[عبدالرحمن هليل]

ابدى بذكر اللي بالاسرار علام .. الواحد المعبود منزل كتابه
ومن بعد ذكره جبت بوكي والاقلام .. ونظمت ماهاض الضمير وبدابه
أبيات من فيض القريحه والالهام .. منقية تشدى المطر من سحابه
تحمل بطيتها تحيات الاسلام .. مني لنبراس الكرم والمهابه
راع اليمين اللي على الطيب مقدام .. ابن الكريم اللي يشرف جنابه
من نسل ابن براك خاله والاعمام .. وعليه من جده وصوف وتشابه
فضي عليه من الفخرسبعة انعام .. الطيب طبعه والردى مامشابه
زبن الفقير اللي عليه الدهر حام .. من قل ماله مايحصل زهابه
وانا دخيلك يازبن كل منظام .. عن حال وضعي جيت اقدم خطابه
ديون واقسم معاشي تقسام .. اجارمع زود السلف والطلاب
هامت تراكم فوق متني تراكام .. وعلي اهلها مشتكين النيابه
ولالي بها حيله ولافيه مخرام .. والفقر نوخ في طريقي ركابه
والمال عندي صارمن عرض الاحلام .. مبطي وانا بيني وبينه حرابه
باسبابها كرهت زادي ولاانام .. والقلب مماصارضاق الفضاءبه
تاهة بي افكاري وحارن الاقدام .. والوقت الاقشر حطني تحت نابه
يومين يصفى ويتكدر معي عام .. وعزي لمن مثلي زمانه غدابه
والناس صاروا مع هل المال خدام .. واللي قليل المال مااحدن درابه
حطوا كثير المال فارس وضرغام .. لوكان مايسوى جناح الذبابه
وخلوا قليل المال من عرض الاغنام .. لوهو من اللي باللزوم يعدابه
ولالي سواك بهالزمن درع وحزام .. ذخري ليامال الزمن وانقلابه
يامسندي لاكشرت سود الايام .. لاصرت جنبي ماشكيت الغلابه
لعل بشراها ترفرف بالاعلام .. ويطيب وضع اللي تكدر شرابه
في فزعتك ينزاح حزني والاوهام .. والقلب يدله عقب طول صوابه
وادعيلك المعبود خلاق الانام .. في ساعتن كلن تحرى حسابه
عساك في دنياك ماتشكي اسقام .. الله يحفظك من زمان الغلابه
وبالاخره تنزل منازيل الاكرام .. وتصيرفي جوار النبي والصحابه
دامك من اهل الخير كفال الايتام .. اللي يفكون النشب والطلابه
ولاني بماقلته مجامل ونمام .. والمدح باللي مااستحقه معابه
واهل الوفاء بين العرب ذكرهم دام .. والطيب يكفي صاحبه في غيابه

الموضوع الأصلي: اهداء للاستاذ ريس مجلس الاداره/فضي البراك | | الكاتب: عبدالرحمن هليل | | المصدر: شبكة بني عبس

[عادل بن هون]

الله يحل كربتك

يستاهل ابوفيصل الخير

[فضي البراك]

صح لسانك
واتمنى انك تفتح الرسايل عندك

[وليد البراك]

صح السانك وبيض الله وجهك

وعزالله ان فضي يستاهل كل خير ويستاهل المدح

[عادل العويمري]

صح السانك وبيض الله وجهك

وعزالله ان فضي يستاهل كل خير ويستاهل المدح

[سالم الرشيدي]

صح السآنك ويستاهل المدح ابو فيصل
والله يحل كربتك ويسهل امرك

[سعد محمد]

صح لسانك أبيات جزلـه وابوفيصل جزل

ويستآهل المدح .

والله يسهر أمرك

[سند الداموك]

صح لسانكْ ياعبدالرحمن

ويسستاهل فضي