قصيدة عيد بن مربح بحفل مؤتمر رابطة عبس الثاني بالكويت
باسم سادة عبس يامرحبا باللي حضر=من هجوسٍ تصهل الخيل في ساحاتها
عبس بطنٍ من غطفان من سادة مضر=جمرةٍ بالمجد تشهد لها بصماتها
حاربتها بعض الأعراب من حقد وقهر=وحاربتها سود الأيام في نكباتها
مير تبقى رغم الأحقاد رمز معتبر=تنكسر رايات الأعدا قدم راياتها
يامفاخرنا بالانساب دش المختبر=خلنا نعرف فصيلتك وش جيناتها
نار ابن عمار تشعم وملقاطه حمر=وحزب بعبع مالها غير خذها هاتها
والدويلة كل ماكبرت القالة كبر=من سلاسل عون من عبس من ساداتها
والصباح شيوخنا أهل الزعامة والفخر=دون حد الدار محدٍ وقف وقفاتها
يوم جار الغدر خان المواثيق وغدر=رجعوا له سلفة الخير بفروقاتها
لعبوله لعبة الحرب في فرٍ وكر=وقدموا له حسبةٍ ماعرف حسباتها
ياحفيد اللي بنوا سورها غرب البحر=في ليالي جابر العيش ومعاناتها
ياسمي اللي طرد من شوارعها الفقر=وحذره مايمرح الا ورا صباتها
جيتك ياسيدي عيد ومصادف مطر=والهوى الشرقي تغذيه في نسماتها
لو تنادي عبس ماحسبت درب الخطر=وانت شاهد فعل الأحيا وفعل أمواتها
والكويت أم العروبة ولي فيها ممر=عشت فيها أيام ماتروح ذكرياتها
والتحية لاهل هدلان من بدو وحضر =أمةٍ بصدورها باقية شيماتها