[رشيد]

.
.

سامرت نفسي تسليني واسليها
بنيت شعري على وزن وعلى قافي

الله من علةٍ بالصدر مخفيها
أخاف تظهر وأنا ما أحب تنشافي

وأحس رجلي ثقيلاتٍ خطاويها
كنه على الرمل تمشي والقدم حافي

والنوم عيني من البارح مجافيها
تسهر وكلٍ هجع في مرقده غافي

سهرت افكر بهالدنيا وما فيها
واشوف قلبي كثير الهم به لافي

دنيا تغر الملا خسران شاريها
لا شفت فعله رفعت الصوت ياكافي

ياسرع ما تنقلب سودٍ لياليها
طعناتها بالظهر من بين الاكتافي

ترى حضيض البشر شخص يعديها
عدَّى بعفو الولي مع ستره الضافي

#دنيا تقول انتبه لو ذقت حاليها
لا تحسب انه يدوم الوقت لك صافي

واليا تعكر زمانك عقب صافيها
اصبر وربك لكل اجروحها شافي

اصبر عسى الله اليا مالت يسويها
اصبر عسى الله يخلِّي ماهفا وافي
-
.
#شعر
منصور بن عبدالله المجيدل

.

الموضوع الأصلي: سهرت أفكر | | الكاتب: رشيد | | المصدر: شبكة بني عبس