أنساك ؟ لا والله ماانساك ماانساك
ماهو على بالي ولاني بناوي
ياللي دروبي وين ما اروح تلقاك
والله مالي غير طيفك مخاوي
هنيه أشوفك بين ذولا وذولاك
وهناك اهوجس بك وحيد(ن) خلاوي
يطيب لي يوم أذكرك واتحراك
واطريك واونس لك بروحي حراوي
ياقل بين الناس مثلك وحلياك
شوفة عيوني لو يقولون غاوي
ولاهو كثير ان قلت روحي فداياك
ان كانها ترضيك والا تساوي
ماهمني هرج الملامة بلاماك
ما هو بفرض ولا كتاب(ن) سماوي
العمر وش تسوا سنينه بلياك؟
ان قصْر والا طولته الرجاوي
وش باقي(ن) لي كثر ماراح لولاكِ
وش غير حسناتك محت لي مساوي؟؟!
حمد حميد الرشيدي