[عايض بن صالح]

السلام عليكم ورحمة الله وبركاته

اليكم هذه القصيد التي تعبر عن نفسها ارجو ان تنال اعجابكم

ايام مرت بدون الوان للصوره=عنها الروايه تناقل مثل الاحلامي
عند اكثر الناس معروفه ومخبوره=حياة بدوان عنها بعيد الاعلامي
واللي لحق وقتها معها خذا دوره=اما سرح بالبهم والابالاغنامي
والاسرح بالركايب وامتطا كوره=احيان راكب ونوباً حاف الاقدامي
ومن كثر مايوده الها انبح حنجوره=مع هالفيافي ورا عجفات الاسنامي
يلفح شليله وراها فاتحاً زوره=وعقال ذوده طواه بوسطه حزامي
وسلاحه اللي معه شلفا وباكوره=ويجر صوت الهجيني عذب الانغامي
وعيون ذوده ال ركبيه ومقهوره=واليارزمت بالحنين حوارها قامي
يومي بذيله ويدغرها بدنقوره= وهي تحطم عليه وترزم ارزامي
واحيان يبهل عليها ونوب مصروره=يحسب حساب العرب غبوق ويدامي
واليارحل فوق زمله شال مضهوره=واليا رغا شعيل حط بخشمه اخزامي
والصيد داره مباحه ماهي محضوره=وراع المقانيص مثل الجايع الضامي
واليارقا بالطويل ومد ناضوره=ياكثر ميشوف من صيد الفلا النامي
في جو قفريتاً بالخير مذكوره =ماعمر جاها وعود مفلس الرامي
ماحد حزم الفزير ومارفع قوره= وماحد عمعم وذيك اللّوب من شامي
وماحد الابيض على قدره وعثموره=وصهلوج ريع الهوى والعاجر الزامي
ياحبي الها عساها دوم معموره=اديار ربعاً عزاز نفوس واكرامي
بدواً قبل لايبين الصبح في نوره=والنار تشعم وصوت النجر هندامي
والياتلافو عليها رايهم شوره=اهروجهم مادخلهاهرج نمامي
نياتهم صافيه والحال مستوره=ماعندهم كثرة الشكه والاوهامي
ماهمهم غير شوف الارض ممطوره=من شان يرعون فيها العشب لاقامي
لاشك هذا زمان وفاتت عصوره=وجانا زماناً كثيره فيه الاخصامي
ناساًُ تحارب وناساً تلعب الكوره= وناساً كثيرين مايصلون الارحامي
حتى الزيارات للجيران مهجوره=رغم ان فيها حديث اينص واحكامي
دنيا غريبه ومنها الناس مذعوره=ياسرع الايام فيها وسرع الاعوامي
ودورات الافلاك بأمر الرب ماموره=الله يهين العداء ويعز الاسلامي

الموضوع الأصلي: (بدون الوان) قصيده عبسيه عن حياة الماضي | | الكاتب: عايض بن صالح | | المصدر: شبكة بني عبس

[القرناس]

الاخ عايض بن صالح احسنت قصيده اكثر من رائعه صوره جماليه مكتمله حبكت شاعر متمكن...بدو قبل لايبين الصبح في نوره*والنار تشعم وصوت النجر هندامي
ثم تحكي عن واقع مؤلم..ناس تحارب وناس تلعب الكوره*وناس كثيرين مايصلون الارحامي
لافض فوك ياشاعر

القرناس

[ابومالك]

ناسـاًُ تـحـارب ونـاسـاً تلـعـب الـكـوره
وناسـاً كثيـريـن مايصـلـون الارحـامـي
حــتــى الــزيــارات لـلـجـيـران مـهــجــوره
رغم ان فيها حديـث اينـص واحكامـي
دنـيـا غريـبـه ومنـهـا الـنـاس مـذعـوره
ياسـرع الايـام فيهـا وســرع الاعـوامـي
ناسـاًُ تـحـارب ونـاسـاً تلـعـب الـكـوره
وناسـاً كثيـريـن مايصـلـون الارحـامـي
حــتــى الــزيــارات لـلـجـيـران مـهــجــوره
رغم ان فيها حديـث اينـص واحكامـي
دنـيـا غريـبـه ومنـهـا الـنـاس مـذعـوره
ياسـرع الايـام فيهـا وســرع الاعـوامـي
صح لسانك يابوصالح على هذه القصيدة الجميلة ولاهي غريبة عليك وبيض الله وجهك وتقبل تحياتي

[ابن كندآف]

مشكووور علالقصيده والله يعافيك

[سالم الرشيدي]

صح السآن شآعرها وتسلم يمينك يابو صالح

[ذرا عبس]

صح لسانك يابو صالح علا القصيده بالوانها العبسيه

[منصور غنيمان]

خير القصيد باب النصايح
وبيض الله وجهك وصح لسانك

وسمحلي زودك من الشعر بيت من قصايد الشاعر سماح غنيمان رحمه الله

احدن كسبه لربعه علوم النواميس
واحدن كسبه لربعه علوم وهذاري

[عويض بن شامان بن خلف]

صح لسانك يابوصالح
جزل وعادتك الجزاله
قصيدة وافية بيض الله وجهك