[احمد المهيمزي1]

السلام عليكم ورحمة الله وبركاته

شخباركم اخواني واخواتي اعضاء ومشرفين والاداره

عساكم بخير ؟

الصراحه جايكم اليوم ومعي ابداع من ابداعات شاعر تمنيت لو التقي به ولو نصف ساعه .

شاعر اعجز عن وصفه ولذالك حبيت ان اطرح هذا المو ضوع وهذي القصيده لكم واعذروني على اي قصور .

الصراحه تمنيت لو يكون في منتدى خاص للقصائد القديمه , التراث القديم , بل الدروس القديمه

فلن تجد شاعراً في وقتنا الحاظر لم يتأثر ويتعلم منهم .
ما ابي اطول عليكم

الســـــالفه :

في احد من الشعراء القداما له عيال وينصحهم بقصيده وينهاهم عن بعض الامور ويطلب من الله ان يستر عليهم
والعيال الى صارو اربعه او خمسه وهم صغار ومتوالين ورى بعض وهذي القصيده

لشاعر الكويتي :مرشد بن سعد البذال الرشيدي رحمه الله .

علم من اعلام الكويت .

وهذي القصيده مسنده لولده عبدالله بن مرشد البذال ويصغره ويناديه ( عبيد ) واعبيد ياربع ترى كفيف

مايشوف .

المهم يبي يبين من القصيده ان يحب اعياله وحاب انه ينصحهم وينبهم على عدة حاجات

ويقول فيها طبعاً انتبه واناابوك واحذر من النميمه ولاتقول فلان قال وفلان قال واحذر من الربع الي مالهم ربع واحترم الناس الي هم اكبر منك واعطي الناس حقوقهم الخ ..............

وغيرها من القيم الي حثنا عليها دينا الحنيف .

ادري طولت عليكم اخليكم الحين مع القصيده .

يقول :

يالله يـارب الضعـوف المساكيـن

اللي لك المخلوق يحسـن صلاتـه

تستر على غوشن صغارن مكفيـن

أكبرهم العـارف دليلـه عصاتـه

لا ياعيالـي كلبـوكـم حبيبـيـن

عندي وعند النـاس كلـن وذاتـه

عندي غلاكم يدفن الزين والشيـن

وعند العرب كلن تشاف اخملاتـه

يا عبيد أنا خابرك ورعن لهالحيـن

داوي بغبـات الجهـل وظلمـاتـه

لا شك علمي لك محبـه وتفطيـن

تسمـع الوالـد وثبـت وصـاتـه

وصاة مخلوقن يعـرف القوانيـن

مافـاة عمـره بالجهـل والهياتـه

يا عبيد انا بأوصيك منـي بثنتيـن

ثنتين هن سـؤ البشـر وحسناتـه

أوصيك لاتبحث سـدود المغيبيـن

ولاتجهر اللـي غارقـن بغفلاتـه

ترى النميمه تمحق الرزق والديـن

والمنزل العالـي تهـدم اطبقاتـه

لاتحسبن أهـل الظليمـه بخيتيـن

كلن يوافق ما عمـل فـي وفاتـه

وانذرك عن حق الضعيف المسيكين

اللي علـى حقـه يهـل اعبراتـه

ترى الضعيف الليا غدى الليل ليلين

يدعي وعنـد الله توافـق ادعاتـه

الظلم فان الظلم يفنـى السلاطيـن

ياويل راعي الظلـم مـن مقبلاتـه

وانذرك عن ربعة رخو من هياسين

اللـي سوالفهـم بـوده وهـاتـه

ويا عبيد الأقشر لوصفا لك نهارين

نهار ثالث جـاك يرفـع عصاتـه

والله عندي ربعة الناس الأقصيـن

ولا صديقـا يبلشـك فـي حياتـه

ترى الرجال ابهم فهود وحياويـن

جاك الكلام اللـي صحيـح ثباتـه

ان كان ما تدري ترى الناس درين

الرجل مدحه بالمجالـس طراتـه

رجلن تعلق بـه رجالـن مسميـن

عـز الرفيـق ولابتـه والحماتـه

ورجلن تشوفه جسم وعيون ويدين

ولولا الشعر ما تفرقه من خواتـه

كم واحد بالبيت يضـرب بسيفيـن

وأن جاء حزم كلاب قبـع عبادتـه

والحلم عن الغيض ينجي الشياطين

يكفيك شر إبليس هـو و دحراتـه

هذي القصيده طبعاً مثل ماذكرت لشاعر : مرشد بن سعد البذال الرشسدي .

الي ينصح فيها ولده عبدالله ( عبيد )

واذا قريت هذي القصيده تذكرت قصيدة الشاعر : ابراهيم بن زيد المزيدي ( رحمه الله )

من شعار نجد توفا الله يرحمه وعمره تجاوز 100 بسنتين ماشاء الله

ويوصي ابنه ( فهد) بقصيده يقول في مطلعها

يافهد أنا بوصيك وأحرص وأنا أبوك

بالك تجـي بيـن الرفاقـة علاقـة

تراه ماينفعـك عمـك ولا أخـوك

وأن ادبرت دنيـاك سمـوك عاقـه

اعتذر لو خرجت عن المو ضوع ولاكن حبيت اعطيكم فكره لو بسيطه عن الشاعر ابرهيم بن زيد
وقصيته

( اخواني اخواتي ارجو ان اكون وفقت في طرحي لهذا الموضوع , كما اني اعتذر عن اي قصور صدر مني )

أخوكم : احــمـــد الـمــهــيــمــزي

الموضوع الأصلي: سالفة و قصيدة الشاعر مرشد البذال | | الكاتب: احمد المهيمزي1 | | المصدر: شبكة بني عبس

[العريض]

نقل موفق لاهنت

[ابو بيان]

رجلن تعلق بـه رجالـن مسميـن



عـز الرفيـق ولابتـه والحماتـه



ورجلن تشوفه جسم وعيون ويدين



ولولا الشعر ما تفرقه من خواتـه



مافيك اقصور اخوي احمد المهيمزي كفيت وفيت ومرشد البذال شاعر علم كما قلت رحمه الله عليه واذا له قصائد عندك ياليتك توافينا فيها في هذا المنتدى الشامخ وتقبل مرووووووري اخوك ابو بيان

[برق الوسم]

مرشد البذال شاعر علم رحمة الله عليه
احمد المهيمزي كفيت وفيت بيض الله وجهك
تقبل مروري

[أبن علي]

الله يعطيك العافية يا أحمد ومرشد البذال مدرسة شعرية لن تتكرر

[احمد المهيمزي1]

اخـــــــــــــواني
العريض
ابوبيان
برق الوسم
أبن علي

اشكركم علي مروركم

اســعدني

مشاركتك


تحــياتي لكم