[جراح الوهيداني]

مقـــــــال رائع جـــــــدا للكاتب (( ابو طارق )) قرأتــه في مجلة فواصـــل

العدد 188 بتاريخ 1 سبتمر 2006 م

وحبيـــت انقلــه لكم أتمنى انه يعجبكـــم 0


كيف تصبح مثقفا في أسبـــــوع ؟ !


اتبع النقاط التالية وانضم إلى عالم المثقفين :

1 - البس غترة وامحط اللحية و الشنب 0

2 – إذا سألك احد من تسمع له قل لفيروز وشادية حتى لو انك ماتسمع الا لمزعل وسعد جمعة 0

3- إذا قالوا لك من شاعرك المفضل قل محمود درويش وأدونيس حتى لو إنك ماتقرا

الإ لــ(( ضيدان بن قضعـان وسعد بن جدلان ))0

4- ابتعد عن المباشرة في الكلام واعمد الى (( التعفيط )) و(( التمطيط )), وبدل

ماتقول (( في البداية)) قل: )) بادىء ذي بدء )), وبدل ماتقول (( وهذا يدل على ))

قل: (( وهذا إن دل فانما يدل على ))00 لاتقعد تقول صعبة ومشوار

ومدري إيش 00 لازم تصبر وتحمل 00ترى الثقافة مهيب سهلة !!.

5- اذا كتبت مقالا فلازم تطعمه ببعض الكلمات الرنانة واللي مالك غنى عنها

مثل : ((الراديكالية والإمبرالية والليبرالية والدماغوجية والميكافيلية))

ولاهوب لازم تحطها وانت تكتب المقال لا00أبد اذا قضى المقال فلفزهن

قيه كلمة منا وكلمة مناك, الين يقضي , وان ماكتبت منهن شيء تراك من جنبها

بالثقافة لوتحفظ سبعمية الف كتاب , وتقرأ ثمانمية الف موسوعة, وانتبه ليك

تقول )) : الرأسمالية والاشتراكية والقومية )) ترى ذا الكلمات حقات المثقفين

منول000 اما هالحين ماعاد يوكلن شيء 000

6 - كثر من الكلمات الي تنتهي بــ(( قراطية )) مثل الديمقراطية ,البيروقراطية

,الأرستقراطية ,الأوتوقراطية ,التيوقراطية , واذا انزنقت (( فخربط )) لك أي كلمة

واختمها بــ (( قراطية )) مثل التبوقراطية والخنبقراطية والخربوقراطية ولاتخاف مافيه

احد يبي يسالك وش معنى ذا الكلمة علشان ماينكشف ((جهلة)) ويدرون الناس انه مهوب مثقف 0

7 - خربط لك أي كلام بس بشرط انه يكون(( مبهم)) وغير مفهوم, واهم شيء اكتب

فوقه ((شعر فلان بن فلان ))علشان يعرفون القراء انه شعر حداثي00 لايحسبونه مقال وإلارواية 0

8 - انتبه ليك تؤرخ بالهجري حتى لو كان هو تاريخ المسلمين ترى المثقفين مايؤرخون

الا بالميلادي ويفضل بعد انك اذا كتبت قصيدة حداثية تكتب الشهر كتابة مهوب رقم زي

كذا (( مارس 2004 , أبريل 2005, حزيران 2006)) أما ذا الشهر حق مثقفين بقوة وينصح

بعد ذلك إنك تحط تحت التاريخ اسم أي عاصمة أوربية (( لندن , جنيف , باريس))

حتى لو انك كاتب القصيدة في حريملاء وإلا شقراء 0

9 - إذا جاء معك مقابلة في التلفزيون ((حش)) في الشعر الشعبي وشرشحة حتى لو انك تحبه

وقل انه شعر البسطاء والعامة والدهماء وأنه معول من معاول هدم اللغة ولابد من إعلان

الحرب عليه دون هوادة !!

10- اذ سألك أحد وش الجرايد اللي تقراهن انتبه تقول له الجزيرة و الرياض !!عشان

مايدري انك قروي , لا 00قل له الحياة والشرق الأوسط والاقتصادية حتى لو انك مابعد

شفتهن ((على الطبيعة)) 00 بس لزوم الثقافة 0

11- اذا قال لك احد وش الأجواء الي تجد فيها نفسك لاتفضحنا وتقول اذ جلست مع أهلي وإلا

إذا طلعت للبر وإلا إذا صرت أضبضب!! لاياحبيبي , قل له أنا تأسرني الليالي البيروتية المقمرة

وخصوصا في فصل الخريف حتى لو انك ماتفرق بين الخريف و((المربعانية))0

12- حاول دايم انك تفلسف وتلف وتدور في كل شيء وفي كل إجابة حتى لو إن الجواب حرفين

خله عشرة سطور , وكثر من الكلامات الي ماتفهمها علشان مايفهموها الناس ويتأكدون بما

لايدع مجالا للشك انك من كبار المثقفين 0

أغسطس / آب 2006

جنيــــــــــــف

الموضوع الأصلي: كيـــــــف تصبـــح مثقفـــا في أسبـــــوع ؟ ! | | الكاتب: جراح الوهيداني | | المصدر: شبكة بني عبس

[ابوصالح]

الف شكر على نقل الموضوع الرئع

وفعلا كلام صحفي صحيح ميه بالميه

هذ الي حاصل بلوقت الحالي

شكراً لك اخي الكريم

[فيصل الرشيدي]

هذا ما يسمى القناع المزيف


اشكرك على النقل اخوي جراح على ما تطرحه من متميز

الى الامام وفقك الله