[WINDOWS]

بعد القطيف وقبل مفرق رحيمه

ياهيه ياللي غرك القـال والقيـل
وكثرت عليك علوم راع النميمـه

انا ترى ماعاد لي بالصبـر حيـل
ولاعدت اطيق المهزله والضليمـه

صحيح اجابه صدمة الوقت واشيل
والصبر مفتاح الفـرج والغنيمـه

واحـاول ادور للاعـذار تحليـل
واقول ماينسـى نديمـي نديمـه

لك بين ريضان الحنايـا مداهيـل
ولك فالحشاء حشمه وشيمه وقيمه

خوذي كلام اللي لياقـال مايميـل
وخلي كلام اهل العقـول السقيمـه

ياوردة(ن) مالت على ضفة النيـل
يهبهـا ريـح العبيـر ونسيمـه

انا احتدم لك وانثني واسرج الخيل
واعنّ لك واكرب لك شداد ريمـه

ثلثين ليل وثلث باقي مـن الليـل
بعد القطيف وقبل مفـرق رحيمـه

ترسل وانا مانيب يـم المراسيـل
لايابعـد غيـدا وريمـا وديـمـه

رسايلك توحي بقطـع المواصيـل
الله يبيح اللـي رعـاك ويديمـه

ماهو كذا تقفـي وذودي مباهيـل
وتهل دمعك مثـل دمـع اليتيمـه

جرحتني توك وانا جرحي محيـل
وهزمتني وانا مااعرف الهزيمـه

وانا جمل ياام الرموش المضاليـل
لوجاتني عرجـاء تعّـود سليمـه

الموت اهون لي ولادمعي يسيـل
وان ضاقت الدنيا ضربت الخريمه

ومن دون ربعي ازحم بمنكبي جيل
واصد طعنـات الزمـان الاليمـه

وان رحت عني جعل دربك تساهيل
وان جيتني غالي ونعمـل وليمـه

طبعي كذا مااركض خلاف الاقاويل
وحسيبنا محي العضـام الرميمـه



هاذي قصيدة للشاعر : محمد بن مريبد العازمي

الموضوع الأصلي: بعد القطيف وقبل مفرق رحيمه | | الكاتب: WINDOWS | | المصدر: شبكة بني عبس

[فيصل الرشيدي]

صح لسان الشاعر وتسلم على النقل الرائع


ربي يوفقك

[سعد بن عادي]

صح لسانك وبيض الله وجهك

[عيسى المويسه]

صح السان الشاعر الرائــع / محمد مريبــد

ولاهنت على النــقل




مع التحيــه



...

[سعد الفلاح]

يعطيك العافيه أخوي ويندوز وتسلم يمينك وصح اللسان الشاعر محمد مريبد

وتقبل مروري

[غادة بني رشيد]

قصيدة جميله تسلم على النقل

[WINDOWS]

شكرا لمروركم الكريم احبابي في الله

تسلمون علي تشريفكم

موضوعي