سلام ياراع الشعل سلام يافخر الرجال = اللي طلع صيته بنجد وفي محله باالكويت
من روس قوم سطر التاريخ ماضيهم وقال= قال انهم ساس الفخر والعز لامنك نصيت
عجارمه يوم المعارك يوم صولات القتال = احزام ينشد الظهر فيهم اليا منك غزيت
شيوخ قوم فعلها راسي كما ترس الجبال = اليا هقيت الطيب فيهم وانت في ظنك هقيت
تلقى الدلال اللي تقدمها مطانيخ العيال = والعود الازرق والكرم عاده لهم في كل بيت
ابطال عبس اللي لها تاريخ من ماض اليال = ربعن على الفزعات تلقهم اليا منك بليت
كلام موثق ولا جبناه من سرد الخيال = تاريخهم يحكي بنص الكتب لامنك قريت
و رديني الخنفور منهم مايبي قيل وقال = خيال شعل باالمزاين دام بالاول نويت
شعل اليا ناظرتهن تقول لله الكمال = موارث الاجداد ماجنه بكلمة وش شريت
تمجيدكم بالشعر حق مانجيب الا الجزال = في مدحكم ياللي على العليا تكابر ماانثنيت
الشعر في مدح الكفو يزين لاجاله مجال = والا الردي ياتي ويمشي وانت ماعنه دريت
والعد مايروى منه لاصار ماتاجد حبال = تروح ضامي وانت للجمه تشوف ولارتويت
والحبل لامنه تراخى فوق دايرة المحال = على السواني ماتوردك العدود اليا ضميت
وحنا دعانا حمود لزيارتك يواف الخصال = ونلبي الدعوة يابن خنفور لامنك دعيت
وتمت بذكر اللي رقيب فوق خلقه مايزال = الواحد الفرد الصمد في عظمته يحيي او يميت
الشاعر/ حامد سعود الحنيفان العويمري