جتني رساله لايمتني وأنا لمت
نفسي على تقصيرها بالأصيله
مضمون ما قالت : غمت خاطري غمت
بيتين عن كل البيوت الجزيله
كلمت منهو تشتهي نفسك ونمت
وأهملت من لجلكـ سهر طول ليله
الله يهنيكـ بهوى من معه همت
وأنا لي الله بالليالي الطويله
ساعة قريت بيوتها صمت في صمت
كن الكلام اللي بقوله فشيله
عن ما يدنق راس محبوبتي شمت
هي خابره ربعي من أية قبيله
حكمة حياتي دام عزي ولا دمت
ماغير ربي أرتجي وانحني له
ماخنت بالصاحب ولا بعته ولا سمت
غيره ولو انها حمولي ثقيله
أشيل حمله فوق متني اليا قمت
وإن طاح أحطه فوق حمله وأشيله
يرقا جبل شامخ من الطيب مادمت
داعس على روس النفوس الذليله
فطرت في طيب الرجاجيل ما صمت
ياالله تحرم كل كفٍ بخيله
وياطير تكفا كل ما للسما حمت
تآخذ معك شوقي وقلبي دليله
هي الثريا وغيرها ما رمت
ما كل ما يبرق لعيني اخيله
إن نمت تطري لي وتطري إذا قمت
الحب خلا حالتي مسحيله
وإن قالت إني في هوي غيرها همت
وهي لها الله في الليالي الطويله
أقول لو ليله على صدرها نمت
تسوى بعيني ألف ليله وليله