[عبدالعزيز الخياري]

محاورة ودية جرت بين الشاعرين الأمير خالد بن سعود الكبير ومسفر بن حمد آل رشيد


مسفر :



سلام يا اهْل العِرْف والعز والجود

يا اهْل الوفا واهْل السيوف الصقيله

أنا ومن مثلي من الناس مقرود

يطمع لحاجه والمعَرفه قليله


الأمير خالد :



يا مرحبا ترحيب ودٍّ لمودود

رحْب الشرف والمرجله والفضيله

ترحيب محمودٍ تلاقى بمحمود

من بينهم تحلى العلوم الجزيله


مسفر :



إبْك البقا وْلكلّ رجّال مجهود

يا الشاعر اللي ترتكي للثقيله

يا اللي تعَزف العُود خلك على العُود

وانا اتمشـّى كلّ يومٍ وليله



الأمير خالد :



الحمد لله كلها سْهُود ومْهُود

والناس كلٍّ له قبيلٍ يشيله

الله خلق بـِيض ودَاولهنْ بْسُود

وكلٍّ على ما قيل قلبه دليله


مسفر :



أقول كلٍّ له معايير وحْدود

بسّ الزمَن جا فيه عَدْله ومَيله

أبو سعودٍ ماهو بْحَول مسعود

منـّه تعَلـّمنا البيوت الأصيله


الأمير خالد :



صدَقت مسعودٍ ماهو بحول ابو سعود

أنشد خبير يعلـّمك كل حِيله

ترى الذكي ماهيب دايم له سْعود

حتى الزعيم اللي غزى له دِلِيله


مسفر :



أحْدٍ نهَر واحْدٍ بحَر دايم يزود

وأحْدٍ عظامه فاللقا ما تشيله

لا يرجع اللي يبغي الصيد مصيود

وتقصر حباله بعْد كانت طويله


الأمير خالد :



حتى البحَر في بعْض الاحيان محدود

والنهْر عذب ومثمراتٍ نخيله

والظبْي كم جندل له نـْمُور وفـْهود

لو هو ضعيف .. سْهوم عينه قتيله


تقبلوا تحياتي

الموضوع الأصلي: الامير خالد بن سعود ومسفر آل رشيد محاوره رائعه | | الكاتب: عبدالعزيز الخياري | | المصدر: شبكة بني عبس

[راعي الشلفا]

مشكور اخوي عبدالعزيز على المحاورة الجزلة هذي واللة لايهينك

[عبدالعزيز الخياري]

ياهلا والله فيك ياراعي الشلفا
وحياك الله في منتديات قبائل بني رشيد بين اخوانك تفيد وتستفيد
تقبل تحياتي

[سعد الفلاح]

يعطيك العافيه أخوي عبدالعزيز على نقل المحاوره التي تستحق الأعجاب