء فريضه الحج وخلصوا
طلعوا من مكه متجهين لديارهم وهم بالطريق صاب الزوجه مرض ولعل هالمرض مستعصي
وأدى هالمرض اللي فيها الى وافتها قبل الوصول الى ديارهم وصلوا على الزوجه وادفنوها وهذا قدر الله
ويوم رجعوا لديرتهم استقبلهم الزوج اللي هو عياده وقالهم وين فلانه ؟؟ يقصد زوجته قال ابوها تطلبك الحلّ
وادع لها با الرحمه تكدر حال عيادة وصابه الحزن وتضايق وهو يحبها ويعشقها ومن بعد ما سمع هالخبر
وهو ما غير يدور في البر ويتمشى الحاله المهم وهو في البر جالس يكلم نفسه جاء له صديقن يقاله فريج
وقال يا عيادة وانا اخوك هذي حال الدنيا لا تحزن والمثل يقول من ماتت زوجته جدد فراشه ومن مات ابوه ملك امره
ومن مات اخوة انقصم ظهره وقال عياده لصديقه فريج يا فريج تعال باتسر ابيك قال فريج ابشر
ويوم جاء باتسر جاء فريج لعيادة وقال آمر قال عيادة اسمع يا فريج :

أمس الضحى نطيت راس الجبالـي =ودليت اجيب ابيوتنـا مـن مغنـه
وزعجت انا صوت الضحى من هبالي =بصوت طويـل وترفعـه راس قنـه
يا فريج انا ادري ينقدون الرجالـي =يا فريج ما يقـدر ضميـري يكنـه
يـا لايمـي بموادعـه كـل غالـي =عساك ما تلفي علـى بـاب الجنـه
يـا لايمـي مالـت عليـك الليالـي =تاخـذ عجـوز راقـط مستجـنـه

والعشق جرح غير ملموس لا يمكن علاجه كما قال الشاعر خالد السديري :

جرح قلبي عطيب ما يطيب =ـيدوك حالي كما عود الخلالـي
اداوي ولافــاد الطبيـب =ـيمن مضاريب خطوات الغزالي

ولا يستبدل العشق بعشق اخر فهو باقي لا بديله له هذا ما حصل لشاعر نمر بن عدوان
حين توفيت زوجته وقصته مشهوره قال فيها خمس قصايد رثائيه معبر عما يكنه من حب لها
ومؤكد ان لا بديل يحل محل زوجته وضحى حين قال :

لو جن بنات البـدو صـف تبـارا=على الحنايـا دللـن كـل خـوار
ولو جن بنات الحضر مثل المهارا=سطر الذهب بأرقابهن تقـل نـوار
ولو جن بنات اصليب فوق الشهارا=يا ما حـلا يشفيـن دق الاوبـار
ولو جن بنات الترك هن والنصارا=والهند واللي سكن كـل الامصـار
جني ضحى العيد وسـط النهـارا=وقالوا لنا يا نمـر طـب واختـار
ما أخذ سوى مضنون عيني اخيارا=الصاحب اللي فر عقلي معه طـار
فيهـا اخصـال وافيـات اكثـارا=ومثايـل فيهـا التفاكيـر تحتـار

فأذا تتبعنا قصائد ابن سبيل والقاضي وغيرهم من الشعراء نجد فيها العفه
اذا قال الشاعر نظرت او حبيت او التقيت انه صحيح
لكن يقولون ذلك على سبيل التسليه بالمجالس وكما قيل الشعر أعذبه اكذبه

ولا زال هناك شعراء ينزفون ألم وحسره على فقد احبتهم لانهم لا يجدون لهم متنفساً
لبث تلك الاحزان الا الشعر أبدعوا حق الابداع والشاعر محمد ال علي العرفج حينما
فراق محبوبته قال هذه الابيات :

يا عين من فرقا المحبين هلـي=دمع كما جمر الخلاص اشتعاله
نوحي وهليوارعدي واستهلـي=من ناظرولـم حقـوق خيالـه
ومن الولع ومصارم الجد تلـي=من حاير المكنون فضي مجاله
هاتي وهليما ذخرتي على اللي=بدر الدجى ماله يشابه جمالـه
ذباح ينعش وان تبسم رضالـي=وان صد واقفا حرق الجفن جاله

الشاعر سرور الاطرش شاعر من كبار الشعر الشعبي حصل بينه وبين زوجته خلاف
وسرور يحب زوجة حب شديد وبعد الخلاف اللي حصل بينهم زعلت الزوجه وراحت لاهلها
وقبل لا تروح قطعت خصله من شعرها الاشقر وحطته في جعبة الصيد حقت سرور الاطرش
خابرته انه مولع ومغرم بالصيد و بعد الفراق اللي حصل بينهم لا عاد هي تشوفه ولا هو يشوفها
ويوم من الايام اراد سرور ان يتقنص كعادة ووالله وهو يلقى هاك السرب من الظباء ويدخل يده
في الجعبة يبي يطلع له فشقه ودخلت يده في وسط خصله الشعر الاشقر وطلع الشعر وقام يناظره
بتعجب واستغراب وقام يشمم الريحه اللي فيه نسى سرور سرب الظباء وصار ما غير يناظر الشعر
نظرة ذكرته بزوجة الاوله فهاضت قريحته في ابيات قال فيها :

امس الضحى عديت في راس الاسمر=قعدت بـه ليـن اغتشانـي الظـلام
عديت فـي راسـه وقمـت اتعبـر=وهليت دمـع مثـل وابـل الغمـام
طرى على اللي كما الظبي الاعفـر=ريمـيـه قــادت لـــدق الادام
تقطف من النـوار وتعاقـب الجـر=تقطـف زماليـق اليهـق والخـزام
يـا عـل مـن كـدر علـي يتكـدر=وبحجر عينـه مـا يـذوق المنـام
يـا مرحبـا ترحيبـه مـا تنـكـر=ومكـثـر بــه ردود الـســلام
بك يا عفر بك يـا متركـا بالاحمـر=بك يا قمر نصـف بداجـى الظـلام

واخير هذا العشق والفراق والدموع والمحبة جسدها لنا الشعر الشعبي على اروع صورة
فلقد ابحرنا في عالم اخر مع هذه الابيات ففي هذا الشعر توهجت فيه الحروف وتالقت فيه الكلمات
وتبقى لحظة اللقاء بعد الفراق دائما تكون من اجمل لحظات العمر واختم قولي في قصيدة
كتبتها ارجوا ان تنال على اعجابكم واستحسانكم وهي :

ياناصر خنيفر توهج توهاج

--------------------------------------------------------------------------------

ياناصـر خنيفـر توهـج تـوهـاج=وسط سراديف الحشاء شي موجـود
يالله دخيلـك مالقينالـهـا عــلاج=كود السهر والهـم والعالـم ارقـود
غرون ركضبي بالحـلاء والتغنـاج=الردف عالـى والقبـل رزة نهـود
والخد صافي والنظـر سـم زعـاج=حلـو نبـاه ونايشـة جـل بالعـود
اودع معاليق الحشاء خرج وفجـاج=اشفق على حكيه ولو كنت مضهـود
حالوت افرج ضيقتـي يـم سوهـاج=هاك الديار مطوعـة كـل ممـرود
وقطعت انا ذيك الفيافـي والادبـاج=لعلـي اسـلاء عنـه وعـود بفـود
واجحد نواهيش الحشاء وسط الادراج=كود الغلاء ينقـص ولاكنـه ايـزود
كني سفينه ابحـرة رغـم الامـواج=تصقفبها الامواج والـوزن محـدود
وسببت اناء لمرافقي هـم وزعـاج=نوب اقول اقفي ونـوب نبـي نعـود
وغديت انا مابيـن بايـع وحـراج=هـم يحدربـي وهـم رقـاء سنـود
اخاف من الدنياء الغـدر والتبعـاج=اخاف انا ياخوك هالوقـت محسـود
وانا يابو تركـي لشـرواك محتـاج=يابن خنيفـر ماكـر العـز والجـود
اتم هل البيضاء مثـل عـد هـداج=وحنا لكم عـوان وبـدود وعضـود
وقت المغازي نهزم احزاب وفـواج=ونصد غارات ونثنـي وراء فهـود
جدي وجـدك ماوطـو درب منعـاج=حنا لنا عـادات وعـراف وحـدود
يازبن من صكو عليه العداء وهـاج=راسه شجاع ولا سبر درب مسـدود
عطني جواب فيـه للـدرب منهـاج=وزكي تحياتـي عـدد هبـت النـود

قصيدة من الاجهر للشاعر الكبير ناصر خنيفر بن براك
ارجو ان تنال ستحسانكم وتقبلو تحياتي - الاجهر

الموضوع الأصلي: القصص والاشعار الشعبية النادرة | | الكاتب: الاجهر | | المصدر: شبكة بني عبس

[الاجهر]

استلم الرد وسمحلي بالقصور حيث رديت على عجل



وهذا رد الشاعر ناصر خنيفر على قصيدة الاجهر

حي الجواب وحي زينـات الانتـاج=ماهل وبل ٍ ساقه البـرق ورعـود
وما يرسل الجوال من عال الابـراج=صنعت خبير الفعله المال مرصـود
وعداد من ودع ومـن راح حجـاج=وعد السنين وعد مايخضـر العـود
وعداد مافـوق الوطـا دايجـن داج=ومثمر ومازهر بالشجر كل عنقـود
ومنزاح ليل ٍ عن سنا الصبح ونباج=وموده بصحراء خاليه راعي الـذود
للاجهر اللي بالوفـا لابسـن تـاج=لاعدو اهل الجود هو من هل الجود
انا بحد السيـف وهـوه بالافـلاج=وناداء يقول انه من الحب مضهـود
يقـول عينـه ماتهملـج تهمـلاج=قلت السبب قال السبب ليـن العـود
وانا مالومه صابني منهـن ازعـاج=ياما خذينا مـن مواثيـق وعهـود
مجنون ليـلا بالخـلا يدلـج ادلاج=اصبح سفيهن والسبب نجلها السود
ولاشوف غير الرب هو راع الافراج=ربن معيش السرو في وسط جلمود
غيره فلابه يافتـا الجـود مخـراج=بثلاث ظلماتـن راعـا كـل مالـود

الشاعر الكبير / ناصر خنيفر

[العريض]

ههههههه صح لسانك ابوسعود وصح لسان ناصر يعطيك العافيه على نقل القصايد

[الاجهر]

تسلم على المرور تقبل اجمل تحيه

[سالم الرشيدي]

صح السنت الشعااار


ومشكور على الموضوع الراااائع


ولاهنت وننتظر جديدك

[ولد الشرقية]

صح لسان كلا من الشعار
ومشكور يابوسعود وتقبل تحياتي

[خاتم الرشيدي]

صح لسانك ابوسعود وصح لسان ناصر يعطيك العافيه على نقل القصايد

[المعزب]

صح السان الشاعرين