[بندرأبن طريف المظيبري]

(هبـوب الشمالـي)

متى تبي تذعذع هبـوب الشمالـي
ـــــــــــــــــــــــ وتبدا مطاليـع المـزون الثقيـلات
متى يبـي يجنّـا سـواة الجبالـي
ـــــــــــــــــــــــ لا عرّضنْ مابين صـاره وابانـات
بروقهن من تحـت لهـن اشتعالـي
ـــــــــــــــــــ وحس الرعد فيهن يجلجل بالاصوات
لا ذكّروهـن عاشقيـن الخِيـالـي
ــــــــــــــــــــــ وجابوا خبرهن قبل هـذا بفتـرات
سوّوا لهن بالنـت نـوع اتصالـي
ـــــــــــــــــــ ومرّوا على الياهو ومرّوا بمكشـات
وشافوا صورهن قاطعات المجالـي
ـــــــــــــــــــ وحطّوا لهن مع شيّة الرب حـروات
والى اقبلن طاروا لهـن باعتجالـي
ـــــــــــــــــ على الجيوب اللي مع الدرب عجلات
مثل المحب ان جاه بالدرب غالـي
ـــــــــــــــــــــ يطير من شوقه لنصـف المسافـات
ويوم اوصلوا واستملسـن بانهمالـي
ـــــــــــــــــــــــــ كـزّوا لنـا تبشيرهـم بالرسـالات
هذي امانـي سقتهـا مـن خيالـي
ــــــــــــــــــــ وارجي من المولى تحـوّل حقيقـات
ويسقينا منفضله عزيـز الجلالـي
ــــــــــــــــــــ اللي بحر جوده يفـوق المحيطـات
ياالله يـاربٍّ علـى النـاس والـي
ـــــــــــــــــــــــ ياعالـمٍ كـــــل الامـور الخفـيّـات
نرجيـك ياسامـع دبيـب النمالـي
ــــــــــــــــــــــ ترسل علينا مـن تواليـك رحمـات
يمّـك رفعنـا صوتنـا بالسـؤالـي
ـــــــــــــــــــــ يوم ابتدا الوسمي وجالـه علامـات
اسق الديـار الدارسـات المحالـي
ـــــــــــــــــــــ واحي الدعوب اليابسـات السنيّـات
يازين لا قالوا ترى الـكمب سالـي
ـــــــــــــــــ وواد النسا من حدري الجسْر كد فات
هنـاك ابستانـس ويرتـاح بالـي
ــــــــــــــــــ واشفق على نظم البيوت الجزيـلات
واسج سجـة دالـه القلـب سالـي
ـــــــــــــــــــ ماجاه من سوق الهوامير ضربـات
لاسقت جيبك يـم هـاك السهالـي
ــــــــــــــــــــ شرقيّ الاريل بين عبـلا ورامـات
وهـي مناقعهـا سـواة اللـوالـي
ـــــــــــــــــــ تبرق وتعكس صورتك كالمرايـات
وعقب التمشي جيت فـي دوّ خالـي
ـــــــــــــــــــ تسورب شغيّاته كما زحـفحيّـات
واوقدت لك بالرمـث نـارٍ تلالـي
ـــــــــــــــــــــ ريحة ندارمثـه تفـوق البخـورات
وفرشت من حوله ثـلاث الزوالـي
ــــــــــــــــــ اللي على الجالس تفصّـل مقاسـات
وصفّيـت فيهـا مهدفـات الدلالـي
ــــــــــــــــــ وضبطت بالبن اليماني لـك اسـواة
وفنجال شايٍ خـادر اللـون حالـي
ــــــــــــــــــــــ مثـل الدعايـه لاتذوّقـتْ رشفـات
ومعك من الربـع القـروم العيالـي
ـــــــــــــــــــــ اثنين بالحِسبـه ..وبالفعـل ميّـات
وافين ماهـم مـن هـواةاالجدالـي
ــــــــــــــــــــــــ صافيـن بالخـوّه علاقـه ونيّـات
كلامهـم مثـل القـراح الـزلالـي
ــــــــــــــــــ لا ذاقه الظامي عقب طول مظمـات
لحظة صفا فيهـا زمانـي صفالـي
ــــــــــــــــــــ للنفس لـذّاتٍ .. وللعيـن مجـلات
ويزيدهـا لا غـرّد الطيـر عالـي
ـــــــــــــــــ وهبّت علينا من طرى النود نسمات
تكفيك لـو ساعـه همـوم الليالـي
ــــــــــــــــــــ اللي على مثلي لها نـوع غــــارات

تحياتي يا خالي يا أميرنا الشاعر هــرم عبس

الموضوع الأصلي: (هبـوب الشمالـي) | | الكاتب: بندرأبن طريف المظيبري | | المصدر: شبكة بني عبس

[بدوي متطور]

مشكور على النقل ,,بس
قصيده تبي الصج ماتستاهل النقل .

مافيها شيء زين ,َ-َ
انت تقول انك ناقد لازم تنتقي الشيء الزين ..

[بندرأبن طريف المظيبري]

اقتباس من مشاركة ساحر العرب مشكور على النقل ,,بس قصيده تبي الصج ماتستاهل النقل . مافيها شيء زين ,َ-َ انت تقول انك ناقد لازم تنتقي الشيء الزين ..

ابك شل النظارات والله معندك معند جدتي ؟ نقل خاص ولا نقل ثقيل
يولد هههههههههههههههههههههههههههههههههههههههههههههههههه ههههههههههههههههه
والحين خالي يالبا قلبك بس لك هدية خذ

[بندر الشويلع]

صح لسان شاعرها

ع النقل المميز
ولاهنت

[كحيلة]

صح الله لسانك ولسان شاعرها..
عشت على النقل المميز..
لاخلا ولاعدم..

[بندرأبن طريف المظيبري]

اقتباس من مشاركة بندر الشويلع صح لسان شاعرها ع النقل المميز ولاهنت

هلا وغلا يا سمي بندر الشويلع أشكرك من كل قلبي
علي مرورك الدائم هذا يدل علي تميزك ورقيك وأخلاقك العالية
تحياتي اليك وأنت المميز

تحياتي لكم أخوكم هرم عبس ش بندر بن طريف

[بندرأبن طريف المظيبري]

اقتباس من مشاركة كحيلة صح الله لسانك ولسان شاعرها.. عشت على النقل المميز.. لاخلا ولاعدم..

عاشت ايامك . وانا سعيد وكلي سرور
بمرورك الكريم عزيزتي الغالية كحيلة
أشكرك من كل قلبي كما اسعدني مرورك الطيب وكلماتك الرائعة ورقي كلماتك العذبه
تقبلي تحياتي

تحياتي لكم أخوكم هرم عبس ش بندر بن طريف

[صوت الشمال]

راقة لى
شكراً لك