[فيصل العويمري]

قصيدة أعجبتني لطرافتها ,وقائلها مجهول , حبيت أنقلها لكم هنا في هذا القسم

الا يالله عفوك لا معي بيجر ولا جــــــوال=ولا عنـدي وظيفه والتجاره فاشـلٍ فيـها
ولاعندي شهاداتٍ ولاحرفه تسد الحـــــــال=ولا حظٍ كبير لا اخطت الجره يقديها
مخابي الثوب تومي مادخلها من زمان ريال=بها فاتورة الكهرب ولا يمديني اقضيها
علىذيك العراوي تتعب الحادي مع الجمّال= ثلاث اشهور فالورشه وشهرينٍ مغطيها
ابيها لو تجمّل يـوم واجلبها على الــــدلاّل = يجيها واحدٍ حظه مثل حظي ويشريها
نصيت العسكريّه يوم قالوا للنظام رجال =وقدّمت الملف وصورةٍ متشخصٍ فيها
خذا الاوراق مني واحدٍ ما عند ابوه دلال = سلوم الناس واهل المعرفه والطيب مخطيها
قراها في دقيقه والتفت عجلٍ علي وقال = شهادتك العظيمه يا ولد وين انت مخفيها
هزّيت الراس ماعندي تقول باني من البنقال =وقمت احب خشمه واطلبه بالله يمشّيها
حذفها من يده شين الطبيعه والنبا والفال =وقال ازين تعوّد صوب نوقاتك تعشّيها
تناوشته من الكرسي وعفت الحل والترحال=وضربته بالبياله عقب ما بيّحت شاهيها
خذوني للسجن لا نيب لا ظالم ولا محتال= مجرّد واحدٍ جا يكحل عيونه فيعميها
ويوم اني خرجت اقفيت لارض الله وسيع الجال=على برٍ هواه يداوي العلّه ويبريها
ابدوّر قصعة الجربوع والظب الفتي يختال= والارنب يا شفاة الروح ما احلاها وطاريها
بلا كهرب ولا بيجر ولا غــازٍ ولا نقّال = قوانين الحضاره لا تبي شوفي ولا ابيها

الموضوع الأصلي: قصيدة أعجبتني لطرافتها ,وقائلها مجهول | | الكاتب: فيصل العويمري | | المصدر: شبكة بني عبس

[صاطي الرشيدي]

معناة انسان مر بظروف لايعلمها الاالله واسال الله ان يرزقة ويوفقة واطلب من يقرا القصيدة ان يدعوا لة لعل الله يستجيب دعواتنا لة واشكرك على النقل يافيصل

[سلمان]

أعتقد أنها نشرت في أحد المجلات باسم سعد بن جدلان


لكن ماهو أسلوووب سعد

[سعد البويدي]

فيصل العويمري

صح لسان شاعرها

ولاهنت على النقل

[مقعد العتيبي]

فيصل

سلمت على النقل

الموفق

تقبل موودتي

[مسندالعويمري]

فيصل العويمري

لاهنت على النقل المميز

ولك تحياتي

[سعد بن عادي]

عاد مالقي الا الكراسي

هههههههههههههههههه

عز الله جاب خبره

لاهنت اخوي فيصل على النقل


دمتم كما تحبون

[سعد الشقل]

ههههههههههههههه صح اللسان شاعرها

انشهد انه مقرود هالولد والله يرزقه انشالله ههههههههههههه


يعطيكـ العافيه يالعويمري على القصيده الرائعه