[سيف عبس]

أعزائي القراء!
ما رايكم بهالقصيدة وقافيتها؟؟؟؟

يالقصور المنيفة فوق الأرض الهشاش=ما تغرين كود اللي فؤاده مريج
طبع وألا تطبع...عد وألا مشاش=فرق مابين شعر الملحمة والهزيج
مايبل الكبود اليابسات العطاش=كود وقفة وفاء...لارهدنه وتهريج
من يخلي رفيقه والركايب عواش=كيف ينفع رفيقه والركايب هجيج
والمكارم ثمنها عسر ماهو بلاش=ومرقب الذيب ماترقى عليه النعيج
جابر؟إسمع وصاتي:لايخاويك لاش=خل بينك وبينه مثل بحر الخليج
كل طير معا مثله تربى وعاش=مثل من يبغي الحجة يخاوي الحجيج
ودام غنيبك أعلى من نجوم الغباش=هاك مني شذا مسك وسفرجل وأريج
إترك اللي عن الطولات جاه إنكماش=ذاك خله وفاله جعل فالك بهيج
صادق اللي لعلم الطيب والمجد ناش=وإترك اللي على الغرات بحره يهيج
وصادق اللي إذا صادقت ماقيل ماش=وإحذر من النقيلي والخداج الخديج
النقيلي خدوع وبين الأصحاب واش=والخداج يهديك لكل درب عويج
وإحذر الكذب لو مبدأ طريقه دشاش=آخر الدرب تلقى ليتن وتعريج
ولو غدى رأس مالك ملحفك والفراش=عزة النفس تغني والمهونة تحيج
إفعل الخير تلقى خير والربح كاش=وإن شويت الشويه خل شيك نضيج
وإن بغيت الطماعة لاتحوش القشاش=عشبة الدار لاتذري ولابه نتيج
مايسرك ولدها في نهار الهواش=وإن تحدث يجيك الهرج هزل سميج
إغنم أيام عمرك جد ماهو طماش=باكر إن عشت بدلت المراكض دريج
تسكن بناطحات السحب وألا العشاش=تفترش ناعم الديباج وألا النسيج
مكسبك من حياتك قطعة من قماش=وأقرب الناس حيلته البكاء والنشيج
السعادة تراها ياعضيدي تحاش=بسنة اللي بذكر الله يلهج لهيج
مفرشه من حصير الخوص وألا الخشاش=وزاده العجو الأسود والمويه الهميج
وأذعنت له خصومه وإندحر كل غاش=ذاك من عم هديه كل فج وفجيج
قدوتك في نبيك وأنت لباس شاش=ولابس الشاش يعرف مدخله والنهيج
خذ نصيحة نصوح جات من حر جاش=مثل دلة غريب فوق حامي وهيج
دلة فوق نار وصادق البن طاش=ريحها زعفران وهيل وأزكى مزيج
للنشاما تعدى حيث فيها إنتعاش=تنعش اللي غدى لهموم قلبه ضجيج.

الموضوع الأصلي: الى جميع القراء مطلوب رايكم!!!!!! | | الكاتب: سيف عبس | | المصدر: شبكة بني عبس

[غاليه]

تبغى رأيي .. رائعه جدا" رائعه .. صح السانك وعلا شانك .. دمت بود .. تحياتي ..

[عبدالباري عبدالعزيز]

قصيدة رائعة والقافية الاخيره حدت من قوة الابداع
شكري لك

[مرزوق العجوني]

صح لساااانك اخوي سيف عبس ولا هنت على الرائعه تقبل مروري

[نواف العوض]

تسكن بناطحات السحـب وألا العشـاش

تفتـرش ناعـم الديبـاج وألا النسـيـج

مكسبك من حياتك قطعـة مـن قمـاش

وأقرب الناس حيلتـه البكـاء والنشيـج

السعـادة تراهـا ياعضيـدي تـحـاش

بسنـة اللـي بذكـر الله يلهـج لهـيـج

صح لسانك يالشاعر بصراحه قصيده جزله واتمنى لك التوفيق

[سيف عبس]

أشكر الجميع على مرورهم

[الهكرز الشويلعي]

صح للسانك ابصم بالعشره انه قصيده جميله

[جروح الوقت]

قدوتك في نبيـك وأنـت لبـاس شـاش

ولابس الشاش يعرف مدخلـه والنهيـج

صح لسانك ياخوي تحياتي لك