السلام عليكم ورحمة الله وبركاته
يا داعي الشوق يوم انك تنادينا = باسم قديم الغلا والبحر و الدانه
ارجوك فينا من الذكرى ما يكفينا = نسيت نفسي و حبه صعب نسيانه
شف رسمنا اللي تعبث فيه ايادينا = لوحه تعبر عن حروفي بوجدانه
كان الامل.. يفتح الابواب لاجينا = وامشي على الهون واقطف ورد بستانه
يازين هاك النهار انور ليالينا = ويا زين ورده وياسمينه و ريحانه
هنا..ضحكنا وسولفنا.. وغنينا = وهناك.. يوم الحنايا منه رويانه
مع سجة الوقت..روحنا وسجينا = والوقت يمضي بنا وندور ميدانه
عدنا.. على وعدنا وماعاد يمدينا = اليوم طار الحمام.. وهاجر اغصانه
خل الاماني وذكرانا تسلينا = خل الهوى لا تكلم ينطق لسانه
شف كيف رحنا وخانتنا هقاوينا = وشف بحرنا وين لولوه و مرجانه
وشف قصرنا اللي بناه احساس ماضينا = مهجور.. تطرق هبوب الريح بيبانه
محبكم /
عبدالعزيز دحيم الخياري