[الاجهر]

يالله يالمطلوب يا والي الأقدار=أنت الذي مدّات جودك لطيفه
يالله يالمعبود عاون هل الكار=تحل شطاتٍ عليهم كليفه
اللي مجالسهم بها بن وبهار=ونجرٍ يصوّت للهشالا رجيفه
مكارمٍ للضيف أصيلات وكبار=ومفطحاتٍ في صحونٍ نظيفه
يا مزنةٍ غرا من الوسم مبكار=اللي جذبنا من بعيدٍ رفيفه
تومر على كل المفالي بالأمطار=تصبح به خدان قومي مريفه
غب الحيا فاحت بها ريح الأزهار=تخالف النوّار مثل القطيفه
ترعى بها قطعانّا سر وجهار=تقطف زهر مرباعها مع مصيفه
يبني عليها الشحم بنية جدار=عقب الضعف راحت رجومٍ منيفه
قطعانّا ما ترتع دمنة الدار=ترعى زماليق الفياض النظيفه
ترعى بها وضحاً من الذود معطار=غبوقة الخطّار عجلٍ عطيفه
ترعى بضف الله ثم جبران وجبار=خيالةٍ يوم الملاقا عنيفه
إن سوهجوا عنها قليلين الأبصار=من دونها نروي السيوف الرهيفه
ماهي حكاية مسردٍ عقب ما نار=اللي نكس وأطراف رمحه نظيفه
حنا كما مشخصٍ عن الصرف ما بار=بالوزن يرجح والمصاري خفيفه
هذا ولك الله من قديمٍ لنا كار=عن جارنا ما قط نخفي الطريفه
حنا نرى في زلة الجار لو بار=تضحك حجاجه بالعلوم اللطيفه
نرفى خماله رفية العش بالغار=ونودع له النفس القوية ضعيفه
ولا نبدي الخافي ليا صار ما صار=يفلج قصير البيت لو بان حيفه
ونكرم سبال الضيف حق وتعبّار=لامن ولد العفن شح برغيفه
الجار لابده مقفي عن الجار=وكلٍ بجيرانه يعد الوصيفه
نبغي ليا من بدّل الدار بديار=وعقب البطا كلٍ تذكر وليفه
كلٍ تذكر ما جراله وما صار=وكلٍ تذكر ما جراله من عريفه
لابدها ترجع تواريخ وأذكار=وتبقى لدسمين الشوارب وظيفه
أحدٍ على جاره بختري ونوّار=وأحدٍ على جاره صفاةٍ محيفه
الصبر مفتاح الفرج هو والأفكار=ومن لا صبر تصبح أحواله كسيفه
خطو الولد مثل البليهي ليا ثار=يا زين حمله ليا تمدرا زفيفه
يشدي هديب الشام حمّال الأخطار=زودٍ على حمله نقل حمل أليفه
وخطو الولد مثل النداوي ليا طار=حسّه على صيد الخلا له وحيفه
ترجي العشا في مخلبه وقع وطيّار=صيده سمان ولا يصيد الضعيفه
وخطو الولد ينبش على موتة النار=مع العرب يشبه لخطوى الهديفه
ليا بخصته ما سوى ربع دينار=صفرٍ على عوده تضبّه كتيفه
وخطو الولد يا مال قصّاف الأعمار=لا نافعٍ نفسه ولا منه خيفه
وصلاة ربي عد ما خضّر الأشجار=على نبيٍ له شريعة شريفه

الشاعر محمد النجدي الصقري العنزي

الموضوع الأصلي: أحدٍ على جاره بختري ونوّار | | الكاتب: الاجهر | | المصدر: شبكة بني عبس

[ابوطافش]

صح لسان شاعرها

[العريض]

صح لسان الشاعر

صح ذوق الناقل

دمت بووووود

[الـشـقـاوي]

صح لسان شاعرها

ولسانك خيووووووو

[الاجهر]

اشكركم على المرور

[بنت العبسي]

صح لسان الشاعر

وسلم الله يدينك وحماك

نقلك لها يدل على روعة ذوووقك يحميك مولاك

[رائد الذيابي]

يبني عليهـا الشحـم بنيـة جـدار......عقب الضعف راحت رجـومٍ منيفـه

صح لسان الشاااعر

وتسلم يمينك على النقل الممــــــــــيز

تقبل مروري