[معيوف ابن زهيميل]

أيها الإخوة في منتدايات قبائل بني رشيد
إليكم هذه المساجلة التي جرت بيني وبين شاعرنا
الكبير(شاعر الجماهير) ناصر مرسال،لعل أن تنال أستحسانكم
،واستبيح شاعرنا عذراً وأشكره على تواضعه
أقول:-

الصبر مر وسقم عيني ماتحت كم العباه = أضيق يوم أشوف من يدري وكنه مادرا
ماينتصورثقل مايقرأ بتاريخ الرواه = لفح الرياح إيصحي النايم ،من أقراع الهرا
أعاذنا الله يازمانٍ طولت دورت رحاه = صوت الرحى طيّر عن عيوني هماليج الكرى
العالم ألها باتجاه وعيني ألها باتجاه= وأنا مع العالم سواءً فالبحور وفالعرا
خيّال وأغزي مثل ماتغزي على الخيل الغزاه= قدام أناظر ما لتفت يوم المواجه للورا
حتى شكى قلب المعنا بغض داره واقصراه= وأعذر بخلان الرخاء وهم بديره وأقصرا
وش حيلة اللي كل يوم يزيد من جرحه عناه= من قرب ناسٍ بالآثام وبالجفا شبه أخشرا
هذا مولّم له عصا وهذا مولّم له حصاه=جمّعهم الله بالشعابه ناس مرضى و أفقرا
متمسكينٍ بالقناه اللي عدوفيها الجناه= يومون فيها اتْجَار سوق عكاظ بيع ومشترا
صارت حصاة ارزاح ماتنزاح عن درب الغناه= تعب الفريق من البسيطه واستضاق من القَرا
ياكثر من فارق هله منها يبا منها النجاه= ومن حر مابه فك حبل الدلو من نص العرا
غنتبها ورقا الحمام ودورجت فيها القطاه= والحر جاز من الثريا واتجه يم الثرا
والناس ما ترحم وعسر الناس من عسر الحياه= والبر يوحش والهبوب العاتيه شال الذرا
والذيب ماهورول عبث ، هرول حداه اللي حداه=جر العوا مابين (يثرب) و(العلا) و(أم القرى)
شبحه بعيد وناظري يمه وأنا عارف بلاه= يسرق غطاليس الغروب أليا غطى حم الذرا
والله مالومه لو زعج بين الرجوم أطول عواه= من يذخر الصوت الرفيع اليوم عن وقت الزرا ؟
سلام يا اللي كل ما اسمع بيت شعره وأمعناه= أقول هذا الشعر للأشعار ساده وأومرا
لبو وليد، الله لايقطع رجاه بمارجاه= ناصر ولد مرسال شاعر لين مايبقى أشعرا
أصفى من الماء البُِخْشْ وأعذب من نهرظِف الفراه= وأغزر من أعماق المحيط بما يورالي وارى
يوم الملاقا في بطولات السباحه والرماه= حدا مقابيس الوغى تصافح عقب رد البرا
سيد النشاما بالشهامه والكرامه والوجاه= رؤس العوارف تنحني له لاجل حلوات الطَرا
من طيب ذات وطيب ساسٍ عقّبه جده لاباه=أقولها صادق ولالي بالمجامل و المِرا
ولاهو قصورٍ بالنشامى امن الحضر وامن البداه= ماني على ظلم الآوادم بمحدّيْ أُو مجبرا
طبعي كذا ورأيي بقوله لو على أسماع القضاه=الأمر واسع ، والرجل لصار طيّب يذكرا
مايغيب ذكره طالما أن الجدي باقي في سماه= شاعر كبير أمجّده معروف ليس منكرا
من لابتي وأنا بهواي وكل واحد في هواه=أبا أمدحه والمدح بأعراف العرب شرحه سرا
وأزكى تحايا من رحابي عد ماتقام الصلاه= فـرحاب طيبه ثم فـرحاب الحرم..(بأم القرى)

رد الشاعر ناصر مرسال

الصبر مفتاح الفرج0كم صابـرٍ حصـل جـزاه= والضيق ضيق القبر ومواجه نكيـر ومنكـرا
والثقل ثقل اللي أبت من حملها جبال السـراه=اللـي حملهـا الآدمـي لانّـه ظلـوم مغـررا
وألاّ الزمن ثابـت ولافيـه اختلاف بمستـواه=الاختلاف بمستـوى كتلـة بليـس الاعـورا
ولاختـلاف بوجهـة الانظارمحـدودٍ مــداه=إلاعلى من غايتـه سلـك الطريـق الايسـرا
اللي يبا الله يـارث الدنيـا وهو على عمـاه=لانـال ودّ ولانطـق حـق وغليلـه مـابـرا
والحق بيّن مثل ضؤ الشمـس مافيـه اشتبـاه=لويتصـاور كارهـه يسقـط بعيـن الاصـورا
والآدمي فكـره دليلـه لوهـوا نفسـه نحـاه=والرابـح اللـي يقتنـع وأمر القنوع ميسّـرا
والمؤمن اليامن عطا من ماعطـاه الله0عطـاه=خيرٍ منه والعلم بان لمـن كتـب ولمـن قـرا
والشعرياهل الشعرمثل النؤ فـي مزنـه ومـاه=نؤّن يمر ونؤ منه العـرق والغصـن اخضـرا
والشعر يكمن بالحكم وغموضه أهداف معنـاه=لولى غموض الشعر كـلٍ عـن مراميعـه درا
والذيب ماهرول عبث وإن جاع مضمونٍ عشاه=يشبع0ويشبع من عشاه ابا الحصين الازهـرا
ماهمـه الداعـي ولارده ولاصـابـه دعــاه=ياما وياما طقت براسه مـن الجـوع وسـرا
ذكّرني الذيب بصحيبٍ شهـم يسعدلـي مسـاه=ذيبٍ من ذياب الجبال اللـي ورا الهقـوه ورا
الشاعراللي يفـرح الصدقـان ويكـرّه إعـداه=اللي على العليا رباء واللي على الجزله ضـرا
زبن الدخيل اللي دخل بالوجه عن ضيم إخصماه=في يوم تحديدالمصير وفـي ضحـى ردالبـرا
معيوف0شيخ من الشيوخ اللي لهم جاه وجـاه=من رؤس عبس اهل الظفرسكان ابان الاحمرا
إبن ازهيميل الشجاع اللي رضانا مـن رضـاه=عظيـم بالوقفـات والعظمـى بعينـه تصغـرا
يامرحبا ترحيب مالي قصـد ثانـي مـن وراه=إلأ معـزّه0 والقديـر بكـل حــال مـقـدرا
حييت ياللي وقفتك تبنـي هـرم عالـي بنـاه=شيدت سورٍ كبرسورالصيـن وأعلـى واكبـرا
عندي وصيّه وانت من ناسٍ يحفظون الوصـاه=خلـك وسيـع بطـان لومـن تنفعـه يتنكـرا
الناس خطّاءؤن وأكثرهم مايـدري وش خطـاه=والبعض منهم لـودرى يـدري وكنـه مـادرا
والمسعد اللي لاعمل معـروف بالدنيـا نسـاه=امـا عليهـا يشكـرا والاعليـهـا يـؤجـرا
وختامهـا صلّوعلـى المختارمرسـول الإلـه=إعداد ماخيّـل مـن المنشأ سحـابٍ وأمطرا

الموضوع الأصلي: ناصرمرسال ومعيوف ابن زهيميل وابان الاحمر | | الكاتب: معيوف ابن زهيميل | | المصدر: شبكة بني عبس

[عبدالعزيز الخياري]

مساجله من شعراء غنيين عن التعريف

شاعر الجمــاهير ناصر مرسال وشاعر المنتديات معيوف بن زهيميل

والمسعد اللي لاعمل معروف بالدنيا نساه
اما عليها يشكرا والاعليها يؤجرا

صح الله السنتكم ولاهنت على النقل

[مسندالعويمري]

بسم الله الرحمن الرحيم

الشاعرمعيوف ابن زهيميل

الشاعر ناصر مرسال

السلام عليكم ورحمة الله وبركاته

اخي معيوف انت شاعر عودتنا على عذوبت القصيد فلك جزيل الشكر والعرفان وافي وصح السانك

اخي ناصر انت شاعر المعنا لا تهاب الخصم صاحب الموال شاعر الجمهور فلك جزيل الشكر والعرفان

الشاعرين الاوفيا كفيتو بهذي المساجلة التي جرت بينكم فجمهوركم في نتظار جديدكم

[راشد الخلاوي2]

الشاعرمعيوف ابن زهيميل بيض الله وجهك على هذا النقل للقصائد الرائعه صح السانك
الشاعر الكبير ناصرمرسال الخياري كثر الله من امثالك ابداع تواضع ثقه لاحدود لها

معيوف0شيخ من الشيوخ اللي لهم جاه وجـاه=من رؤس عبس اهل الظفرسكان ابان الاحمـرا

يالله تستاهل يابن زهيميل انا اشهد انك عرفت من تسندعليه
اخوكم راشدالخلاوي2

[أنكسارحلم]

قصائد روعة معانيها من روعة اخلاق اصحابها
شعراء لهم قدر ومكانه .
لاستطيع التعبير لكن صح الله السنتكم جميعا

تحياتي

[نايف سليمان]

مساجله من أجمل المساجلات التي أطلعت عليها



صح لسان الشاعرين معيوف بن زهيميل والشاعر ناصر مرسال



تقبلوا تحياتي

نايف الرشيدي

[سعد الرشيدي]

مساجلة رائعه بين شاعر المنتدى

وشاعر الجماهير

صح اللسانك اخوي معيوف وصح اللسان

شاعرنا المحبوب ابو وليد

اخوكم سعد

[فيصل الرشيدي]

الله الله الله ................


مسااااااااااااااااااااجله في قمة الروووعه ..

معيوف بن زهيميل (شاعر المنتدى) .. صح لسانك وبيض الله وجهك .. قصيدة جزلة من راس جزل وشاعر غني عن التعريف .. تسلم يمينك ..


ناصر بن مرسال (شاعر الجماهير) .. لله درك يا ابووليد ..وصح لسانك وبيض الله وجهك .. شهادتي فيك مجروحه .. بيض الله وجهك .. وتسلم يمينك .. شاعر كبير .. غني عن التعريف ...

لا تحرمونا جديد ابداعكم ...