[مرشد الصقعان]

هذه القصيده كتبتها في منقية ( الـــشــــعــل ) للشيخ /سعد الخنفور

وهي من الأبل التي قل من يملكها ومن الصنف الأول التي حركت مشاعري وكتبت فيها اقل القليل
كذلك ان ملاكها الاخوان /سعد ورديني الخنفور . هم أعلام القبيله الذين رقو في قبيلتهم وحلقو بها في
سماء المجد عندما مثلونا في مزاينات الأبل وكذلك في مجلس الامه الكويتي. بيض الله وجيهم علي نجاحاتهم التي
تعود لقبيلة بني رشيد العبسيه الغطفانيه العدنانيه. اما عن القصيده قدمتها أمام :
الشيخ/سعد الخنفور في مجلسه بمزرعته خلال زيارتي له والتي وجدنا عنده من خلالها,الجود ومكارم الاخلاق
الذي احسن استقبالنا وضيافتنا فله منا كل الشكر والتقدير والعرفان والى عضو مجلس الامه الكويتي أخيه/سعد الخنفور والقصيده اقول فيها :

الشعل جتكم عليها دق واجلالي=اللي اتنومس نهار العرض راعيها
لاطبت ارض المزاين تشرح البالي=عبسية بالمزاين نفتخر فيها
منقية لا وطت بالخايع الخالي=شعلن تسر النظر يا اللي اتراعيها
وان أهجلت صوب برقن ناض بخيالي=سرب القطا يوم أوصفها واحليها
منقية ما ملكها كل وبالي=الفوز والمركز الطيب امخاويها
أخذت الانظار في عدلات الازوالي=ماهي خساره يابن خنفور تقنيها
مثلتنا ياعريب الجد والخالي=في ذودك اللي تعيف اعداك طاريها
ومثلتنا ياسعد بالمجلس الحالي=كرامة الدار ضامنها ومحييها
يشهد لك المجلس اللي منصبه عالي=بحضورك أبعدت ناس عن كراسيها
والمشكله وان جهلها كل حلالي=شرواك يقلط عليها ثم ينهيا
أي والله انك فخر والحق ينقالي=امجاد عبس العريقه منت ناسيها
ورديني اللي اتمثل فيه الامثالي=رمز الكرم والمراجل مايخليها
يافزعة اللي حداه الوقت واشتالي=مباني العز مسسها وبانيها
وأخوانك اللي خذو منهاج الأبطالي=أخوانك اللي على العليا مساعيها
شهادة دون شك وريب واجدالي=أن أهل الطيب ماتنسى مباديها
في ظل حكم الصباح من اول وتالي=أمار ة ماطويل الوقت ماحيها
أخوان مريم خذو بالمجد منزالي=أمجادهم سجل التاريخ ماضيها
يالله يارب يارحمن يا والي=تعز الأسلام والأمه وتحميها

وســـلاااامتكم والشعل واصحابها يستاهلون أكثر.....

الموضوع الأصلي: قصيدتي في منقية الشيخ سعد الخنفور | | الكاتب: مرشد الصقعان | | المصدر: شبكة بني عبس

[سعد محمد]

قصيده جزله ويستآهل الشيخ - سعد الخفنور

وصح الله لسآنك وبيض الله وجهك ,

[عبدالهادي بن صبح]

الشاعر مرشد الصقعان صح لسانك كفيت ووفيت

وعضو مجلس الأمه/سعد الخنفور العجرمي يستاهل المدح وكذلك أخوه
جملونا في كل محفل ورفعو راية القبيله بالعز والطيب

يستاهلون المدح والشعل تستاهل

بيض الله وجهك وصح لسانك

[مرشد الصقعان]

اخوي عبدالهادي جمل الله حالك على المرور وتقبل فائق وودي واحترامي