[عبدالعزيز الخياري]

السلام عليكم ورحمة الله وبركاته

ردية من كلمات الشاعر ناصر القحطاني

وقام بألحانها خالد عبدالرحمن


تم تصويرها تلفزيونيا لصالح بعض القنوات الفضائية وعرضت في قناة الساحه..

وهنا ننشرها لكم.



ناصر :

سلام والمركب عليه اثنين والساعه تدور =والموج هادي والوعَد قدّام والرحله ذهاب
إنْ غابَوا الاجواد ما غابوا من اقفاص الصدور = دقّ الجرَس والعلم عجّل به بعَد طول الغياب

خالد :

يا مرحبا يا صاحبي واعبر بنا سبْع البحور =عَليَّ ادِير البوصله ..وانت الله الله فالزهاب
أنا سمَعت انك تحَدّيت الذيابه والنمور=والعام لك قلبٍ خضَر واليوم ما كنـّك شباب

ناصر :

الوقت قاسي والفتى يبقى على الشدّه صبور = وإنْ ما غدا الرجّال ذيب يطيح بأنياب الذياب
حتى الصديق الله وكيلك صار دمّه ما يفور =وأنا لقيت الاصدقا معظمهم اشبه بالسراب

خالد :

لا تامن الدنيا ..ولكن لا يجي قلبك فتور = أحْدٍ يشوف احلى البنات وْلا يجي فيه انجذاب؟
ما للحباري فالقنـَص يا كـُود هَدّات الصقور =وإنْ ما كفـَخ طير الفضا معْناته انّ الراس شاب

ناصر :

كلـّش وَلا قطـْع الرجا فالطيّبات مْن العطور =لكن على شرع الله وسنة نبيّه والكتاب
بـِيض العذارى عسجديّات الجسَد ضُمْر الخصور =سُود العيون مْجدّلات الروس تلعَات الرقاب

خالد :

بالله قل لي ما برا جرحك بعَد بدْر البدور = ما عَوّضَوك الفاتنات ( الذاهبه ) والجرح طاب
كم واحدٍ لو مَرّته مزيونه بعمْر الزهور = ضاعت علومه والصواب .. الله يجيبك يا الصواب

ناصر :

أحْدٍ على الدنيا وهُو كنـّه من اصحاب القبور= وأحْدٍ يجي ويروح معْ خِلـّه وهُو تحْت التراب
يا اللي نسيت انّ الهوى يبقى عَلى مَرّ العصور =بنشدْك عن برْق سرى بك وانت من فوق السحاب

خالد :

معَلـّمك يا صاحبي بالسالفة والعلم نور = وش بك تقول الشمع ذاب .. الشمع ما يمْديه ذاب
والبارق اللي مَرّني وانا ادعي بقلبٍ شكور =هذاك خير ٍ طاح بأرض الغير والرب استجاب

ناصر :

وش بينك وبين المدينه والشوارع والقصور =ما قد شبَعت مْن الخلا الخالي ومن روس الهضاب
الناس ما تبطي ولو راحت مراويح الطيور = ترمي تعَبها فالبيوت وتستريح مْن العذاب

خالد :

البَرّ يشرح كل صدْر ويقلب الضيقه سرور =وأنا الى جيته يمرّ الوقت ما احْسب له حساب
يا ما حلا طوْيَ الخبُوت وسجّة الخاطر شهور =وَلا معَك غير النشاما اللي يعزون الجناب

الموضوع الأصلي: ردية ناصر القحطاني و خالد عبدالرحمن | | الكاتب: عبدالعزيز الخياري | | المصدر: شبكة بني عبس

[سعد الشقل]

صح اللسان الشاعرين ناصر القحطاني والشاعر خالد عبدالرحمن

يعطيييك العافيه يا عبدالعزيز على المجهود الرائع


تقبل تحيتي

اخوؤك سعد المهيمزي

[عاشق الشبكة]

مشكوووووور اخوي
عبد العزيز

بكل صراحة عجبتني كثير وخصوصا
الفيديو الكليب
وخالد عبد الرحمن من نظراته
وتوزيعه الابتسامات احسه مبسوط
على الرديه

عموما اشكرك اخي العزيز تحياتي لك
اخوك
عيد

[الأشقح]

صح اللسان الشاعرين ناصر القحطاني والشاعر خالد عبدالرحمن

يعطيييك العافيه يا عبدالعزيز على المجهود الرائع


تقبل تحيتي

[عبدالعزيز الخياري]

الاخ العزيز والمشرف : سعد الشقل

شاكرلك مرورك

[عبدالعزيز الخياري]

عاشق الكتابه
حياك الله وانشاء الله ننزل كل ماهو جديد من المحاورات التي تستحق النقل

[عبدالله عوجان]

ثنائي من نوع فريد

ناصر القحطاني ملك الشعر
خالد عبدالرحمن ملك الفن

الساحه لازالت تردد القصيده بين الحين والاخر
مبتهجه بعودة شاعر الأندلس ومخاوي الليل
بعد غياب طويل

تسلم ياعبدالعزيز وبيض الله وجهك

[عبدالعزيز الخياري]

الاشقح أسعدني مرورك الكريم