[ماجد الذيابي]

--------------------------------------------------------------------------------

الله يوم إنك صغير لو تذكرها
كنت أصغر عيالها وأكبر امانيها
كنك مرايه لها لو ماتناظرها
ماكحلت عينها ولا حنت إيديها
مرت عليها ليالي ماتصورها
لو قلت ماقلت ماصورت ماضيها
واتحملت من همومك في خواطرها
من وين مارحت او ماجيت ماليها
من أول الخطوة اللي في تعثرها
حتى آخر الخطوة اللي تو ماشيها
تسقيك منها وتلعب في ضفايرها
ايدين تروى عروقك من سواقيها
وان نامت الليل صحت لك ضمايرهاتخاف تحتاجها والا تناديها
كم لعبت قد شرتها وانت تكسرها
ومرة ثانيه ترجع وتشريها
تقدر على كل شيء بس خاطرها
مايحتمل دمعة في عين غاليها
ما تذكر دروسك اللي ماتذاكرها
وخوفها وانت وسط البيت ترميها
بشرتها بالنجاح وهل ناظرها
يادمعة للفرح سيلي وضميها
كم ليلة غبتها وابطيت ساهرها
نامت وقامت وخافت من تواليها
تجلس ورى الباب وتقلب ستايرها
وتذوي مثل شمعة بالبيت ناسيها
تذوب واجفف الدمعه على اخرها
ياخوفي انك على هالحال تنهيها
ماهي بحمل السهر حتى تسهرها
اليوم شابت وحق انك تراعيها
ماهو بحق عقب هالعمر تنهرها
لا اطير عنها وريشك حطت ايديها
وليا تزوجت خذ بنت تقدرها
تبر فيها مثل برك وتغليها
حتى لو الزوجة أخطت دون خاطرها
وسوت لها حاجة ماهي بترضيها
قل يامره هذي امي في خواطرها
شيء ولا ودها تقول وماليها
ولا يزعلني الا اللي مزعلها
ولا يعنيني الا اللي معنيها
وشلون ابصبر على اللي مايقدرها
الله لايخلي ترابي من مواطيها
نصيحة قلتها للي تذكرها
الوالدة كلمت صعب معانيها
ياللي عيونك على الجنه تناظرها
طلبك غالي ولكن تحت رجليها
الى من احبها قلبي ادعو الله ان يجعل يومي قبل يومها

الموضوع الأصلي: الله يوم انك صغيرلو تذكرها | | الكاتب: ماجد الذيابي | | المصدر: شبكة بني عبس

[بدر الرويضي]

شكراً لك اخي الكريم

صح لسانك

[مرزوق العجوني]

صح لسانك ياماجد وتقبلي تقديري

[ماجد الذيابي]

شكرا للجميع على المرور الكريم

[عاشق الصحراء]

صح لسانك ويعطيك العافيه وتقبل مروري