[عمران]

سلام الله سلام الله سلام الخاطر الممنون****على اللي شرف الحفل الكبير وتم تنظيمه

تفيض أبيات شاعر من مشاعر شعري الموزون****وأميز ماثبت بالشرع تحليله وتحريمه


وأنا وأنا وأعوذ من العنا لأهل الثنا مديون****سعوديَ ظفر بمعاهدة مولاه وزعيمه

يعيش المهرجان ان ماحتواه الجوهر المكنون****تراث أمجاد وأرث أجداد واضحة معاليمه

حفلنا وبرعاية من يقود المركب الميمون****على بر الأمان مجمل شكله وتصميمه

فهد والله فهد والله فهد مادون شعبه دون****حبيب الشعب واصل واصل شعبه وأراحيمه

على الوالد على القايد سلام أربع طعش مليون****من الشعب الكريم أربع طعش مليون تسليمه

تخص الفهد فردا فرد من عاشق ومن مفتون****نهيم بحب من صان البلاد وجالها قيمه

غرام رجال فيه رجل السلام وللغرام فنون****تجسد بالفخر والطيب والناموس والشيمه

عمرنا الأرض يوم الله عطا والمستحيل يكون****بدينا بالعمل باعلان ابوفيصل وتعميمه

بدا النهضة بثروات البلد واستخدم المخزون****وغنا الطير طير الخير واسمعنا ترانيمه

زرعنا القمح وأصناف النخل والتين ولزيتون****وفاح الورد والريحان بالغصن وبراعيمه

ولامومن قنط من رحمة الله والحيا مضمون****ولا يصدق منجم لو صدق للناس تنجيمه

ليا شفت السما تدقل مثل شقح البكار مزون****تحرى الرجع وابشر بالحيا واتبع مقاديمه

تحت قمرا قمر ماهل ضامر كنه العرجون****بزغ كامل وهذا هو ولا بالشوف تعتيمه

ملكنا الحاكم العادل ملكنا المؤمن المامون****ملكنا اللي على بذل العطا تصدر مراسيمه

ملكنا الداعي الواعي ملكنا الراعي المظنون****ف ظنتنا ليا لذنابه الحفنا بأكاميمه

ملكنا ظلنا ويظلنا صيواننا المصيون****الايالله الايالله لاتهدم لنا خيمه

ملكنا اللي يفك اعن الرقاب ويطلق المسجون****زعيم في قلوب الناس تقديره وتعظيمه

ليا قلنا ملكنا لامة الاسلام عز وعون****أبا النجدات والفزعات والدعمات تدعيمه

ندى الكف لو يجمع بكفه ماجمع قارون****عطاه المستحق ولا يحسب في مغاريمه

ولاأكرم منه ولا ارحم منه بعد الله حجا وركون****ولااسرع منه في نصر الضعيف اليا شكا ضيمه

ولا ابتع منه في قمع الحريب ولا يقال ظنون****حقايق من رفع راسه على شامان تحجيمه

ولاامضى منه وامضى من شباه الماضي المسنون****اليا عدو صواريم الزمان أصرم صواريمه

مكلنا يا مكلنا للمروه فيك طبع ولون****تحلي بالوفا وشيمة الاخيار إلك شيمه

جميع المسلمين امن المساجد يافهد يدعون****دعاهم ياجليل الملك ترعى فهد وتديمه

نصرك الله واذل عداك وامره بين كاف ونون****يمثل مايريد بزمرة الشر وشراذيمه

حماك اللي حما موسى ضحى عاشور من فرعون****فلق عنه البحر وانجاه من فضله وتكريمه

وأعز الله عضيدك عز عينك من وراك عيون****عيون ساهره من يمها مابان تثليمه

ولي العهد في خدمتك يرخص غالي المثمون****سلم راع العقال اللي ترازم عن مرازيمه

مقر الجود عبدالله هو المزبن هو المزبون****مزابن من شكا الحرمان والرمل ومفاطيمه

اليا قلت مواردهم على عد الروا يردون****معينه مرتكي تتبع مناظيمه مناظيمه
يده بكل لطف وعطف تمسح دمعه المحزون****يفرج كربته ويقوم باسعاده وتنعيمه

ولاننسى فضل سلطان وأهل الفضل ماينسون****ترك في لوحة العرفان للمعروف تبصيمه

مع الشكر الجزيل وقاصدينه بالثنا يثنون****جميله يبعد الهم المخيم عن مهاميمه

عساكم ياعيال العود يا اسود الوغا تحيون****حياة طيبة ياحزن من طاحت محازيمه

الاياعيال من قدم حياته للوطن عربوون****أخذ جرعة من الغربة وأخذ من نجد تطعيمه

يحن ويجتلد ويعن معسوف ويبل شنون****نوى عقد اللواء يامطيب الراس وصماصيمه

على سرج وظهر مهره وكور مقوس مرسون****يسوج ابها البطان مهجن ريمان من ريمه

مطا قبا تراقص بالحوافر رقصة المزيون****ليا طب المزين من يبا يجرا بتكليمه

سرى مسري السباع اللي تجاوب فالخلا بلحون****مجاهيم الذياب وقبل ماتجهم مجاهيمه

ابو تركي لفا يضحك حجاجه بالسعد مقرون****بنى وحده وحدد واكتمل رسمه وترسيمه

بناها واحتماها وارتفع منها قممم وحصوون****ملاذ الضيف والاجي ومن جتبه مقاسيمه

لنا الهيبة على شبه الجزيرة من ثلاث قروون****سلاطين تشرف صفحة التاريخ ومقيمه

أهل صحوة واهل دعوة واهل نخوة عرب وظعون****واهل منسب وسيف وتنشر العلم ومفاهيمه

ملوك مايهدمون القيم من طبعهم يبنون****أياديهم تشيد منبر الاسلام وتقيمه

كما ترسي شماريخ الجبال ملوكنا يرسووون****ليا قام الخفيف يرمي القش بمهازيمه

ليا عادو عدوا جاه العذاب وصابه الطعوون****يزوغ ومن وحمهم ترجد الحمى محاميمه

عليهم من فتح عينه يذر ابها الدوا مسحون****يعود مايشوف وصفقة بالوجه تعليمه

وعليهم من يفتل شاربه من قاعته محسوووون****وكم من شارب يفتل وافاق وضاع توهيمه

شوارب مانكرمها وشارب بالشحم مدهوون****ليا اوعدنا وفينا والوعد نصدق بتتميمه

ندافع عن عقيدتنا ومن هذا المكان نمون****ملازيم الرجال وكل رجل في ملازيمه

شريعتنا هي الدستور مابدل بها قانون****لنا منهج حياه وعصمة المسلم وتحشيمه

ندافع عن كرامتنا ومن يرضى الهوان يهون****يموت بذل من عقب المهانة موتة بهيمه

ندافع عن وطنا والوطن بارقبنا مرهون****ولو نفنا عن آخرنا من اوساطه لاقاليمه

يدينا من وراه وبالحضون الأمنه محضون****امانه لايضيع ولاتفرط به شغاميمه

سماسر الحروب المفسدين عن الوطن يخسون****خسى بس يخسى من ينوي اضعافه وتقسيمه

ولانسمع ولاناخذ كلام من خادع ملسون****لسانه يلحس اذنه ويتحااكى مع بلاعيمه

وترى التنديد والتهديد والتصعيد تلفزيون****كلام اعلام ناقص فاقد نصه وتقييمه

كما البالون ينفخ بالهواء ويطير البالون****يحوم شوي ويطيح الهواء ويخف تحويمه

هذا الوقت بهالجمع يتفرق والعميل يخون**** يكدر من دخل ساحته من كثر اساويمه

طفح كيل الأعادي يابلادي وامتلا الماعون****طغى وأزبد مثل موج البحر متعدي تيمه

خطير الكوكب اللي بات بانواع الفتن مشحون****والن صابه خلل يصعب على العقال ترميمه

نحذر من يفكر في حماقة ماتسر الكون****ومن يقدم يعض من الندم باطراف أباهيمه

يجيلك من الجهالة مايسبب لك عنا وغبون****يكدر جوك اللي بان صبحة وانقشع غيمه

ولا ترهي ولا تاثق من المجنون****يعرضك الصياح ويوقظ الفتنه وهي نيمه

يلوح المسجد اللأقصى من الدب الحمر شارون****عدو الله يدنس حرمة القدس بمناسيمه

يصول ويجتول كنه على ذبح العرب مأذون****يجرب ماتطور من سلاح ومن جراثيمه

يهودي تكشف عن سراير حقده المدفون****يبا يفشل وتصبح خاتمة هتلر خواتيمه

عطوه الضوء الأخضر وانطلق بامرع بني صهيون***جهاز آلي على الريموت تأخير وتقديمه

اليا دار الرحا ملعون حول واستلم ملعون****ملاعين تخطط في فنا العالم وتحطيمه

ولو دارت رحانا مع رحاهم دقق المطحوون***بقدرة مقتدر يمضي بهم حكمة وتحكيمه

الموضوع الأصلي: الشاعر خلف بن هذال | | الكاتب: عمران | | المصدر: شبكة بني عبس

[عاشق الصحراء]

اخوي عمران/
سلمت اناملك على النقل
لك فائق احترامي

[العريض]

صح لسان شاعر الوطن خلف

اشكرك اخي عمران على نقلك لهذي الرائعه

دمت بخبر .تحياتي لــــــــــــــــــــــــــك

[ابو محمد العريض]

مشكور اخوى عمران

[عمران]

الغريب حجاج العريض ابو محمد اللة لا يهنكم

[عبس404]

قصيده رائعه وصح لسان شاعرها مشكور على نقلها