[مهل الرويضي]

ا

لسلام عليكم ورحمة الله وبركاته



اخواني الاعضاء والزوار :

لكل شخص وجهة نظر في دفاعنا عن صفوة الخلق / محمد بن عبدالله (( صلى الله عليه وسلم ))
فأتمنى ارى ردودكم وآرآءكم على وجهة نظري ..

(( الــرســالــهـ ))

ياأهل النوايـا ( البيـض ) قـدام لابيـح=صلوا على ( محمـد وصحبـه وآلـه )
واللي يبي (ينصر) رسـول الله صحيـح=يسعى (بنشـر دينـه ويذكـر خصالـه )
ماهويشـق ثيابـه ويركـض يصـيـح=ويقـول ابـذبـح هاليـهـود الحثـالـه
انا ادري ان الوضـع يحتـاج تصحيـح=وان اليـهـود زبـالـةً مــن زبـالـه
وان النبـي (نفديـه) بالفعـل والبـيـح=وعـن مثلهـم يكـرم وتكـرم نعـالـه
لكـن لـو انـا نفتـح (العقـل) تفتيـح=أفضل ( جهاد ) اليا نشرنـا (الرسالـه )
(العقـل) مثـل التمـر يحتـاج تلقـيـح=(والمستحيـل ) التمـر يلقـح الحـالـه
الا بسبـب أنسـان ولا بسبـب ريــح=وكـلـه بـأمـر الله جــل جـلالــه
على كذا ( يامفصـح ) الهـرج تفصيـح=(العلـم ) رحمـه (والجهالـه) ظـلالـه
اربط حزام ( الصبر) لـو صـدرك يفيـح=واظرب (بسيف) العلم راس ( الجهالـه)
وصل (لهم) علمـك ولـو كـان تلميـح=وأهرج (بلهجتهـم ) علـى كـل حالـه
وأذا وصل علمـك ( لواحـد) بتوضيـح=عـزالله انــك (كاسبنـبـي) جمـالـه
لكـن أذا (جنحـت) بالعـلـم تجنـيـح=البرتـقـال ( تـفـسـده ) برتـقـالـه
ترى الذكاء ( تسليح ) من غيـر تسليـح=وسـلاح تحقيـق ( السـلام العـدالـه )
وكبر ( غبى ) روضـه ومليانتـن شيـح=واكبـر مصيبـه (بالزمـان البطـالـه)
ركـز علـى (الاهـداف) لابـد ماتطيـح=أذا سلاحـك ( علـم , صبـر وبسالـه )
للحـق سيـف ( وللرعيـه مصالـيـح)=وللديـن صـرح ونجدتـه مـن رجالـه
وربعي رجال العز (عبـس) الطحاطيـح=(بنـي رشيـد) أهـل الوفـا والشكالـه
يـوم انهـا بالصيـف والطايـح يطيـح=كـم فـارسٍ خلـوه ( يفقـد ) عيـالـه
بنحورنـا مـن طـاح بقريـح بقـريـح=كلـن معـرب بـيـن جــده وخـالـه
هذا وانا مـاودي ابقـى كمـى (مليـح)=اللـي يـدور ( مشكلـه ) مـن خبالـه
كـل ( القبايـل ) للمراجـل مشافـيـح=كـلـن بحـالـه دون حـقـه ومـالـه
وهلحين فـي حكـم الوجيـه المفاليـح=(آل السعـود ) أهـل الفظـل والجمالـه
في عهد ( ابومتعـب ) بعيـد المشاويـح=حاكـم حكـيـم وضــاريٍ للجـزالـه
سلام (( ياكحيلان )) نحتاج ( تصريـح )=بصدورنـا ( غيـظٍ ) ثقـيـلٍ خيـالـه
ان كان ( شفت الوضع ) يحتاج تصحيح )=(( ابشر بنا )) ياشيـخ فـي كـل حالـه

مهل مرزوق الرشيدي

الموضوع الأصلي: &* الــرســالــه *& | | الكاتب: مهل الرويضي | | المصدر: شبكة بني عبس

[فيصل الرشيدي]

الشاعر مهل ابن مروزق


بالبداية كل عام وانت بخير مقدما


وصح لسانك واعتلا شانك وبيض الله وجهك على هذه القصيدة الدفاعية للرسول صلى الله عليه وسلم


وجزاك الله خير ولاهنت

[عبدالعزيز الخياري]

وربعي رجال العز (عبـس) الطحاطيـح=(بنـي رشيـد) أهـل الوفـا والشكالـه
يـوم انهـا بالصيـف والطايـح يطيـح=كـم فـارسٍ خلـوه ( يفقـد ) عيـالـه

صح لسااااانك ابن مرزوق

وحق وواجب ان ندافع عن صفوة الخلق
،
محمد صلى الله عليه وسلم
،
قصيده وافيه
،
،
وكل عام وانت بخير
،
،
،
،
تقبل تقديري

[بدر الحشية]

اللهم صلى على محمد وعلى آله وصحبه اجمعين
صح لسانك اخوي مهل وهذا هو عين الصواب
مشششششششششششكور ولاهنت على النقل

[راعي البلها]

اللهم صلى على محمد وعلى آله وصحبه اجمعين
صح لسانك ولاهنت اخوي مهل على هذه القصيده الدفاعيه عن
سيد الخلق نبينا محمد صلى الله عليه وسلم

وتقبل مني خالص التحيه والتقدير
وكل عام وانت بخير
اخوك
راعي البلها

[بشيرالشويلعي]

صلى الله على محمد صلى الله عليه وسلم

يالله المستعان
ابن مرزوق بيض الله وجهك0