[رشيد]

.
.
.
أنا ما نمت لين الصبح طفى شعلة المصباح
وكيف انام والفكر اختلف وزنه وتركيبه
فتني صوته اللي مثل صوت البلبل الصداح
تغلغل في شغاف القلب ما احلى عذب تطريبه
سرق قلبي على غره نظير السارق المزاح
ولا شافه سوى قلبي وخذه وراح يجري به
ذبحني ما تخيلت البشر تذبح بدون سلاح
ولا خذت احتياطي ماحسب الاقدار تجري به
غضيض العود يتلدن قوامه مايس مياح
رشيق القد من قده صغير ماولج ريبه
حلو لا اقبل حلو لا اقفى حلو في الجد والامزاح
حلو وده حلو صده الا يا زين تعذيبه
تشرب في عروقي مثل عشق الأرض للفلاح
تمازج مع ثراها والزرع في ريفها طيبه
تمكن في خفوقي ثابت حبه ولا ينزاح
الا يالايمي جعلك تجرب بعض تجريبه
بغيت أخفي هواه ما قدرت اثر الهوى فضاح
وانا نايم وانا صاحي وانا مشغول اهذري به
أنا لو شافني مجنون ليلى رق لي ياصاح
وعاف العشق ودروب الوله واحرق مكاتيبه
سقى الله قبل اعرفه كان قلبي خالي مرتاح
قرير العين لاهم يودي به ولا يجيبه
-
#شعر// #علي_الحسني

.

الموضوع الأصلي: شعلة المصباح | | الكاتب: رشيد | | المصدر: شبكة بني عبس