[معالي الوزير]

السلام عليكم ورحمة الله وبركاته

بصراحة كنت اتابع برنامج عن الفقراء في العالم في الجزيرة الوثائقيه وعجبت !!

يقولك انا لو املك ثمن آلة خياطه او كشك بيع او بعضهم يقول لو املك 100 دولار = 375.50 ريال

وانا بدوري ابي انقل لكم تجربتي مع الثراء لكن ترى الثراء ماهو اخر طموح الانسان لانك اذا وصلت لهذا المرحله يمكن يجيك جشع وبعدها طمع وبعدها هم كبير

ابي افهم الحين
اذا عندك سيارة وبيت وزوجه ومصروف شهري يكفيك هذا اكتفاء
اذا عندك سيارة وبيت وزوجه ومصرف شهري ويزود اخر الشهر هذا مرتاح
اما اكثر من كذا وش تبي في المال الزائد يا أما انك تبي تفجر ولا تسرف ولا تستشيخ ولا تغضب الله

واتمنى انك تبي ترضي الله لانها صعبه مرة تصرف ريال على غير هواك

حنا في الخليج اكثرنا مكتفي بنظري بس اكثرنا يسئي استخدام المال عنده لانه مايمنع نفسه عن هوى نفسه

راح اعطيك بعض اهم النقاط :

1- كون خط مستقيم مع الله سبحانه ثم مع نفسك ثم مع الناس
2- استغفر الله كثيرا
3- لا تخلي مشروعك اكبر همك وتتحمس اكثر من اللازم
4- لاتحدث احد بما ستفعل ( بينك وبين نفسك )
5- الصبر ثم الصبر لاتستعجل على رزقك
6- لاتهايط امام الاصدقاء انك فعلت وانك تركت ( نفس فقرة رقم 4 )
7- لاتدخل في المشروع بكامل رأس مالك
8- ابدا بخطوة تكلفه قليلة وربح قليل

-------------------------------------------------------------------
ومن الايجاز اليكم التفاصيل :

1- كون خط مستقيم مع الله سبحانه ثم مع نفسك ثم مع الناس
* يعني لاتكون متقلب المزاج احيانا شكور واحيانا قنوط واحيانا ضالم او يائس او طموح اكبر من حجمك او مستعجل على رزقك
خلك هادي تمشي براحة وثقه .

2- استغفر الله كثيرا
* الموضوع هذا الحالة حكايه يعني كلنا ندري وكلنا عارفين مثلا : ان الذي يذاكر ينجح ويصير له مستقبل طيب وأن الذي يمشي يصل وأن الذي
يصلي يدخل الجنة باذن الله _
فهناك ادله كثيرة على أن الاستغفار يجلب الرزق بس انتبه للفقرة الاولى يعني الاستغفار يمحو السيئات وبعدين يبدا الرزق

3- لا تخلي مشروعك اكبر همك وتتحمس اكثر من اللازم
* ياربعي يابعد راسي ابي عطيك مثال بس لا أحد يضحك علي
وش الفرق بين واحد حط بلكه في الحوش ووقف فوقها !!
وبين واحد واقف فوق جدار الحوش !!
اللي واقف فوق البلكة ماهو بخايف يعني واثق انه ماراح يطيح ويمشي بحريه فوق البلك ومرتاح واذا طاح ماهو متعور صح <<<
والذي فوق الجدار خايف انه يطيح ويتعور ويصير له شي وتلقاه كل خطوة يبكي عشان يسويها ومتشدد ويلوم نفسه على اتفه سبب <<< مشاء الله ذكي جبت قانون جديد
بس ابي استخلص لكم فكرة الخوف يفتح عيونك على اشياء مالها داعي وحاول انك ماتبدأ من دين يعني تسدتين عشان تسوي فيها مشروع

4- لاتحدث احد بما ستفعل ( بينك وبين نفسك )
* واضح مايبي لها شرح مادري ليش بس الافضل انك ماتقول لاي احد الا شخص يعمل بنفس المشروع الذي تريد ان تنفذه وعلى انفراد
احس ان الناس تكثر الاسئله او تبدأ تشغل فكرك الناس يقولون عنك وش سوى وين وصل او يصيبك غرور

5- الصبر ثم الصبر لاتستعجل على رزقك
* الصبر مفتاح الفرج يعني خلك سلس خلك ريلاكس كل يوم أبدأ من جديد برغبه في النجاح وتذكر الانجازات التي عملتها عشان الهمه عندك تزيد وتعلى واعمل ببساطه ولا تعطي العمال وجه خلك رسمي معهم مو تقول ابي اضحك في وجيههم عشان مايسرقوني

6- لاتهايط امام الاصدقاء انك فعلت وانك تركت ( نفس فقرة رقم 4 )
* صدقوني الناس راح يعرفون عنك كل شي وانت ماتدري وكل ماصرت غامض اكثر رايح تنجح اكثر ويزيد غلاك عند العالم اكثر وحاول انك تكون رجل كريم بسيط بحدود

7- لاتدخل في المشروع بكامل رأس مالك
* نرجع لحكمة الجدار والبلكة يعني ادخل بثلث مالك عشان تعرف تكتك صح لانك اذا دخلت برأس مالك تنضغط وتبدأ تحسب كل خطوة بقلق مثل الرجال اللي فوق الجدار

8- ابدا بخطوة تكلفه قليلة وربح قليل
* افتح محل مثلا رأس مالك 100.000 ريال ادخل بملغ 40.000 ريال حد اقصى الا انك واثق من مدى مشروعك
ولو انك تلقى لك شريك واثق فيه وواثق فيك وتدخلون كل واحد بملغ 20.000 ريال افضل بكثير عشان يكون عندك راس مالك 80.000 ريال

هذا ناتج فكري المتواضع اسأل الله أن يصلح ديننا اول شي ويعافينا ويرزقنا من فضله

ياحبني لكم وانتم اثرياء بكرة الفلوس تغير النفوس يجيك بخل غير طبيعي

<<< وين وزارة التخطيط والدراسات عني

ترى ماراجعت كلامي بس اذا فيه زلات عدوها لاتدققون


اخوكم - معالي الوزير


[youtube]

الموضوع الأصلي: كيف اكون ثريا تاجرا غنياً ملونيرا . . . ؟ | | الكاتب: معالي الوزير | | المصدر: شبكة بني عبس

آخر تعديل بواسطة معالي الوزير ، 28-03-2011 الساعة 04:17 AM.

• اقتباس

[بدوي متطور]

موضوع صراحه قيّم وممتاز وواقعي جداً

انا صراحه جربت بعض مماذكرت وكلامك صحيح 100% لاغبار عليه

صراحه المشكله الكبيره فينا الاستعجاال على كل شيء ...

اشكرك وانا صراحه قرأت الموضوع وتعمقت فيه وسعدت بهذا الموضوع الجميل والرائع

ولاتحرمنا من هالمواضيع التي نحن بحاجه ماسه لها


مشكور مره آخرى وتقبل مروري..

[معالي الوزير]

حياك الله بدوي متطور

اسعدني مرورك وردك الراقي

[عايد2001]

الله يعطيك العافيه

[أمـ الشوق ـير]

طرح جميل

ألف شكر لك

[ابو على 2011]

ماقصرتي على الموضوع الجميل والله يزيدك

[معالي الوزير]

هلا فيك عايد
شرفتني بمرورك

[معالي الوزير]

أمـ الشوق ـير حياك ربي

وردك اجمل

كل هذا عشان تطوير القبيله