[ناصر الخميلي]

السلام عليكم ورحمة الله وبركاته

مصافحه / اولى

اتمنى ان ترتقي لذائقتكم








ثورة خيال ابعد من حدود الآمال
حاولت اترجمها بعطف ولطافه

قامت تصافق بي علامات الإهمال
شيٍ قدم عيني وشيٍ خلافه

حاولت اصد القلب عن كل مدخال
لكنها طالت على المســــــافه

ياجنون شعري يامتاهات الأهوال
يادربي الموحش وحرفه وقافه

مرت ثلاث سنين نازل ورحال
والضيق زايد بالضلوع ارتجافه

فوق السنين شهور وايام وليال
وصحراي ملت تشتكي من جفافه

حالي على هالحال غربه وترحال
مامن جديد إلا الفكر وإختلافه

مرات اقول إنه يبيني ولا زال
ومرات احس إني مجرد وصافه

واحيان اقول إنه على الحال يحتال
واحيان نفس الحال مره وطافه

مابين بعد وقرب وظنون وجدال
حاولت اعافه لكن ازريت اعافه

انا عشانه ساهر الليل لو طال
وهو ينام ومهتني في لحافه

اللى تجي ذكراه دايم على البال
من فيه غيره يستحق الكلافه

اللى عطاني عشق ترخص له الحال
حتى قصيدي فيه ماهو حسافه


آخر ما اقوله بيت لابد ينقال
وابيه يعذر خافقي بإعترافه

إن ماوفيته حي ماني برجال
والعرش حالف ماتجيه الخلافه





وسلامتكم

الموضوع الأصلي: إن ماوفيته حي ماني برجال.. مصافحه اولى | | الكاتب: ناصر الخميلي | | المصدر: شبكة بني عبس

[عبد العزيز]

وعليكم السلام ورحمة الله وبركاته

ابيات رائعه كروعة حضورك تمنياتي لك بالتوفيق ومزيداً من الابداع

تم الختم

[مروان الرشيدي]

صح
ألسانك مدد بلا عدد


رائعه جدآ وتقبل مروري
"
"
"

تحياتي

[برق الوسم]

ناصر الخميلي
صح لسانك.. واعتلى شانك
قصيده راائعه استمتعت بقراءتها
تقبل مروري

[ذيبان الرشيدي]

صح الله لساانك على ما أجزلت
قصيده
في قمة الرقه والعذوبه
استمتعتُ أثناء تمحيصها
لاتحرمنا
جمال نزفك

دمت
بخير وعافية
وكُلَ عامٍ وأنتَ بِخير

[ناصر الخميلي]

عبدالعزيز
مروان الرشيدي
برق الوسم
ذيبان



صحت ابدانكم جميعا

مروركم يشرفني ويسعدني

كل الشكر على مروركم الجميل

[أحمد الشختلي]

مرت ثلاث سنين نازل ورحال
والضيق زايد بالضلوع ارتجافه

الله الله

صح السانك وعتلا شانك يا شاعرنا

وبيض الله وجهك على الجزاله

وانتظر جديدك وبوح قلمك

سجل اعجابي بك :)

[سعيد عيد الرشيدي]

صح لسانك اخوي ناصر الخميلي
على هذه القصيده الجزله
وعلى هذا الإبداع الشعري
صح لسانك وتقبل تحياتي وتقديري