بديت بآسم مكون الأنس والجان = بأسمه يعاهد كل جن(ن) مرودي
ورد(ن) على ماقاله فلان وفلان = ضعوف النفوس اللي تغث الكبودي
تاريخ متجرد وتأليف عميان = كنه على ظلم العباد محدودي
أخص من سطر بالاحقاد ديوان = حقود والمصدر كتابة حقودي
اليا أنعدم مبدى العقيده بالانسان = يقدر يسوي مايسوي اليهودي
ولأهل الوفا والصدق شكر(ن) وعرفان =وتحية(ن) عطره وباقة ورودي
نعم رشيدي من بني عبس غطفان = من قيس ابن عيلان شجرة جدودي
تحت مسمى عبس واشجع وذبيان = تلقى عنا ويني ومجدي وجودي
هرج(ن) على صدق وحقايق وبرهان = حقايق(ن) تدمغ دماغ الجحودي
حقايق(ن) تروي معاني خبر كان = بخطوط كوفيه بصم الحيودي
حصل المنافس والسبب سبة حصان = سبة فرس وحصان راحت فهودي
وجانا بغا التركي ودارن الاكوان = دون الكرامه والوطن والعدودي
ومر الجفاف وراحوا البدو فرقان = كل (ن) طوى بيته بظهر القعودي
وزاحوا لنا من غبر الايام فرسان = احد(ن) حدر وأحد(ن) توجه سنودي
شالوا على فلك البحر لأم درمان = يبون وديان(ن) سقتها الرعودي
ثم استقروا بين كسلا وحلفان = يتلون شف مطيرات البدودي
ونزل(ن) نزح للسيف راضي وقنعان = من البحر للدبدبه للنفودي
قوم (ن) لهم في ساحة المجد ميدان =يوم ان كل(ن) دون حده يذودي
صالوا وجالوا واستقروا بهدلان = دار الصباح اللي تلم الوفودي
ونزل(ن) تورث منزلة عبس بأبان = ونزل(ن) بوادي السر سوى السدودي
وفي كل دار ألنا موارد وعربان = وتاريخنا بارض العرب له وجودي
وحنا بقينا بالمنازل والاوطان = بأقسى الظروف مواصلين الصمودي
ترمز لنا الكفه هويه وعنوان = الناس تعرف والعواني ترودي
يوم الجزيره بين تسعين شيطان = نطعن ونطعن دون هاك الحدودي
من المدينه حدنا ضلع حبران = مايمرها الا من خضع للقيودي
ومن حرة الكوره لشرقي مرغان = بعد امرنا يردون ماها الورودي
ومن ذاق ضرب سهونا راح ندمان = يموت مافكر بلم الجرودي
اسلاحنا قو العزيمه والايمان = والا عددنا بالحساب معدودي
ودخيلنا ممن عن الضيم ما يهان = وسلامته نبذل وراها الجهودي
وخوينا مايكظم الغيض زعلان = وقصيرنا نعطيه حقه وزودي
حنا هل المعروف ورجال الاحسان = قوم(ن) نجود اليا أنعدم كل جودي
وأمجادنا غصب(ن) على كل مرضان = شعاع ذري في عيون الحسودي
ويوم ارسل الله مسلما لم الاخوان = سرنا ورى صقر الجزيره جنودي
من ضمن جيش الفيصلي نسل عدنان = والله يشهد والخلايق شهودي
وننعم بحكم محاسبة كل غلطان = ولا عاش من يجرح كرامة سعودي
رد الشاعر حامد الخياري الرشيدي من جمهورية السودان على الشاعر الكبير بن مربح
وسلامتكم واسمحولي على القصور
وتقبلوو سلامي