[محمد بن صبح]

السلام عليكم ورحمة الله و بركاته


إليكم أحبتي هذه القصيده من جديدي أمل أن تحوز على رضاكم .

قال ابن صبح و بداية مقاله بالسلام=سنة الخلاق و الخلق واجبها ترده
بان نور الصبح و النور جلاي الظلام=من يقول إني مضيع حقوق يمد يده
لا يخالفنا و يتبع مطردة الحلام=الأذاني عن كلام آهل الباطل مصده
الشدايد مالها غير فكاك الخصام=ما يجيها رجلن ايسند الرأس ابمخده
ليت بعض الناس ريح على ريش النعام=ما نهض نفسه مع أهل المواقف و الأشده
تفرق عروق السدر عنك ياعرق البشام=من جهلهن فالثرى عروقهنه مستمده
من تخلف عن دروب الأدب و الإحترام=قل مقداره مع الناس قاصيها و بده
من يريد المجد يتعب على ركز العلام=العلام اللي ردي العرب حيله تهده
الليالي علمتنا دروسً بإفتهام=والحقايق كل ما جت على الباطل تقده
والجدار اللي بلا ساس قافيه الهدام=ما يدوم بناه و الوقت لابده يهده
والدرر ما جابها كل من فالبحر عام=الدرر من دونها البحر في جزره و مده
يامجمعة الهروج الضعيفه ما تسام=والثمينه كل تاجر عليها يزيد مده
هرجة الناقص ما تجرح رفيعين المقام=كنها القطره ببحر الخليج و بحر جده
يسري الطرقي و عين الذيابه ما تنام=الذيابه كل ذيبً و إله نابً يحده
يتعب الطرقي ما يلقاء شرابه و الطعام=الضواري جايعه و المسافه مجرهده
ما تعايشنا زمان الفتن في هرج نام=سيف أبو طالب علي يقطعه من ناش حده
الحموله جاء لها شعيل مردوم السنام=يا مرخيت الحبال الحبل جاء من يشده
تارد أهل الطيب للطيب ميراد الحيام=يوم بعض الناس يقصر عن الميراد جهده
واهني الطير رفرف بجنحانه و حام=وان لقاء له صيدةً يخبط الصيده بيده
والله إنا ما نلحقك يالطيب ملام=الرجل وإن طاب من طيب أبوه و طيب جده
ولا رضينا بالخطاء و العلوم إلها زمام=يالمكلف بالخبر دوك ود العلم وده
وإختتمها في صلاةً على خير الأنام=عد من يبدي سلامه و عد اللي يرده

الموضوع الأصلي: قال ابن صبح و بداية مقاله بالسلام - سنة الخلاق و الخلق واجبها ترده | | الكاتب: محمد بن صبح | | المصدر: شبكة بني عبس

[احمد منيف]

ماشالله عليك

وصح الله لسانك جازت لي بالحيل ووافيه

[محمد بن صبح]

احمد منيف


أسعدني مرورك العطر

[أثير الشوق]

ليـت بعـض النـاس ريـح علـى ريـش النعـام
ما نهض نفسه مع أهل المواقـف و الأشـده

التصوير جميل في هالبيت
صح لسان ولاهنت قصيده رائعه

[منصور بن صبح]

صح لسانك على هذه الدره

بيض الله وجهك

قصيده رائعه

يابن العم

كفو والله أعجبتني قصيدتك يامحمد بن صبح

لاتحرمنا من جديدك

[وضاح اليمن]

صح السانك قصيده وافيه

[الحر النداوي]

الله الله

صح لسانك يابن صبح علي الحرام أنها قصيدة جزله من راس جزل ومايجيب ألا الجزل

صح لسانك مره ثانيه يالشاعر المبدع

[محمد بن صبح]

الاقتباس غير متاح حاليا



أثير الشوق




شكراً لك على مرورك العطر و كلامك الطيب