[البدر المهاجر]

ملعون حب ٍ جرّح القلب تجريح
ما يرحم اللي حب وإن كان شايب

أبكي وانا مبسوط وأضحك وانا اصيح
عز الله أن الحب سوّى العجايب

إن قلت توبه صرّح القلب تصريح
يا ويش أسوّي بالجروح العطايب

لو شرّحوا قلبي بالالات تشريح
شافوا خفايا القلب نار ولهايب

قالوا يطيح الهم يومين ويطيح
والجرح الأول تالي الوقت طايب

قلت ولهايب خافقي شبّها الريح
محد ٍ درى بالحال ربع وقرايب

محد ٍ درى بالجرح وأن جاه توضيح
يا مبتلين القلب كافي مصايب

القلب مبلي ما يبي له مشافيح
ودواه قفّى مع هبوب الهبايب

والهم تكّى في قلوب المجاريح
والنار تكوي فاقدين الحبايب

واللي تسلّى ما بقلبه مماليح
وأقفى عن الحب وتوخّى الصعايب

متوسّد الراحه بليّا مراويح
كل شي طبيعي ما طرا له غرايب

وش عرّفه بالهم وان جاه تلميح
يا كيف يفهم وإن درى بالسبايب

الفرح بيّن ما يبي له مصابيح
والحزن غايب بين الأضلاع غايب

يا دمع لا لا تحرج العين وتسيح
يكفي دموع الامس مزن وسحايب

والونّه اللي ما حكمها مفاتيح
يا قلب شلها لا يجيك المعايب

عزّاه كاني بين زلّه وتصحيح
هذي توالي العشق ماله صحايب

يشقى به اللي ضاع وسط المراجيح
ما يقبل الفرقى ولا هوب تايب

ما لوم أنا اللي يبكي الليل ويصيح
عاشق وأنا أدري تالي العشق خايب

الموضوع الأصلي: ما لوم أنا اللي يبكي الليل ويصيح .. عاشق وأنا أدري تالي العشق خايب | | الكاتب: البدر المهاجر | | المصدر: شبكة بني عبس

[أبو فايز العويمري]

صح السانك يالبدر المهاجر وقصيده اروع من الرائعه ولك الشكر الجزيل

[البدر المهاجر]

تسلم ياغالي بصراحة هذا اقل ما اخدم به منتديات شبكة بني عبس

عيوني لك يابو فايز العويمري ومشكور على الرد والمرور